Êxodo 2 - Kaxinawá Bíblia (BR)

Moisés kainikiaki, na hãtxarã

¹ Israelĩ huni bake Levĩ enabu betsã Levĩ hanubi hawenabu kayabi aĩbu bikĩ aĩwãtã bake wakubainaya huni bake bestitxai inũ aĩbu bake bestitxai kaĩmanishũ

² ana huni bake betsa bima hune pustukĩ batxi shasha sawemis atimas kaiã huni bake hawẽruahaira uĩtã hau hene anu putayamanũbũ yaushitã ushe dabe inũ besti hune yumewakĩ

³ hakia hawẽ ewã shinãkĩ: “Ẽ ana hune yumewatirumaki”, ishũ txitxã ewapa bishũ hawẽ shui buiwẽ buyakĩ keyushũ txitxã habiatiuri bishũ hari buiwẽ shui buya keyutã hawẽ bake txitxãki nanetã txitxã betsawẽ beputã yumewẽ maweshetã bushũ hene pasu anu shatxiwã nakumakĩ nũtãtã nunukẽ

⁴ hawẽ aĩbu bake yuikĩ: “Ea uĩrashũwẽ, haskaimẽkainã”, aka benãta huneshũ hawẽ txipĩ manaya

⁵ txipu Egito shanẽ ibuhaira Faraónẽ aĩbu bake nashi hui hawẽ merabewanikabu txipashbube hene ketãbaĩkĩ shatxiwã merã txitxã nunua betxitã hawẽ merabewanika yunua txitxã henẽ nunua nesheshũ beshũ

⁶ bepẽshuna shanẽ ibũ bakẽ uiã huni bake kashaya hawẽ nuikĩ yuikĩ: —Narã, Hebreu bakeki, Israelĩ enaburã— akaya

⁷ hanua hawẽ txipi hunea tashnikirã hushũ shanẽ ibũ bake betxipaiaya yuikĩ: —Hau mia txutxu amashũkubainũ enabu txutxuya mia yuishũtãpa?— aka

⁸ Egito shanẽ ibũ bakẽ yuikĩ: —Itãwẽ— aka kushikaini kashũ ha kaĩma hawẽ ewa kayabi haskashu yuia hawaira kushikirani

⁹ hatuki nukua Egito shanẽ ibũ bakẽ yuikĩ: —Na bake ẽ bishurã, miã ea yumewashũtãwẽ. Mĩ ea txutxu amashunaya ẽ mia pakakubaĩshanaii— aka ha bake ibuã iyushũ txutxu amashũkubaĩkĩ

¹⁰ ma yumewashũtã iyushũ Egito shanẽ ibũ aĩbu bake inãtã ibu ma kakẽ shanẽ ibũ bakẽ hawenabu yuikĩ: —Na bakerã, enamabia ena kayabi ẽ waii. Hene anua ẽ nesheimawẽ taeshũ hawẽ kena Moisés ẽ washuki— hatu wa

Egito anua Moisés pashai kaĩkainikiaki, na hãtxarã

¹¹ ma bari itxapahaira kakẽ Moisés ma huni ewahairatũ hawenabu Hebreu nawabu uĩ kashũ hatũ daya bika daya txakayamaibũ hatu uĩbaũkĩ hawenabu Hebreubu bestitxai Egito nawa pubenẽ kusha kusha akaya betxitã

¹² datekĩ uiãkeaketã hanu tsua niamahairakẽ hawenabu hatu manakushũkĩ Egito nawa kushakĩ tenãtã hanubi mashi basãtã datãshũ atximatã inũ ka

¹³ ushashini bestẽtã ana hawenabu uinũ ika kakẽ hawenabu Hebreu daberi ha irabei detenameriaibũ betxitã ha huni pubẽ Moisĩ yukakĩ: —Haskai yura betsa ikaskĩ hanubi minabu mĩ kushai?— aka huni pubenẽ yuikĩ:

¹⁴ —Tsuã mia shanẽ ibu waimamẽ? Miã daki mĩ hatu unãti wamiski, kupikinã. Mĩ Egito nawa tenãshina keska wakĩ mĩ daki eari tenanũ ika ikaii— aka Moisĩ nĩkatã datekĩ shinaĩ: —Ẽ deteshĩkẽ dasibitũ unãkanikiki— ika

¹⁵ haska Moisĩ ashĩkẽ Egito nawa shanẽ ibu Faraónẽ tapĩtã manakukĩ tenãpanã Egito anua Moisés bari huaikiri pashai kai mai betsa tsusĩhaira pukebaini uke betsauri Midiã nawabu anu hikitã ũpash biti kini anu ma kema tsaukẽ

¹⁶ ũpash beatiwẽ hawẽ amati mata washũ hatũ epa Reuelĩ txashuwã itxapa ũpash amanũ, iwanã, Midiã nawa Deusbe hãtxashunikã aĩbu bake txipashbu 7tũ hatũ epã txashuwã dasibi iweabu

¹⁷ hakia txashuwã uinika betsabu beshũ ũpash yaushikĩ txipashbu hatu nema taewaibũ Moisés benikaũ hatu nemashũkĩ txashuwã uinika betsabu hatu nitxĩshuna buaibũ hatu merabewakĩ ũpash beatãtãkĩ txipashbũ txashuwã amashũkẽ

¹⁸ hanua hatũ txashuwã iyui hatũ epa Reuel anu hikiaibu hatu yukakĩ: —Haskakĩ hawaira mã hatu amatanai?— hatu wa bestitxaitũ kemakĩ yuikĩ:

¹⁹ —Txashuwã uinika betsabu nemashũ Egito nawã nuku merabewashuki. Ha bestimarã, ũpash beatãtãkĩ mĩ txashuwã nuku amashũshuki— aka

²⁰ hawẽ bakebu yukakĩ: —Hania ha huni peparã? Haskakĩ ha besti mã bashibirãshumẽ? Ha huni pepa itãkãwẽ, hau ebetã piyununã— hatu wa ana bushũ

²¹ ha huni iweabu beya wakĩ Reuel inũ hawenabu Moisĩ hatu betxipai hatube hiwekũkainaya txipu aĩwãmakĩ Reuelĩ hawẽ aĩbu bake Zípora bimakẽ

²² hanushũ huni bake bima kaiã hawẽ bake kenakĩ Moisĩ yuikĩ: “Huni betsã mai pakea anu nawa keskai ẽ hiwekũkainaiwẽ taeshũ hawẽ kena Gérson ẽ waii”, hatu wa

²³ txipu bari itxapa kakẽ Egito nawa shanẽ ibu ma mawakẽ Egito nawabũ Moisĩ enabu Israelĩ enabu hatu itxakawakubainaibuwẽ taea huĩti nishmahairai kashai hau ea merabewanũ ika Israelĩ enabu nuitapai hatũ Deus ea akaibu Deusũ nĩkatã

²⁴ habu nuitapahaira waibu hãtxa nĩkatã haska hatũ shenipabu Abraão inũ, Isaque inũ, Jacó yubani Deusũ ana shinãkĩ

²⁵ Israelĩ enabu nuitapaibu uĩkĩ merabewanũ ishũ hatu ana haibuwakĩ taewabainikiaki.