Efésios 6 - Kaxinawá Bíblia (BR)

¹ Bakebuũ, matu yununũ nĩkakãwẽ. Matũ ibubu nĩkatã hawẽ yunua ashũkubaĩkãwẽ. Haska wakĩ nukũ Shanẽ Ibu benimawakĩ mã kaneamaki.

² Ha dukũ nuku yubakĩ Deusũ yununirã, eska hayaki: “Matũ epa inũ matũ ewa kẽwãkĩ duawakubaĩkãwẽ,

³ na mai anu benimai bari itxapa pe hiweyukũkaĩkatsis ikirã”, aniki.

⁴ Bakeyabuũ, maturi yununũ nĩkakãwẽ. Matũ bakebu tapĩmakĩ hau matuki datei sinatayamanũbũ yunutxakayamakĩ nemahairayamakãwẽ. Hakia hiwea tapĩmakĩ Deusũ hãtxa tapĩmakĩ hawẽ yunuti hãtxa inũ hawẽ nemati hãtxa unãmakĩ pe yusĩkĩ haska nukũ Shanẽ Ibũ abumis keskawẽ hatu yumewakubaĩkãwẽ.

⁵ Escravo dayarubuũ, maturi yununũ nĩkakãwẽ. Matubunã, matũ tsuma mai anuabuki datei dayai penũ, iwanã, hatu duawakĩ haska matu yunua nĩkatã txibãkubaĩkãwẽ. Haskakinã, Cristo duawakĩ mã akawaii.

⁶ Haskakẽ matũ tsuma pe dayashũkĩ duawairã, hatũ berubi uĩaĩ bestiwẽma hakia uĩyamarikẽ pe dayashũkubaĩkãwẽ, Cristõ dayarukĩ hawara hawẽ Epa Deusũ abumis haska xinaĩ ashũkinã.

⁷ Hawara daya mã akairã, txikixbetanã akama nukũ Shanẽ Ibu mã duawai keska akubaĩkãwẽ, yurabu uĩmakĩ ashũamarã.

⁸ Tsuabura escravo inũ escravoma mã dayamiswẽ taeshũ haratura mã pe dayamis inũ txikixi mã dayamis matu tibi unãshũ nukũ Shanẽ Ibũ matu manakushanikiki.

⁹ Yununikabuũ, maturi yununũ nĩkakãwẽ. Habias Shanẽ Ibu nai anuatũ yura dasibi unãkĩ yununikabu inũ matũ tsumaburi habiaska dabeswẽ nuikĩ matu kupimistũ shanẽ ibu inũ shanẽ ibuma ha dabe habias senẽ xinãmiski. Haskakẽ matũ dayarubu pe mekekĩ ana hatu kũyã akama ana miki hatu datewama pewẽ besti hatu yunukubaĩkãwẽ.

Ikũwaĩbu soldadobu keskai kuxipakũkaĩtikiaki, na hãtxarã

¹⁰ Ẽ betsabu inũ ẽ puibuũ, nukũ Shanẽ Ibũ kuxipa paepa mã hayarã, hawẽ kuxipai ewakãwẽ.

¹¹ Deusũ hawẽ mia mekeai nemati kuxipa bikãwẽ. Ha hayatã mã txĩtuãmakẽ diabo Satanásã matu parãtirumaki.

¹² Na haska nũ hatube detenameairã, yurabũ kuxipawẽ nũ ikai keskamaki. Hakia yushĩ txakabubu inũ hamapai shanẽ ibu txakabu na mai anua inũ manaũri namakisshũ nuku keshebaũshũ yunuaitũ nuku atxiabube nemai heẽ iyamai nũ hatube detenamei keskaii.

¹³ Hanushũ Romano soldadobukiri matu xinãmanũ nĩkakãwẽ. Detenamei bui tsakanamenikabu txĩtũkatsi ikama hawẽ meketi mabu kuxipa tibi sawe keyutã detenamei bumisbuki. Haska keskariai matũri diabo Satanás nemai heẽ iyamai unãnepakatsi dasibi Deusũ kuxipa hayai keyutã matu bikawaibutiã txĩtuãma maemai kuxipakubaĩkãwẽ.

