Esdras 6 - Kaxinawá Bíblia (BR)

Jerusalém anu Deus kẽwãti hiwe bena waibu hatu itimaskawaibu Dariõ hatu nemanikiaki, na hãtxarã

¹ Babilônia anushũ hanu una mekekĩ arumisbu anua hau ha una Judá enabukiri Cirõ hatukiri keneshũ arumani hau benakĩ betxishunũbũ Pérsia nawa shanẽ ibuhaira Dariõ hawẽ tsumabu yunua

² hanu una arumisbu tibi anua benabaũkĩ mai pakea betsa hawẽ kena Média anu mae betsa Acmetá anu shanẽ ibuhairatũ hiwe hawẽruahaira anushũ Cirõ Jerusalém Templokiri keneni una atimas betxinibukiaki, eska hawẽ hãtxa hatukiri kenenirã:

³ “Shanẽ ibui taeima ano bestitxai kakĩ shanẽ ibuhaira Cirõ eska hawẽ yunuti hãtxa hatu kenemakĩ: ‘Jerusalém anu hawẽ Deus kẽwãti hiwekiri matu yununũ nĩkakãwẽ. Hanushũ Deus kẽwãkĩ inabu hirabi menukĩ hau keyukubaĩshanũbũ haki tsamabaũti washũ hawẽ kẽwãti hiwe hau ana anũbũwẽ, hawẽ keyatapa 27 metro inũ hawẽ hashpa 27 metrorirã.

⁴ Ha dikabi mishki ewapa itxapa datsakĩ kerã wãkĩ pewashũ txitxibaĩkĩ keyutã ha mamaki ana txitxibaĩkĩ keyuriatã ana ha katxu ha mamaki ana txitxibaĩkĩ keyuriatã hi tuash sapa bena washãkãwẽ. Shanẽ ibuhairatũ pei arukĩ mekemistũ hatu pakakubaĩshanikiki.

⁵ Ouro mane inũ prata mane hawẽ kẽwãti mabu wanibu Deus kẽwãti hiwe Jerusalém anua itxawabaĩkĩ Babilônia anu Nabucodonosorĩ beni hau hatu ana inãshanũbũwẽ. Bikĩ itxawakĩ keyushũ Jerusalém anu bushũ hanu Deus kẽwãti hiwe waibu anu ha merã tsaũkĩ hau mãtxĩshanũbũwẽ’ ”, anikiaki.

⁶ Haska keneni betxishunabu uĩtã Hene Eufrates kesha betsauri bari kaikiri mai pakea yununika hawẽ kena Tatenai inũ habianuri shanẽ ibu beshmas Setar-Bozenai inũ habe dayamisbu hatu yunukĩ Pérsia shanẽ ibuhaira Dariõ eska hãtxa hatu kenematã hatu anu yunukĩ: “Maturã, Jerusalém henebirani kaĩribirãkãwẽ.

⁷ Hanushũ hau hatũ Deus kẽwãti hiwe bena waimabu hau menenũbũ Judá enabu shanẽ ibu beshmas inũ hatũ yununika betsa betsapabu hatu ana nemama hatu henetã hatu yunuribirãkãwẽ, hau keyushanũbunã.

⁸ Ana hatu nemakĩ beshteyamakãwẽ. Hau hatũ Deus kẽwãti hiwe hau meneshanũbũ haska Judá enabu yununikabu mã merabewashanũ ẽ matu yunuaii. Hene Eufrates bari kaikiri mai pakea anu hikikĩ ea pei pakakubaĩmisbu shanẽ ibũ pei bikĩ mekekubaĩmistũ merabewakĩ binumama pei hawaira hatu pakakubaĩshãkãwẽ, hau ha dayaibu hatũ daya heneyamanũbunã.

⁹ Ha inũ, haska Deus nai anuatũ betxipaimis hawẽ kẽwãti inabu hirabi pitiyabi menushũkĩ keyukĩ hau Deus kẽwãkubainũbũ ina awa inũ, txashuwã inũ, txashuwã bake inũ, shekiwã trigo inũ, sal inũ, uva vinho inũ, piti sheni hati matu yukaibu shaba tibi Jerusalém anu hawenabu Deusbe hãtxashunikabu hatu inãkubaĩshãkãwẽ, hawa heneamarã.

¹⁰ Mã hatu inãkubaina Deus haska washũkĩ ẽ shanẽ ibuhaira hiweakiri inũ ẽ huni bakebu hiweakiri hau Deus habũ ea yukashũkubainũbũwẽ.

¹¹ Tsuãra ẽ yunuti hãtxa danãkĩ nĩkama danaĩburã, hawẽ hiwe hawẽ teweti betsa pekashũ nitxĩtã debu kenutã hawẽ yura ha mamaki hanakĩ hawẽ puku nashtu anu timabaĩ pesakĩ keũshãkãwẽ. Unãshubira isĩ tenekũkaini mawaya hawẽ hiwe pekakĩ keyushũ txakabuwakĩ mese washãkãwẽ. Haska dasibi ẽ matu yunuaii.

