Daniel 4 - Kaxinawá Bíblia (BR)

Nabucodonosor hawẽ shinã benuima hiweyunikiaki, na hãtxarã

¹ Bari betsatiã dasibibũ hau tapĩshanũbũ Nabucodonosorĩ hatu banabimakĩ yuikĩ: “Yurabu dasibi inũ shukuabu betsa betsapa tibi inũ, hãtxa betsa betsapawẽ hãtxamisbu mai hirabi anu hiwebaunabu hawa nuitapama unanuma mã hiwekubaĩshanũbũ ea ẽ shanẽ ibuhaira Nabucodonosorĩ matukiri ẽ shinaiĩ.

^2-3 Deus pepa dasibi binuatũ haska betsã atiruma dami itimaska akĩ hawẽ kushipawẽ ea amamis mã uĩtirubuki. Yurabu hiwei hawenabu pa txakayamai hatu yunui shanẽ ibukũkaĩshanikiki, hawa beshtekei heneamarã. Haska dami itimaska betsa betsapa ea ashũkubaini ẽ matu yuikatsis ikai ea nĩkakãwẽ.

⁴ Ea ẽ Nabucodonosor ẽ hiwe ewapa hawẽruahaira anu unanuma hiwekũkaini enabube piti inũ mabu pepa ẽ hayawẽ taea benimakũkaini

⁵ hakia meshu betsatiã ẽ dakati anu daka ẽ usha namaya ha ẽ bika teneaitũ mesehaira ẽ namapã ea uĩma ẽ datehairaniki.

⁶ Hanua ẽ nama unãshũ hau haska hawẽ shinã ea yuinũbũ Babilônia anua unanepabũ dasibi hau ea yui benũbũ ẽ hatu yunua bushũ hatu ea iyushunabu

⁷ Babilônia anua mukayabu inũ, yushibubu yukamisbu inũ, unanepabu inũ, bishiwẽ unãmisbu dasibi bei ea bebũ mapuabu haska ẽ namakiri ẽ hatu yuia hakia haska hariri yuiti unãbumakẽ

⁸ atimas eanu Daniel hua, hawẽ kena betsa Beltessazar ẽ mekenika yushĩ deus keskarã, ha merã habũ mekenika meribi yushĩ hiweshũ unãmakubaĩmis habũ mekenika meribi yushinẽ unãmakubaĩmis haya ea nĩkaya eska ẽ nama ẽ yuiniki:

⁹ ‘Yushibubu yukamisbu shanẽ ibu Beltessazarĩ, Deus meribi yushinẽ mia unãmakubaĩmiswẽ taeshũ dasibi tsuã unãtirubuma mĩ unã keyuaii, eã ẽ unanã. Haska ẽ nama ẽ uĩshina ẽ mia yuia nĩkatã haska hariri yuiti ea yuiwe.

¹⁰ Dakashũ namakĩ eska ẽ uĩshina ea yuiniki: Mai hirabi namakis hi keyatapahaira ẽ uĩshinaki.

¹¹ Ha dukũ yumei hawẽ yura ewapakũkaini keyatapahairai hawẽ masua nai kuĩ binua mai hirabi txaihaira anushũ dasibibũ uĩbaũtirubuki.

¹² Hawẽ pei hawẽrua inũ hawẽ bimi mirimahaira dasibi yurabu inũ yuinakabũ pibiabu teshetiruki. Hawẽ pei namã yuinaka utatirubu inũ hawẽ mebi tibi anu isapã na wakubaini ha hiwẽ dasibibu hiwekubainaibũ ha hi haskaraya haskaratirubuki.

¹³ Hakia namakĩ ẽ uĩkubainaya nai tsumã uĩkĩ mekenika nai anua butushũ

¹⁴ hui kushipawẽ yuikĩ: Ha hi derashũ hawẽ mebi meshte meshte atã hawẽ pei sirikĩ keyutã hawẽ bimi tsekakĩ keyushũ sa akãwẽ, hanu yuinaka utamisbu inũ isapã na wamisbu hau tashni pashanũbũwẽ.

¹⁵ Hakia ha mai anu hawẽ buru inũ hawẽ tapũ henekãwẽ. Mane ferro inũ mane bronze dispi txiwetameyawẽ hawẽ buruki neshashũ bai anu basi mapu anu henekãwẽ. Penaya tibi basnũmã txa akubaina yuinakabubetã basi pikubaĩshanikiki.

