1 Coríntios 1 - Kaxinawá Bíblia (BR)

Paulõ hatukiri xinãnikiaki, na hãtxarã

¹ Jesus Cristõ kuxipayawakĩ Deusũ ea xinãkĩ ea katunikẽ Cristowẽ taea nukũ betsa Sóstenesbetã ẽ Paulõ ẽ matu kene bumakĩ taewaii.

² Deusũ katua Corinto mae ewapanu mã hiweabu Jesus Cristo matu mawashũkĩ meribi wakĩ matu pepawaniwẽ taeshũ Deusũ haturi katua nukũ Shanẽ Ibu Jesus Cristo habũ txibãmisbu dasibibubetã mã ikũwaĩbu itxamisbu tibi anu ẽ matu kene bumai uĩbaũshãkãwẽ.

³ Nukũ Epa Deus inũ nukũ Shanẽ Ibu Jesus Cristõ hau matu unãnuma hiwemakĩ pewakĩ duawakubainũbũwẽ.

Hawara Deusũ hatu ashũmiswẽ taeshũ Paulõ Deus kẽwãkubainikiaki, na hãtxarã

⁴ Mã Jesus Cristo txibaĩbuwẽ taeshũ Deusũ matu pepawakĩ duawaya ẽ Epa Deusbe hãtxakĩ ẽ matuwẽ kẽwãkubaĩmiski.

^5-6 Ha inũ, Cristokiri nũ matu yusĩtani mã ma ikũwãkĩ txibãkubainaya Deusũ shabakabi matu unãmakĩ pe hãtxamakĩ hakiri matu tapĩmakĩ hawẽ pepawẽ Deusũ matu duahairawakubainikiki.

⁷ Haskakẽ mã Deus ikũwaĩbũ hamapai hawẽ aka tibi Deusũ matu inãkubainai hayatã mã ashũkubaĩmiswẽ taea nukũ Shanẽ Ibu Jesus Cristo naiuria ana butuai mã uĩshanai mã manakubainaii.

⁸ Haskawẽ taeshũ Deusũ hawa heneama matu kuxipa wakubaini Cristo ana huaya hawa txakabu matukiri yuitirubuma ishãkanikiki.

⁹ Ha inũ, Deusũ bake nukũ Shanẽ Ibu Jesus Cristobe mã hiwekubaĩshanũbũ Deusũ matu katunitũ duawakĩ hawa matu hakimakĩ henebainama ishanikiki, haska yubakani amis betsa wakĩ kaneismawẽ taearã.

Ikũwaĩ xinã tibiwai pashkatimakiaki, na hãtxarã

¹⁰ Ẽ betsabu inũ ẽ puibuũ, nukũ Shanẽ Ibu Jesus Cristõ kuxipawẽ ẽ matu yunuai nĩkakãwẽ. Matũmebi pashkanameama xinã betsa betsapa wama unãnuma Jesus ikũwaĩbube hiwekubaĩkãwẽ.

¹¹ Mã xinã txakai ha ikĩ ana unãnuma hiweama mã xinãnãnaĩ pashkanameaibu Cloẽ enabũ ea banabimaxinawẽ taeshũ ẽ betsabuũ, ẽ matu yuiaii.

¹² Matu tibikiri ea yuikĩ: “Nukũ betsabu ha irabekĩ yuikĩ: ‘Eãnã, Paulõ nuku yusĩmis besti ikũwãkĩ ẽ txibãkubainaii’, ikaya betsari: ‘Eãnã, Apolõ nuku yusĩmis besti ikũwãkĩ ẽ txibãkubainaii’, ikaya betsari: ‘Eãnã, Pedrõ nuku yusĩmis besti ikũwãkĩ ẽ txibãkubainaii’, ikaya betsari: ‘Eãnã, Cristõ nuku yusĩni besti ikũwãkĩ ẽ txibãkubainaii’, ikĩ haska yuikubaĩkanikiki”, ea waxinabuki.

