Esdras 1 - Kaxinawá Bíblia (BR)

Hawẽ yunuti hãtxa Ciro txanikiaki, na hãtxarã

¹ Pérsia nawa shanẽ ibuhaira Cirõ hatu shanẽ ibushuni taekaĩkĩ ano bestitxai yunukĩ taewabaĩkĩ haska Senhor Deusũ hãtxa yuishunika Jeremias Deusũ yuimani keska hau Cirõ ashanũ Deusũ hawẽ shinã unãmaiwẽ taeshũ shanẽ ibuhaira Cirõ hawẽ yunuti hãtxa hau dasibibũ nĩkanũbũ hãtxawẽ hatu yuitã keneri hatu buma akeakekĩ Cirõ hatu yuikĩ:

² “Earã, Pérsia nawa shanẽ ibuhaira Ciro eska matuki txanikĩ ẽ matu yuiai ea nĩkakãwẽ. Nawa shukuabu tibi mai hirabi anua shanẽ ibubu ẽ hatu yunukubaĩshanũ mekenika Senhor Deus nai anu hiweatũ ea katukĩ kushipa waniki. Ea haska watã Judá enabũ mai pakea anu Jerusalém anu hawẽ kẽwãti hiwe wanibu ẽ hatu ana amashanũ Senhor Deusũ ea yunuimaki.

³ Haskakẽ mã tsuabura Senhor Deusũ enaburã, hau Deusũ matu merabewakubaĩshanũwẽ. Tsuara mã Judá mai pakea anu hiwea hunirã, Jerusalém anu butãkãwẽ. Ha Jerusalém anurã, hanu Israelĩ enabu mekenika Senhor Deus hiweaki. Harishũ hawẽ kẽwãti hiwe bena hawẽrua washuni burishãkãwẽ.

⁴ Tsuabura nenu benibu inũ, hawẽ bakebu hiweyuabu inũ, mae betsa tibi hiweabu hatũ mae henebaini Jerusalém anu ana txĩtũbaĩ hatu merabewaibũ mã ha dapi hiwebaunabũri matũ prata pei heshe inũ, ouro pei heshe inũ, hawara mabu betsa betsapa inũ, inabu hau hatu inãkubaĩshanũbũwẽ. Ha dikabi Jerusalém anushũ mekenika Deus kẽwãti hiwe hawẽrua waibu hatũ inãkuĩ yaushiama hau hatu inãkubaĩshanũbũwẽ”, hatu wa

Jerusalém anu Israelĩ enabu ana txĩtũbainibukiaki, na hãtxarã

⁵ Jerusalém anu bushũ Senhor Deus kẽwãti hiwe hau ana benawai bunũbũ Deusũ hatu shinã betsa wamakĩ benimawakubainaya kanũ ika shinã txãkaĩ Judá enabu shanẽ ibu itxapa hawenabuya inũ, Benjamimnẽ enabu shanẽ ibu itxapa hawenabuyari inũ, hawenabu Deusbe hãtxashunikabu inũ, Levĩ enabu shanẽ ibu itxapa hawenabuyari bunũ, iwanã, dasibibu hiwebaunabũ hatũ mabu pewakubainaibũ

⁶ hanua habu hatu dapi Babilônia anu nawabu hiwebaunabu habu dayai buaibu hatu merabewakatsis ikĩ hawa yaushiama hatũ mabu betsa betsapa inũ, hatũ prata pei heshe inũ, hatũ ouro pei heshe inũ, mabu pepa sharabu inũ, mabu pepa karuhaira inũ, hatũ inabu hatu inãbirãbiranabu

⁷ hawẽ kẽwãti hiwe Jerusalém anua mane ouro mabu sharabu Nabucodonosorĩ beshũ hawẽ yushibubu kẽwãti hiwe anu aruni hau bushũ hatu inanũbũ hawẽ tsumabu Pérsia nawa shanẽ ibuhaira Cirõ hatu yunua ma bushuãbu

⁸ Jerusalém anu hau ana butãshanũbũ Cirõ hawẽ pei mekenika Mitredate yunua txipu hatũ hawẽ kẽwãti mabu tanakĩ unaki kenekĩ keyushũ Judá enabũ mai pakea anu hiweabu yunumis shanẽ ibu Sesbazar inãnikiaki.

⁹ Haska Mitredatẽ hati mabu unaki kenekĩ keyuni matu yuinũ nĩkakãwẽ. 30 ouro mane kẽtxa inũ, 1.000 prata mane kẽtxa inũ, 29 nupe inũ,

¹⁰ 30 ouro mane copo inũ, 410 prata mane copo pepa beshmas sharabu inũ, ana 1.000 hawẽ mabu betsa sharabu itxapahairarã,

¹¹ ouro mane mabu inũ prata mane mabu tanakĩ keyuaburã, 5,400 inikiaki. Yurabu Babilônia anu hatu iwenibu inũ hawenabuya hatu henebaĩkĩ hatube txĩtũkaĩkĩ Sesbazar Jerusalém anu ha kẽwãti mabu dasibi bunikiaki.