Amós 2 - Kaxinawá Bíblia (BR)

^1-2 Hanushũ Senhor Deusũ ana betsakiri yuikĩ: “Moabe nawabũ txakabu betsa betsapa akubainibuwẽ taeshũ hakimama hatu kupikĩ ẽ heneama ikũkaĩshanaii. Edomnẽ enabu shanẽ ibuhaira mawa maiwabiaimabũ itxakawakĩ Moabe nawabũ hawẽ shau betsetã kuakĩ mapu besti wanibuwẽ taeshũ Moabe nawabũ mai pakea anu mae tibi hatu kua keyumakubaũkĩ hatũ shanẽ ibũ maewã Queriote anu shanẽ ibubũ hiwe hawẽrua tibi txiwẽ ẽ hatu yamawamashanaii. Nawa betsabube hatu detenamemakĩ trombeta ẽ hatu txã txã amaya detenamei bis bis ikubainaibũ Moabe nawabu mawashãkanikiki.

³ Moabe nawa shanẽ ibuhaira hawẽ shanẽ ibu beshmasbube hatu atximatã eã ẽ hatu tenãmariashanaii”, ikĩ Senhor Deusũ yuiniki.

^4-5 Hanushũ Senhor Deusũ hawenabu Judákiri yuikĩ: “Judá enabũ mai pakea anu hiweabũ txakabu betsa betsapa akubainibuwẽ taeshũ hakimama hatu kupikĩ ẽ heneama ishanaii. Ẽ yunuti hãtxa inũ ẽ nemati hãtxa nĩkakĩ txibãkatsi ikabuma ea ẽ Senhor Deusũ ẽ yusĩti hãtxa danãkĩ habias yushibubu dami hatũ ibubũ kẽwãpaunibu na habias yushibubu kẽwãriakubainaibuwẽ taeshũ Judá enabũ mai pakea anu mae tibi kuabaũkĩ maewã Jerusalém anu shanẽ ibubũ hiwe hawẽrua betsa betsapa tibi txiwẽ ẽ hatu yamawamashanaii”, itã,

Israelĩ enabu pashkanibu 9 shukuabu nortekiri hiweabu Senhor Deusũ hatu kupishanikiaki, na hãtxarã

⁶ hanushũ Senhor Deusũ hawenabu Israelkiriri yuikĩ: “Israelĩ enabu nortekiri hiweabũ txakabu betsa betsapa akubainaibuwẽ taeshũ hatu kupikĩ ẽ heneama iriashanaii, habũ hatu eska wakubainaibuwẽ taeshunã. Israelbũ hawenabu pe hiwebiabũ peiwẽ taeshũ hatu inãkĩ nuitapawamisbuki. Ha inũ, betsa nuitapai hiwebiakẽ hatuwẽ taeshũ hatũ bitxi tae bimisbuki, dayaru escravo hau hatu iyutanũbunã.

⁷ Haska inũ, ẽ yunuti pepa txibãma habũ kanekĩ huni betsabu nuitapai keĩsbuma babuwakĩ hatu itxakawamisbuki. Ẽ kena pepa meribikiri ea hatu yuãmakĩ hunĩ hawẽ bakebetã habias aĩbu txutamisbuki.

⁸ Tsuãra matu diria hawẽ tari biãyuimashũ ha tari bekãtã haki dakashũ yushibubu dami kẽwãti piti mãtxĩtã hatubetã mã pimiski. Ha dikabi tsuã hawa txakabuwakĩ kaneamabiakẽ parãkĩ hamẽ itxakawakĩ hawẽ pei pakamatã ha peiwẽ uva vinho bishũ hatũ mekenika yushĩ kẽwãti hiwe anushũ hatubetã ha vinho mã akubaĩmisbuki.

^9-10 Mã txakabubiakẽ eanã, Egito anua matũ shenipabu hatu tashnimabirãkĩ hatu bai bepẽshũbirãkinã, Amorreu nawabũ mai pakea anu hatu ibuwamanũ, iwanã, hanu tsua hiweabuma anu 40 ano unãshubira ẽ hatu imatãbauniki. Ha Amorreu nawabu huni keyatapabu hi kushipa keskabiabũ dasibi yamawakĩ ẽ hatu keyushuniki.

¹¹ Israelĩ enabuũ, ẽ matu parãma inũ, mã ea parãtirumaki. Matunabu anua ẽ hãtxa yuishunika ẽ hatu katukubaĩmis inũ huni meribi Nazireu hawẽ bu mashtetima inũ hamapai sharabu buspuai atirubumari katuriakĩ ẽ hatu yunukubaĩmiski. Haska ẽ hãtxa txanima kayabiwẽ ẽ matu mestẽwaniki”, itã

¹² “Ẽ hatu haska wabianikẽ matubũ hatu itxakawakĩ huni meribi Nazireũ vinho akatsi ikabumabiakẽ mã hatu amakubaĩmiski. Ha inũ, ẽ hãtxa yuishunikabu ẽ kena kushipawẽ hãtxaibu hatu nĩkakatsi ikama mã hatu nemakubaĩmiski, hau ekiri hãtxayamanũbunã.

¹³ Eã matu kupikĩ ina awã tarãbaĩti shekiwã trigo matahairawashũ bumakĩ tarãbaĩkĩ mai purekĩ mishpu wamabaĩmis keska wakĩ habũ matu txai iyuaibu hanu mã paikainai ha mai ẽ matu pure pure amakubaĩshanaii.

¹⁴ Hakia kushitxakayamabiakaĩmis haskatã binubaĩ pashatirubuma ishãkanikiki. Matũ detenamenika kushipahairabiabu hatũ kushipa benui babushãkanikiki. Mẽtsisipabiamis haskatã ibubis meketiruma ishãkanikiki.

¹⁵ Hawẽ piaki txiti ika kushipabiamis haskatã ibubis meketirubuma ishanikiki. Kai hawaira nia nia ibiabaĩmisbu inũ, cavaloki katsaumebaĩmisbu haskatã ibubis pashai meketirubuma iriashãkanikiki.

¹⁶ Ha shaba haskaibutianã, matũ detenamenika mẽtsisipahairaburi pashanũ ika hatũ detenameti mabu dasibi pekatã urẽkĩ sa abaĩshãkanikiki, pashatanũ ikarã”, haska hãtxa hatu yuikĩ Senhor Deusũ hawẽ hãtxa txanima mestẽwanikiaki.