Amós 3 - Kaxinawá Bíblia (BR)

Deusũ hãtxa yuishunikabũ dayarã, eskakiaki, na hãtxarã

¹ Matũ shenipabu Egito anua Senhor Deusũ hatu tashnimabiranishũ mã Israelbu matu yuiairã, nĩkakãwẽ:

² “Mai hirabi anu nawa shukuabu tibi hiwebiabaunabũ habukiri shinãma matu besti katukĩ enabu ẽ matu waniwẽ taeshũ txakabu betsa betsapa mã akubaĩmisbuwẽ taeshũ ha shinãkĩ ẽ matu kupishanaii”, akĩ matu yuikiki.

³ Habias shinã wãtã yura dabe ketashamea maputirubuki, pepa besti akubainirã.

⁴ Inu betsa leãonẽ ni meranua yuinaka betsa atxitã benimai hi hi ikai txaihairashũ nĩkatirubuki. Inu betsa leãonẽ hawẽ bakẽ hawara yuinaka atxitã hawẽ kini anu bushũ piaya yuinaka betsã dũkebainaya haki yaushi tekerẽ tekerẽ imisbuki.

⁵ Huni betsã manaũri hisĩ biruãkĩ pũteawẽ taea uiãma isa hui haki irutã yabukui mai anu tĩ imisbuki, atxiarã. Hamẽ birũ betsa wakĩ hanu parãti piti mãtxĩbaunawẽ taea yuinaka hushũ ha piti pikĩ ha hi dishkia bekumanakĩ ha yuinaka dispiwẽ teneshmiski.

⁶ Hamẽ maewã anu mese huaya hatu unãmakĩ tsuãra trombeta txã txã akaiwẽ taea yurabũ nĩkai datemisbuki. Ha maewã anu haska kainã, Senhor Deusũ ma hanu txakabu hatu yunua haska besti kaĩkũkaĩmiski.

⁷ Senhor Deusũ tsumabu hawẽ hãtxa yuishunikabu hawẽ shinã bebũkiri habu dukũ banabimariama Senhor Deusũ hawa aismaki, yura betsabu kupikinã.

⁸ Txaimakea inu leão hui kushipawẽ hi hi ikaya tsuã nĩkai datetirubumamẽ? Dasibi datetirubuki. Hamẽ Deusũ hawẽ tsuma ma yunuawẽ taearã, tsuã hãtxashũtirumamẽ? Tsuãra nĩkatã shabakabi hatu banabimatiruki.

Maewã Samaria Deusũ kupishanikiaki, na hãtxarã

⁹ Ma Deusũ matu yunuawẽ taearã, hawẽ hãtxa hatu yuikubaĩkãwẽ: “Maewã Asdode anu shanẽ ibubũ hiwe hawẽrua tibi inũ Egito nawabũ mai pakea anu shanẽ ibubũ hiwe hawẽrua tibi anu bua hatuki txanitãkãwẽ: ‘Hatũ txakabuwẽ taea ibubis hatunabu nuitapa wakĩ itxakawamisbu hatu uinũ ika Samaria mati matipa anu bekãwẽ’, aki hatuki txanitãkãwẽ, habu hiwe txakaibu inũ detenamei betsa betsapaibu hau hatu uĩ benũbunã”, hatu watã

¹⁰ Senhor Deusũ hawẽ hãtxa ana yuikĩ mestẽwãkĩ: “Enabu Samaria anu hiweaburã, hawa pepa unãkĩ akabumahairaki. Hatu detekĩ hatũ mabu bikĩ yumetsutãshũ hatũ shanẽ ibubũ hiwe hawẽrua betsa betsapa tibi anu arukubaĩmisbuki.”

¹¹ Haskamisbuwẽ taeshũ Senhor Deusũ hatu yuikĩ: “Matuki sinataibũ matũ mai pakea kebaũshãkanikiki. Matũ maewã Samaria mishki kenebaunibu kushipabiakẽ berãkĩ keyutã matũ hiwe hawẽrua betsa betsapa anua matũ mabu dasibi mã arukubaĩmis biãtã matu keyu buãshãkanikiki”, itã,

¹² eska ana Senhor Deusũ yuikĩ: “Inu betsa leão hushũ txashuwã atxiwãshũ piaya txashuwã mekenikã txibãbaĩ pikĩ keyuriama hawẽ mestẽtiwẽ kusha kusha akĩ leão mepãmakĩ hawẽ tae dabemẽkaĩ, hawẽ pabĩki debumẽkaĩ, hawẽ pabu hawara tesheista mebĩtiru keska Damasco anua haki bashti iti hawẽrua beabu mabuyabu haki bashti imisbu eskarabes Israelĩ enabu Samaria anu hiweabube pashashãkanikiki”, itã,

¹³ Mekenika Deus kushipahaira dasibi binua Senhor Deusũ hawẽ hãtxa txanima mestẽwãkĩ yuikĩ: “Matubũ ẽ hãtxa nĩkatã Jacó enabu txakabumisbukiri shabakabi hatuki txanikubaĩshãkãwẽ.

¹⁴ Israelĩ enabũ txakabu betsa betsapa wakubaĩmisbu ha shabatiã ẽ hatu unãti waya Betel anu ha txi tapu hakishũ yushibu betsa kẽwãmisbu ha dabe inũ dabe hawẽ matxãkã meshteabu mai anu tĩ ikaya ẽ hatu yunua yamawashãkanikiki.

¹⁵ Shanẽ ibubũ hiwe hawẽrua betsa betsapa hatu txakabu wamakĩ ha elefante hawẽ mashũ makushpi txaipa hushupa nãtakea itxapa beshũ hatu inãbu ha makushpi hiwe wakĩ hawẽrua wanibu txakabuwamakĩ ha hiwe anu shanẽ ibubu matsitiã hanu hiwemisbu inũ bariãtiã hanu hiwemisbu dasibi ẽ hatu yamawamashanaii”, akĩ Senhor Deusũ hawẽ hãtxa txanima mestẽwaniki.