¹³ Ea haska wabu, Habaa! Cristorã, nũ haska watã pashkatirubumẽ? Nũ haska washũ pashkatirubumahairaki. Mã ha ikũwanũbũ cruzkia ea Paulo ẽ matu mawashunama iniki. Ha inũ, ẽ Paulo mã ea ikũwaĩwẽ taeshũ ẽ kuxipawẽ matu naximabumariki.

¹⁴ Haskakẽ huni betsaburi ẽ naximamawẽ taeshũ tsuabũra yuikĩ: “Paulõ ea naximani hawara Paulõ besti yusĩaĩ ẽ txibaiĩ”, itirubumawẽ taeshũ Deus ẽ kẽwaiĩ. Eska unãkĩ matũ mae ewapa Corinto anushũ Crispo inũ Gaio besti ẽ naximaniki.

¹⁵ Haskawẽ taeshũ: “Paulo ẽ txibãyã hawẽ kuxipawẽ ea naximaimaki”, ikĩ tsuã yuitirubumaki.

¹⁶ Hamẽ betsarã, ẽ hakimarã, Estéfanasbe hiweabu ẽ hatu naximarianiki. Yura betsa ẽ naximani ẽ ana xinãtirumaki.

¹⁷ Hamẽ ea yunukĩ: “Ea ikũwãtã hatũ txakabu henekatsis ikaibu naximakubaĩwẽ”, iwanã, Cristõ ea yunuama iniki. Hakia ea yunukĩ: “Ekiri kakape besti datã akĩ hatu yusĩkubaĩwẽ”, akĩ ea nitxĩniki. Matu yusĩ kashũ yusĩnã betsabu hãtxa hawẽrua besti hãtxamisbu keskakĩ eari matu anu kashũ Cristo kẽwãma mã ea kẽwãnũbũ ẽ matu yusĩnirã, hamẽ Cristo cruzkia nukuwẽ taea mawanirã, hawẽ kuxipa hakimawakĩ hamẽ ẽ matu yusĩkeaniki.

Cristorã, yurabũ hawẽ unãnepati inũ hawẽ kuxipatirubukiaki, na hãtxarã

¹⁸ Yurabũ txakabu buanũ ika cruz anua Cristo mawatã ana besteni ikũwaĩ nũ hawenabuwẽ taeshũ nũ habu Deusũ hawẽ kuxipawẽ nuku mekeshanai nũ ma unãyã, haska xinãma yura betsabũ yuikĩ: “Nuku tatima yuimisburã!”, habũ Jesus haibuwakatsi ikama nukũ yusĩa danãmisbuwẽ taea habu mawa kayabi teneshãkanikiki.

¹⁹ Haskakẽ ha yurabukiri yuikĩ hawẽ hãtxa yuishunika Isaías Deusũ yuikĩ: “Habu unãnepabu unaĩsmapa keska wakĩ, dasibi tapĩkĩ kaneisbuma unãriama keskabu ẽ hatu washanaii, hawarawẽ unãnepamis hawauma keska wakinã. Manayuwe”, aka nuku keneshuniki.

²⁰ Haska inũ, yura betsabu unãnepabiabũ Deusũ hatu binumiski. Betsabũri Deusũ nemati inũ hawẽ yunuti yusĩnanãbiamisbũ Deusũ hatu binuriamiski. Betsaburi yura betsabe ha irabekĩ binubiamiskẽ Deusũ unãkĩ dasibibu binumiski. Haskakẽ Deusũ dasibi unãhairakĩ haska yurabũ xinãtiru binukĩ unaĩsmapabu keska hatu wamiski.

²¹ Haska inũ, yura betsa betsapa unãnepabiakĩ Deus unãbumakẽ nukũ Epa Deusũ dasibi unãhairakĩ kakape nuku hatu yusĩmaya itxapabũ danãkĩ: “Tatima ikanikiki!”, ibiaibũ nũ matu yusĩayã Cristo mã ikũwaĩbu hawenabu Deusũ matu waniki, niti akamarã. Haskakĩ mã xinã betsa watã ikũwãyã matuwẽ Deus benimakũkainikiki.