¹² Jerusalém anu Senhor Deus kẽwãti hiwe hanu hawẽ kena ipakeshanai katuni akaiburã, shanẽ ibu betsã txakabuwakasmakĩ nawa betsabu pubẽkĩ txakabuwakĩ hatu bika tenemaibu Deusũ hatu kupikĩ hau hatu yamawashanũwẽ. Ea Dariõ na hãtxa eska ẽ matu yunuairã, kaneama ashũkĩ menehairashũshãkãwẽ”, anikiaki.

Deus kẽwãti hiwe Templo akubaĩkĩ keyunibukiaki, na hãtxarã

¹³ Haska Dariõ hatu yunuima Hene Eufrates kesha betsauri bari kaikiri mai pakea betsa yununika shanẽ ibu beshmas Tatenai inũ habianuri shanẽ ibu betsa beshmas Setar-Bozenai inũ habe dayamisbũ uĩtã haska ma hatu yunuima hawa kaneama akubaĩkĩ keyunibukiaki.

¹⁴ Haska wakinã, Deusũ hãtxa yuishunika dabe Ageu inũ Idõ huni bake Zacariasĩ haska bebũkiri Deusũ hatu yuimaima keska txibãkĩ hau dayakubainũbũ Judá enabu dayarubu yununikabũ hatu yunukubainabu Deus kẽwãti Templo bena wakubaĩkĩ haska Israelĩ enabu mekenika Deusũ hatu yunuima inũ haska Pérsia nawa shanẽ ibuhairabu Ciro inũ Dario inũ Artaxerxesĩ hatu yunukubainabu txibãkĩ akubainaibũ

¹⁵ Pérsia nawa shanẽ ibuhaira betsa Dario hatu shanẽ ibushũkũkaini shaba 3 inũ, ushe Adar inũ, 6 ano kaitiã Deus kẽwãti hiwe menekĩ keyunibukiaki.

¹⁶ Israelĩ enabu inũ, hawenabu Deusbe hãtxashunikabu inũ, Israelĩ huni bake betsa Levĩ enabu inũ, dasibi Babilônia anu hatu iyunibu ana txĩtuĩmabu benimahairakĩ Deus kẽwãti hiwe meneshina Deus uĩmai haki besikĩ

¹⁷ habiatiãri 100 ina awa bake bene inũ, 200 txashuwã bene inũ, 400 txashuwã bake tesẽshũ Deus kẽwãkĩ hawẽ txi tapu anushũ inabu hirabi menukĩ keyushunaibũ Israelĩ enabu dasibibũ Deuskiri txakabukubaĩmisbu buanũ, iwanã, Israelĩ enabu 12 shukuabu tibi cabra bene bestitxai katutã Senhor Deus daewakĩ ha 12 cabra bene tesẽshũ txi tapukishũ cabra hirabi menukĩ keyuaibũ

¹⁸ txipu habu dayakubaĩshanaibu shuku wakĩ hawenabu Deusbe hãtxashunikabu hatu pashkakĩ hatu yunuakeaketã hanushũri Levĩ enabu hunibu haska Jerusalém anushũ Deus dayashũkubaĩkĩ haska Moisĩ keneni keska txibãkĩ hau Deus duawakubaĩshanũbũ hatu yunuakeakenibukiaki.

¹⁹ Babilônia anu hatu iyunibu ana txĩtũbiranimashũ ano bena kaĩyaĩtiã shaba 14 inũ ushe ha dukũ ikaitiã Egito anushũ Senhor Deusũ nai tsumã Egito nawabũ huni bake iyuabu hatu tenãbauni inũ Israelĩ huni bake iyuabu tenãma hatu dũkebaini shinãkĩ Senhor Deus kẽhairawai benimai Páscoatiã besi tushinibukiaki.

²⁰ Besiriabuma hau Senhor Deusũ hatu danãyamashanũ hawenabu Deusbe hãtxashunikabu inũ Levĩ enabu hunibu ibubis hatũ yura ma pei keyushinabu ma hawama shinãkĩ Babilônia anu hatu iyunibu ma txĩtũbiranimabu inũ hawenabu Deusbe hãtxashunikabu ma peshina hatubetã Páscoa hawẽ shinãmati txashuwã bake bene mirimahaira tesẽshũ hatu menushũtã hatubetã pikatsi

²¹ Babilônia anua dasibi Israelĩ enabu txĩtũbiranibubetã pinibukiaki. Ha inũ, nawa betsa betsapa hatũ mae anushũ hatũ beya txakabu atimapa amisbu henetã ana akama Israelĩ enabũ mekenika Senhor Deus kẽwãkĩ taewakĩ hatube dasitã hawẽ kẽwãti nami hatubetã pikĩ keyurianibukiaki.

²² Israelĩ enabu mekenika Deus kẽwãti Templo hau bena wanũbũ Pérsia nawa shanẽ ibuhairatũ hatu betxipaikĩ hatu merabewakubainimawẽ taea Judá enabu benimahairakĩ 7 shaba binui ana ha katxu besikĩ misi shashawatiuma ashĩshũ benimakĩ pikubainibukiaki.