Apocalipse 19 - Kaxinawá Bíblia (BR)

¹ hanushũ ẽ nĩkaya nai anua tsuara mirimabũ yuikĩ: “Aleluya! Nukũ mekenika Deus nũ kẽwaiĩ. Duapa kuxipahairatũ nũ hawenabu nuku mekepakeshanikiki.

² Ha inũ, yura dasibibu unãshũ kaneama kupimiswẽ taeshũ mae ewapa aĩbu hininipa keskatũ yurabu dasibi txakabuwamakubainai ma kupikiki. Ha inũ, aĩbu hininipa keskatũ Deusũ tsumabu tenãkubaĩmiswẽ taeshũ Deusũ hawẽ mae ewapa haki sinata paepakĩ yamawaikiki”, itã

³ hanushũ habũ ana yuikĩ: “Aleluya! Deus pepahairaki. Ha mae ewapa kuĩ inai hushu puepakeshanikiki”, ikaibũ

⁴ haskaibũ ha 24 mekenikabu inũ ha hiweabu dabe inũ dabetũ Deus haki tsautiki tsauwa namã dãti iki maiki beti ishũ kẽwãkĩ yuikĩ: “Hau haskanũwẽ. Aleluya! Txanima Epa Deus pepahairaki”, ikaibũ

⁵ ẽ nĩkaya ha Deus tsauwa namanua hui betsa tashniriakĩ yuikĩ: “Mã Deusũ tsumabuũ, mai hirabi anua betsabu mã shanẽ ibubu inũ betsabu mã shanẽ ibubumã Deusũ kuxipaki mesekĩ duawai pepakĩ kẽwãkubaĩkãwẽ”, ikaibu uĩkĩ nĩkatã ẽ matu keneshunaii.

Deusũ txashuwã bakebetã ikũwaĩbũ habetã pishãkanikiaki, na hãtxarã

⁶ Hanushũ ẽ nĩkaya yura mirimabu hãtxai hene diri ikai keskawẽ inũ tĩ ikaĩkainai keskawẽ yuikĩ: “Aleluya! Nukũ Epa Deus kuxipahaira dasibi binu keyua ha bestitũ nuku dasibi mekei ma shanẽ ibui taeikiki. Pehairaki. Kẽwanãkãwẽ.

⁷ Aĩbu hawẽ bene huaibe hiwenũ, iwanã, hawẽ hamapai pewakĩ akawai Jesusunabu habe hiwekatsis ikanikiki. Ha haskarã, Jesus Cristo txashuwã bakẽ hawenabu niti akama habe hiwemashanikiki. Haskakẽ benimai xinã txãkaĩ tse ikĩ Deus kẽwanãkãwẽ.

⁸ Tima tari hushupa txashakapa pehaira ha Deusunabu meribi habũ hatũ xinãwẽ kaneama txibã pewamisbũ hau sawenũbũ, iwanã, hatũ hiwea meribi unãmati ha tari ma hatu inã saweabuki”, ikaibu ẽ nĩkashuki.

⁹ Hanushũ nai tsumã ana ea yuikĩ: “Deusũ hãtxa kayabi ẽ mia yuiai nĩkatã keneriwe, eskarã. Txashuwã bakẽ hawenabu nai anu habe hiwemanũ, iwanã, hatu itxawashũ habetã pirã, benimatxakayamashãkanikiki”, ea haska yuiaya

¹⁰ kẽwãnũ ika hawẽ tae namã ẽ dãti itanaya ea nemakĩ yuikĩ: “Eki haskayamawe. Mia inũ Deusunabu betsabũ Jesus Cristo txibãkĩ hawẽ hãtxa yusĩmisbu keska eãri Deusũ hãtxa bunika ẽ hawẽ tsumariki. Haskakẽ ea kẽwãma Deus besti kẽwãwẽ”, ea washuki. Haskarã, tsuabura Jesuskiri kakape Yushĩ Pepatũ shabakabi hatu xinãmaya habu yusĩnãbu hakiri txanikĩ banabimabaũmisbuki.