¹⁶ Hawẽ huni kuinẽ shinã bepukĩ betsa watã yuinakapã shinã keska wa, na haska hawẽ kupiti txakabuwẽ 7 ano hiweyukũkaĩshanikiki, iwanã,

¹⁷ Deus kushipahaira dasibi hatu binuatũ yurabu tsumashũ tsuara shanẽ ibubu wakatsi ikĩ ibubis katutiruki, yura shukua betsa anu huni hawauma hatu shanẽ ibu wamiski, hatu yunukubaĩti wakinã. Na kupiti hiweabu dasibibũ hau tapĩshanũbũ hawẽ nai tsuma meribibu yununiwẽ taeshũ ha nai tsuma uinikatũ mekenikabũ nũ mia ma banabimaii, ea wa ẽ nĩkashinaki.

¹⁸ Na eska namakĩ ẽ ea shanẽ ibuhaira Nabucodonosorĩ ẽ uĩshinaki. Hanira ẽ hatu yunumis anu unanepabu hiweabũ haska hariri unãbumahairaki. Hakia Deus meribitũ yushĩ kushipa mĩ hayawẽ taeshũ na nama hawẽ unãmati miã mĩ unaiĩ’, haska ikis ea yuiriwe”, ẽ wa

¹⁹ hanua Daniel hawẽ kena betsa Beltessazar haska yuiai nĩkatã hawaira hawẽ shinã merã txakabu shinaĩ pes nia datehairai mesei hawa hãtxakatsis ikamakẽ hakia ea ẽ shanẽ ibuhairatũ yuikĩ: “Beltessazarĩ, haska ẽ namashina inũ haska hakiri mĩ ea yui keyutiruwẽ dateyamawe. Haska mĩ shinaĩ ea yuiwe”, ẽ wa Beltessazarĩ ea kemakĩ yuikĩ: “Ẽ shanẽ ibuũ, mĩ nama pemahaira mĩ uĩshina mĩ ea yuimakatsis ikairã, haska mĩ namashina ikirã, hau miki sinataibu ishanũbũwẽ”, itã

²⁰ “Ha hi mĩ uĩshina ewai ewapai keyatapai nai kuĩ binua mai hirabi txaihaira anushũ dasibibũ uĩbaũtirubu

²¹ inũ hawẽ pei hawẽrua inũ hawẽ bimi mirimahaira dasibibũ pibaũtirubu hanu yuinaka utamisbu inũ hawẽ mebi tibi anu isapã na wamisburã,

²² haskarã, shanẽ ibuũ, ha hi keskarã, habia mĩ miaki, ewai mĩ ma kushipahairairã. Hatu detekubaĩkĩ hatũ mae tibi atxikubaĩkĩ nai kuĩ mĩ binua keskaki. Hanira mai hirabi anu mĩ hatu yunumisrã, haki.

²³ Ha inũ, mĩ uiãyã nai tsumã uĩkĩ mekenika nai anua butushũ yuikĩ: ‘Ha hi derakĩ di ashũ txakabuwakĩ keyukãwẽ. Hakia ha mai anu hawẽ buru inũ hawẽ tapũ henekãwẽ. Mane ferro inũ mane bronze dispi txiwetameyawẽ hawẽ buruki neshatã basi bai anu henekãwẽ, penaya tibi basnũmã txa akubaina yuinakabubetã 7 ano basi pikubaĩshanai haska yuiarã.

²⁴ Na haska keska mĩ ikũkaĩshanai keska wakĩ mia pewakatsi ikĩ Deus kushipa dasibi hatu binuatũ na kupitiwẽ mia akatsi ma mia yunuaki.

²⁵ Mĩ shanẽ ibubiakẽ txai tari yurabu pashkatã mĩ hiwenũ mia nitxiãbu inabube hiweshũ ina awa keskakĩ basi mĩ pikubaĩshanaii, basnũmã mĩ yura txa akubainarã. Deus kushipahaira dasibi hatu binua yurabũ shanẽ ibu hatũ tsuara shanẽ ibu wakatsis ikĩ hatu betxipaikĩ katumis mĩ tapĩriama yuinaka keskai 7 ano hiwekũkaĩkĩ atimas tapĩtã mĩ unãshanaii.

²⁶ Hawẽ buru inũ hawẽ tapũ mai anu hau henenũbũ hatu yunuaya Deus besti kushipa kayabi haya unãtã txĩtũkirã mĩ ana shanẽ ibuhaira ikũkaĩshanaii’, haska Deus kushipakiri unainã.