¹⁴ Hanua hãtxa txanima besti yuikĩ hawa dateama mestẽwãkãwẽ. Haska wai nũ pe hiweabu Deusũ nuku mekekubaĩmiski.

¹⁵ Matunã, Deusũ hãtxa kakape unãnuma hiwetikiri mã yusĩ bukatsis ikaiburã, bebũkiri matũ hiwea pewakubaĩkãwẽ. Haska wakĩ mã ma pewa haska soldadobu detenamei bunũ, iwanã, bebũkiri hawẽ bitxi tae sawemis keska wakĩ kakape yuibaũkĩ Deuski sinataibu mã maematirubuki.

¹⁶ Haska inũ, Deus ikũhairawakubaĩwẽ. Nũ haskawaya soldadobũ hatũ hi besha turuwẽ hatũ yura hunemis keska wakĩ Deuski sinataibũ hatũ txakabuwẽ nuku binupaiabu nukũ nũ nematiruki.

¹⁷ Deusũ nuku mekemisrã, soldadobũ hawẽ mane maiti sawea hawẽ mekemisbu nukuri nũ haska keskaki, Deuski sinataibũ hau nuku parãyamanũbunã. Haska inũ, Deusũ hãtxa tapĩhairakubaĩkãwẽ. Hawẽ hãtxarã, nupe txaipa hawẽ detenameti keskaki. Hawẽ Yushĩ Pepatũ nuku merabewaya ha Deuski sinataibu nũ hawẽ nematiruki.

¹⁸ Matubunã, Deusũ Yushĩ Pepatũ matu xinãmaya Deusbe hãtxakĩ hatu yukashũkĩ hatu ea ashũkĩ heneyamakubaĩkãwẽ. Haskai hawa punu nukama inũ babuama beru mestẽwãtã hiwekubaĩkĩ ha dikabi Jesus ikũwaĩbu dasibibu Deus yukashũriakubaĩkãwẽ.

¹⁹ Eska ẽ matu yukaii. Hau Deusũ ea merabewakĩ hari hãtxati ea inãkĩ inũ ẽ hãtxa ea kuxipa waya haskawẽ taeshũ haska Deusũ uatiã huneni shabakabi hawẽ bakekiri ẽ hatukiri txanikũkaĩnũ ekiriri Deus yukashũkubaĩkãwẽ.

²⁰ Haska inũ, Deusũ ea katushũ hawẽ kuxipaya hãtxashunika ea wani ẽ hawẽ kakape yusĩbaũmiswẽ taeshũ habũ nenu ea iweimashũ ea bitxikĩ akawaimabu nenushũ ẽ bika tenebiakĩ hawa dateama nukũ Shanẽ Ibukiri hãtxai ẽ txanikũkaĩnũ ea Deus yukashũkãwẽ.

Hawẽ henea nuiti hãtxakiaki, na hãtxarã

²¹ Ẽ haskarara hau matu anu kashũ ekiri matu unãmai txani kashanũ, iwanã, nukũ Shanẽ Ibuwẽ taea nukũ betsa Tíquicõ, ikũwaĩ txĩtuĩsma habiatũri nukũ Shanẽ Ibũ daya ashũkĩ nuku merabewamis matu anu ẽ nitxiaiĩ.

²² Haskawẽ taeshũ haska matuki txanikĩ nenu ebe maniabu inũ ekiri hãtxakĩ hau matu xinã txãkãwaĩ kanũ nukũ haibu matu anu ẽ nitxiaiĩ.

²³ Nukũ Epa Deus inũ nukũ Shanẽ Ibu Jesus Cristo mã habũ ikũwaĩbu haska tibi habu haya matu inã bikubaĩkãwẽ, ikũhairawakinã, ikũwaĩbu betsabuwẽ nuikinã, unãnuma hiwekũkaĩkinã.

²⁴ Haska inũ, tsuabũra nukũ Shanẽ Ibu Jesus Cristo abukĩ betsa waisma hau Deus hatuwẽ nuikĩ duawakubainũwẽ. Hatiski, ẽ hãtxarã. Paulo