Êxodo 1 - Kaxinawá Bíblia (BR)

Egito anua Israelbu paibu hatu nuitapawakubainibukiaki, na hãtxarã

¹ Israel, hawẽ kena betsa Jacó Egito anu hawẽ bakebuya hikinikiaki, habu tibi hawenabuyarã.

² Hawẽ huni bakeburã, Rúben inũ, Simeão inũ, Levi inũ, Judá inũ,

³ Issacar inũ, Zebulom inũ, Benjamim inũ,

⁴ Dã inũ, Naftali inũ, Gade inũ, Aser Egito anu hatũ epabe hikinibukiaki.

⁵ Ha dukũ hawẽ bake José kaniki dasiabu Jacó enabu tanaburã, 70 yurabu Egito anu hatuki dasitã hiwei taenibukiaki.

⁶ Ha dukũ Jacó mawaimakẽ txipu José inũ hawẽ betsabu inũ hati Jacóbe Egito anu hikiniburi mawakubainaibũ

⁷ hakia Israelĩ bababu pai bake itxapa pawakĩ hatũ mai pakea hatu atxĩ keyui ana patxakayamai kushipai hiwekubaĩkĩ hatũ mae anu hiwei nati ikaibũ

⁸ txipu Egito shanẽ ibuhaira Faraó bena shanẽ ibui taekĩ haska José hawenabu merabewapauni unãmatũ shanẽ ibũ hawenabu hatu yuikĩ:

⁹ “Uĩkãwẽ. Israelĩ enabu patxakayamakĩ kushipakĩ nuku binupai ikanikiki.

¹⁰ Haskakenã, hawarawẽ hatu beshtekubainãkãwẽ. Nũ hatu haska wama ana pakĩ nuku binuhairaibũ tsuabura nukuki sinatakĩ nuku detenũ ika beaibũ Israelĩ enabu pahairakĩ nukuki sinatakĩ habuki dasitã hatubetã nuku detebaini Egito anua pashai keyutirubuki”, hatu wa

¹¹ haska hatu yunua txibãkĩ Israelĩ enabu hatu itxakawakĩ hau habũ hatu uĩkĩ hatu dayama txakayamanũbũ hatu yunuabu hatu bika tenemakĩ hatu dayama txakayamakĩ hanu piti aruti maewã dabe Pitom inũ Ramessés Egito shanẽ ibu Israelĩ enabũ hau benishunũbũ hatu yunua ashũkubainaibũ

¹² hatu dayamakĩ hatu bika tenemabiaibũ habiaskabiakẽ ana pahairaibũ hanua Egito nawabu hatuwẽ datehairakĩ

¹³ Israelĩ enabu ana harakiri kaĩkaĩtima wakĩ hatu escravo tsuma washũ hatu kusha txakayamakĩ

¹⁴ hatũ hiwea bikawakĩ hatuki besti txiti itã hatu daya kushipahaira hatu amakĩ ha hiwe wati mai basi husia hatu pewamakĩ betsaburi hatuki sinatabetanã bai anuri hatu dayamakĩ hatu haska wakĩ Israelĩ enabu Egito nawabũ hatu nuitapahairawanibukiaki.

¹⁵ Hanushũri Egito shanẽ ibuhairatũ bake kaĩmanika dabe Israel aĩbu dabe hatũ kena Sifrá inũ Puárã, ha dabe hatu kenashũ hatu hãtxa wakĩ hatu yuikĩ:

¹⁶ —Matunabu bake kaiaĩbu hatu kaĩmakinã, hawa bake ikimẽkaĩ uĩtã hatu merabewakubaĩshãkãwẽ. Huni bake kaiãyanã, hatu tenãkubaĩshãkãwẽ. Hamẽ aĩbu bake kaiãyanã, heneshãkãwẽ— akĩ hatu yunua

¹⁷ hakia hatu haska wabia habũ bake kaĩmamisbũ hawa shanẽ ibũ yunuti hãtxa nĩkashunama Deusũ kushipaki mesei datekĩ huni bakebu kaiaĩ hawa hatu meama hiwemakubainaibuwẽ taeshũ

¹⁸ Egito shanẽ ibũ ana hatu kenamashũ hatu ha akĩ yuikĩ: —Haskakĩ huni bakebu kaiaĩ mã hatu tenãma hatu hiwemakubainai?— hatu wa

¹⁹ bestitxaitũ shanẽ ibu yuikĩ: —Nuku nũ Hebreu aĩbuaiburã, Egito aĩbu nũ keskabumaki. Nũ kariamakẽ huĩti kushitã hawaira ibubis hatũ bake kaĩmisbuki, nũ hatu merabewariamarã— aka

²⁰ haskakẽ bake kaĩmanika aĩbuaibu Deusũ hatu merabewaya hanua Israelĩ enabu pai kushipai ana itxapahairakubainaibũ

²¹ bake kaĩmanika aĩbuaibu Deusũ kushipaki meseaibuwẽ taeshũ hawenabus pawakĩ Deusũ hatu merabewakĩ pewakubainikiaki.

²² Ana hawawẽ hatu nematima Egito shanẽ ibu Faraónẽ hawenabu dasibi yunukĩ: —Hebreu huni bakebu tibi kaĩyaĩ hatu mebĩtã nukũ hene anu pukukubaĩkãwẽ, hakia hatũ aĩbu bakebu besti kaĩyaĩ ha hatu heneshũkubaĩkãwẽ, hau hiwenũbunã— hatu wa haska hatũ shanẽ ibũ ma hatu yunua akĩ taewabainaibũ