²⁷ Haskawẽ taeshũ shanẽ ibuũ, ẽ hãtxa mĩ ea txibãtirumẽkaĩ, ea nĩkawe. Ana nĩkaismama pepas akubaĩwẽ. Mĩ txakabu henekubaini nuitapaibuwẽ nuikũkaĩshãwẽ. Haska wakubaini unanuma hiwei mĩ mabuyapakeshanimẽkaĩ, mia kupiamarã”, anikiaki.

²⁸ Shanẽ ibuhaira Nabucodonosor Danielĩ banabimaima keska akĩ habias Deusũ kupikubainikiaki, hawa kaneamarã.

²⁹ Hanua ano bestitxai kaya Babilônia anu hawẽ hiwe hawẽrua keyatapahaira masapa anu nikaũkĩ uĩbauni ibubis kẽkĩ hawẽ merabewanikabu Nabucodonosorĩ

³⁰ hatu yuikĩ: “Babilônia mae ewapahaira hawẽrua uĩkãwẽ. Ẽ maewã uĩkĩ ẽ kushipa hau shinãkubaĩshanũbũ shanẽ ibukĩ nenushũ ẽ hatu yunukubainũ, iwanã, na maewã hawẽrua ẽ kushipawẽ ẽ hatu amakubainimaki”, hatu wai

³¹ hãtxai heneriamakẽ nai anua hãtxa tashnikĩ yuikĩ: “Shanẽ ibu Nabucodonosorĩ, eskaki, nĩkawe. Mĩ shanẽ ibumisrã, ana minamaki.

³² Tari mĩ benãta hiwenũ minabũ mia nitxĩshãkanikiki. Inabube hiweshũ ina awa keskakĩ basi mĩ pikubaĩshanaii. Deus kushipahaira dasibi hatu binuatũ yurabu shukuabu tibi manibaunabu yunukĩ tsuabura shanẽ ibu wakatsi ikĩ ibubis katutiru mĩ tapĩriama yuinaka keska 7 ano hiwekũkaĩkĩ atimas tapĩtã mĩ unãshanaii”, akaya

³³ hawaira haska yuima keska hawẽ kupiti banabimaima taekaĩkĩ hawẽ shinã yuinakapã shinã keska wawẽ taeshũ hawenabũ Nabucodonosor putakĩ nitxiãbu ina awa keskakĩ basi pikubaini basnũmã hawẽ yura txa akubaina, hawẽ bu inũ hawẽ mẽtsis ewai txaihairai tete pei inũ hawẽ hũtsis keskanikiaki.

Atimas Deus kayabi Nabucodonosorĩ nĩkatã txanima ikũwãkĩ taewabainikiaki, na hãtxarã

³⁴ Nabucodonosorĩ ana yuikĩ: “Deusũ ea kupini hanu ea menekĩ dasibi ea betsa waya ea Nabucodonosor naiuri teskãtã ẽ uiãyã ẽ shinã pepa ana eki hikimakĩ kaya waya Deus kushipa hatu binu keyua hiwei ikibi ika eã duawakĩ kẽwãkĩ yuikĩ: ‘Yurabu hiwea pakubainaibu Deus shanẽ ibukũkaĩkĩ hawẽ kushipawẽ hatu yunukubaĩshanikiki, hawa beshtekei heneamarã.

³⁵ Ha bebũ mai hirabi anu hiwebaunabu hawaubumaki, hawa kushipa hayabumarã. Nai anu inũ mai anu hawẽ shinanẽ haska shinaĩ besti aki hiwemiski. Tsuãra hawẽ kushipa nemakĩ yuikĩ: Mĩ haska wai ikai? akĩ tsuã yukatirumaki’, itã,

³⁶ Habiatiãri ẽ shinã pepa ana eki hiki keyuaya enabu ewẽ benimai ana eki dasishũ dasibibũ hau ea pe shinãkubaĩshanũbũ ẽ hãtxa nĩkakĩ ikũwaĩbuwẽ taea shanẽ ibuhairai ẽ ana taekainimaki. Ẽ yusinã merabenanikabu inũ ẽ shanẽ ibu beshmasbũ ea benai beshũ enabu Caldéia nawabu dasibi ẽ ana hatu yunukubaĩshanũ ea ana nĩkakĩ taewabainimabuki, ha dukũ ẽ kushipani keskama ana kushipa binuawẽ yunukubainirã.

³⁷ Ibubis kẽkubainaibu hatu nese wakĩ pepa wamis inũ txanima akubaĩmiswẽ taeshũ nai anu shanẽ ibu Deus duawakĩ hawẽ hãtxa nĩkakĩ ea ẽ Nabucodonosorĩ pepawakĩ shabakabi ẽ kẽwãkubainaii”, hatu wani unanuma hiwekũkaini mawanikiaki.