1 Coríntios 2 - Kaxinawá Bíblia (BR)

Jesus Cristo cruzkia nuku mawashuni kakape Paulõ hatu yusĩkubainikiaki, na hãtxarã

¹ Ẽ betsabu inũ ẽ puibuũ, matũ mae ewapa Corinto anu hikitã hãtxa hawẽrua kemu paewẽ matu yusĩ keãma Deusũ kakape uatiã hunebianikẽ shabakabi hakiri besti ẽ matu yusĩkubainiki.

² Jesus Cristo cruzkia mawakĩ hawara nuku ashuni mã nĩkakĩ ikũwanũbũ ana hamapai miyui tibi betsa betsapakiri xinãkatsi ikama Jesus Cristo bestikiri has xinãkĩ yusĩ ẽ matube hiwekũkainiki.

³ Hanua ẽ Jesusũ kuxipaya matu anu kaimashũ haska bebũkiri kẽkĩ kanekatsi ikama babua dateyabi huĩti shurubiashũ ẽ matu yusĩyukubainiki.

^4-5 Hanua yusĩnã betsã hãtxa hawẽrua yuiaya ha nĩkatã hatũ hãtxa abukĩ itxapabũ hawaira txibãtirubuki. Hakia ea matu anu kashũ yusĩ hãtxairã, unãnepa hãtxamis keskawẽ ẽ matu yusĩama iniki. Hamẽ haskama Deusũ Yushĩ Pepa inũ Deusũ kuxipa bestiwẽ ea amakĩ matu merabewamaya haska yurabu unãnepakĩ yusĩmisbu keskamawẽ ẽ matu ikũwãmani mã unaiĩ.

Deusũ hawẽ xinã huneni hawẽ Yushĩ Pepatũ nuku inã hawẽ nuku unãmanikiaki, na hãtxarã

⁶ Haskakẽ mã unãnepabũ Jesus ikũwãtã ma pe tapĩkĩ mã mestẽwaĩ ha unãnepa hãtxawẽ haska wakĩ nũ matu haska yusĩaĩnã, hawa txakabumaki. Hakia na mai anua haska shanẽ ibukĩ unãnepabũ ibubis hatũ xinãnẽ amisbu keskama inũ habu shanẽ ibu kuxipakĩ yunubaũmisbu keska haska kuxipa xinãwẽ nũ matu yusĩsmaki. Hatũ kuxipa inũ hatũ unãnepa keyuaya nukuna Deusũ nuku inãkubainai keyuismaki.

⁷ Haska mai damiwariama Deusũ hawẽ unãnepati hawẽ xinã huneyunishũ nuku matu yusĩmairã, eskaki, nĩkakãwẽ. Txanima Deusũ hawẽ bakewẽ taeshũ nuku hawenabu wakatsi nukuki tana yubakaniki. Haskawẽ taea nukuburi hatuki dasitã nũ hatu keskari ipakeshanaii, hawẽrua kuxipa txashakapa buirã.

⁸ Haskakiri shanẽ ibubu Deusũ hatu unãmarã, haska xinãkĩ nukũ Shanẽ Ibu mastama ikeanibuki. Hakia hawa shabakabi xinãbumawẽ taeshũ nukũ Shanẽ Ibu kuxipa duapa cruzki nuku mastashũkĩ xinãma kanekĩ itsa wanibuki.

⁹ Haskakiri Deusũ hãtxa yuishunika Isaíasĩ Deusunabu keneshũkĩ: “Hawara tsuã uĩsma inũ, hawara tsuã nĩkaisma inũ, hawara tsuã xinãtiruma bebũkiri habu Deusũ abukĩ ma hatu pewashuniki”, aniki.

¹⁰ Nukũ Epa Deusũ nuku haska wanũbariai nũ tapĩtirubumabiakẽ hawẽ Yushĩ Pepatũ nuku tapĩmaniki. Ha hawẽ Yushĩ Pepatunã, dasibi unãkĩ Deusũ xinaĩ yubakaniri unã keyuriaikiki.

¹¹ Yura betsã xinã huĩti anuarã, tsuã nũ hawa unãtirubumaki. Hakia unãkinã, hamebi hawẽ yushinĩ unaĩkiki. Haska keskari Deusũ Yushinĩ Deus anua unã keyuriaikiki.

¹² Yurabũ habũ ikũwãbumã yushĩ nũ biamaki. Hakia Deusũ hawẽ Yushĩ nuku inãni hatũ Deus anua hawẽ duapa nuku inãkĩ nuku tapĩmaikiki.

¹³ Nukũmebi hãtxa tapĩ unãnepanishũ nũ matu akama hakia nuku hãtxairã, haska Deusũ Yushĩ Pepatũ nuku yusĩmiswẽ nũ matu amiski, haska matu meshtamakinã. Deusũ Yushĩ Pepatũ xinã inũ hawẽ hãtxa besti nũ matu yusĩkubainaii.

¹⁴ Haskawẽ taea habu Yushĩ Kayabi hayamarã, Deusũ Yushĩ Pepatũ Jesuskiri txaniai danãmisbuki, tatimakĩ hakiri xinãkatsi ikamarã. Haska inũ, haska Deusũ Yushĩ Pepatũ abuai hatũ xinã unãti wai nĩkatirubumariki.

¹⁵ Tsuabura Yushĩ Pepa hayatunã, txakabu inũ pepa unãtirubuki. Hamẽ ha Yushĩ hayamatunã, Yushĩ Pepa hayabu unãti watirubumaki, txakabu inũ pepa wairã.

¹⁶ Na haskakiri Deusũ hãtxa yuishunika Isaíasĩ yuikĩ: “Deusũ xinã tsuã unãmahairaki. Ha inũ, tsuã Deus yusĩtirumariki”, abianikẽ nukuburã, nũ ma Cristõ xinã hayakẽ hawẽ Yushĩ Pepatũ nuku yusĩkubainikiki.