Cavalo hushupaki katsaũtã txakabubu kupi kanikiaki, na hãtxarã

¹¹ Hanua nai bepemanaya shanẽ ibu hawẽ kena Txanima Hãtxa Kaneisma cavalo hushupaki katsauwa ẽ uĩshu matu yuinũ nĩkakãwẽ. Shanẽ Ibu pepatũ yurabu unãti wai hatube detenamẽnũ ika ikairã,

¹² hawẽ beru txasharã, txi here keskaki. Ha inũ, shanẽ ibu kuxipahairaiwẽ taea Shanẽ Ibũ maiti itxapa maia hayaki. Ha inũ, hawẽ hunea kena ha bestitũ unaĩ ha kena haska haki neaki.

¹³ Ha inũ, hawẽ tari sawearã, himiki pukua saweaki. Ha inũ, hawẽ kena betsarã, Deusũ Hãtxa Kayabiki.

¹⁴ Ha inũ, hawẽ soldadobu nai anua tima tari hushupa pehaira hawa detsisma saweari cavalo hushupabuki katsaumea hatxũ kaĩbaĩkĩ hatũ Shanẽ Ibu txibãbaĩkanikiki.

¹⁵ Ha Shanẽ Ibu kairã, shanẽ ibu yununika mane kuxatia inũ hawẽ hashpa anu nupe txaipa kenuhaira kaĩa tukũwã hawẽ habũ Deus nĩkaisbuma mai hirabi anuabube hatube detenamei kairã, haskawẽ taea ha Shanẽ Ibu kayabistũ hamebi ha hatuki Deus sinatai hatu uĩmakĩ haska uva vinho tsinikĩ pema pema amisbu keska wakĩ Deus kuxipa binu keyuatũ hawẽ pubẽ pae hatu memai kaikiki.

¹⁶ Ha inũ, hawẽ kena mestenepa Dasibi Shanẽ Ibubu Inũ Dasibi Yununikabu Binukĩ keyuaki, ika hawẽ tari txaipaki inũ hawẽ kixi kateki ha dabeki hawẽ kena neaki.

Jesuski habu haki sinataibu hatu maemanikiaki, na hãtxarã

¹⁷ Hanushũ ẽ uĩayã nai tsuma betsa bari merã nishũ dasibi habu peiyabũ pisi pimisbu nai natukanu nuyabaũmisbu hatu kenakĩ hui kuxipawẽ yuikĩ: “Nenu bei neri itxai bekãwẽ, hau Deusũ matu pimanũnã.

¹⁸ Habube Shanẽ Ibu detenamekĩ maema habũ namirã, shanẽ ibubũ nami inũ, soldadobu habu shanẽ ibubũ nami inũ, hamapai huni kuxipabũ nami inũ, cavalo nami inũ, dasibi cavaloki katsaumeabũ nami inũ, hunibũ tsumabũ nami inũ, tsuã tsumabumã nami inũ, hamapai yura betsa betsapabũ Deus nĩkaisbuma Jesusũ hatu maema habũ nami pitxakayamakãshunã”, ikai ẽ nĩkashuki.

¹⁹ Hanushũ ana ẽ uĩayã yuinaka mese atimapahaira inũ, shanẽ ibubu mai hirabi anua inũ, hatũ soldadobu itxa ha cavalo hushupaki katsaumea hawẽ soldadobuya hatube detenamẽnũ ika itxa maniabũ

²⁰ ha parã hãtxa yuishunikatũ yuinaka mesẽ besuuri atimaska betsa betsapa tsuã atiruma wakĩ habu yuinaka mese atimapahairatũ kena habu hẽ iyamama inũ hawẽ dami kẽwãmisbu hatu parãmiswẽ taeshũ parã hãtxa yuishunika Shanẽ Ibu binuatũ tsumabũ atxikĩ yuinaka mese atimapahaira habe atxitã nĩkaibu hanu iã enxofre paxinipa menui here hi hi ikai anu ha dabe hatu putabu

²¹ cavaloki katsaumeshũ hawẽ nupe txaipa hawẽ hashpanu tukuãwẽ dasibi yura betsabu Jesusũ hatu detekĩ keyukẽ peiyabũ dasibibu habũ nami pi shuku dakakĩ yani waibu ẽ uĩshuki.