^22-23 Haska inũ, dami itimaska besti judeubũ uĩtã besti ikũwãtirubuwẽ taeshũ Messias Cristo yumetsu keska mawakĩ hatũ nukũ txakabu buani nũ yusĩmis danãkĩ habũ xinãkĩ: “Haskai e iskirã nukũ Shanẽ Ibu hua mawakeanamaki”, akĩ yuimisbuki. Ha inũ, ikũwãriama judeubumã dasibi unãkatsis imisbuwẽ taeshũ habũ xinãkĩ: “Deusũ bake cruz anua mawaxina ana besteni tatimabũ besti ikũwãtirubuki”, iwanã, yuimisbuki. Haskabiaibũ nukũ txakabu buakĩ hawenabu nuku wai cruz anu yumetsu imis keskai Cristo nuku mawashunikiri nũ yusĩkubainaii, hatuki e iki dakeamarã.

²⁴ Haskakẽ na kakape Messias Cristokiri betsabũ danãbiaibũ nũ judeubu inũ nũ judeubuma Deusũ nuku katuniwẽ taeshũ Deusũ hawẽ kuxipa Cristo yunukĩ habia keskari wakĩ dasibi unãhairamani ha besti xinãkĩ nũ ikũwaiĩ.

²⁵ Deusũ haska wamis nĩkama betsabũ kanekĩ yuikĩ: “Deusrã, tatimaki, unaĩsmaparã, kuxipa hayamarã”, amisbuki. Hakia dasibi unãhairakĩ Deusũ yurabu dasibi binumiski. Hawara yurabũ ikũwãma danãmisburã, Deusũ hawẽ kuxipa nuku uĩmãmiski, nũ babubiakenã. Haskai Deus kuxipahairakĩ yurabũ kuxipa binumiski.

Tsuabura Deusũ katuni ibubis kẽtirubumakiaki, na hãtxarã

²⁶ Ẽ betsabu inũ ẽ puibuũ, Deusũ matu katukĩ eska matu wakubaĩmisrã, nĩkakãwẽ. Unanepabu eskarabes besti katukĩ kuxipaburi eskarabes besti katukĩ shanẽ ibuburi eskarabes besti katuriakĩ yununikabũ enabu eskarabesri matu katuakeakeniki, haska yurabũ matu uĩkĩ kẽwãmis katuamarã. Haska wakĩ Deusũ nuku katumis hakimama xinãkubaĩkãwẽ.

^27-29 Haskakẽ tsuabura: “Ẽ huni pepawẽ taeshũ Deusũ ea katuniki”, iwanã, xinãyamakubaĩkãwẽ. Unanepabu hawauma wakĩ dakewanũ, iwanã, Deusũ ha matu tatima waibu matu katumiski. Kuxipabu hawauma wakĩ dakewanũ, iwanã, tsuabura babubu habu hakiri petxitã yuãkĩ: “Mitanumabuki”, hatuki imisbu Deusũ matu katukubaĩriaikiki. Tsuabura yurabũ matu danãkĩ pe xinaĩsbumarã, Deusũ matu katukubaĩmiski. Dasibibu binunũ, iwanã, tsuabura yurabu haki petxitã xinaĩsbumarã, Deusũ matu katuriamiski. Haskakẽ nukũmebi nũ pepaumabiakẽ Deusũ matu katuniwẽ taea nukũ pepakiri Deus yui tsua hamebi hawa kẽtirubumaki.

³⁰ Haska wakĩ matu katukĩ Jesuski matu dasiwakĩ Deusũ hamebi matu katuniki. Haskakẽ Jesus Cristõnã, hawẽ xinãwẽ nuku unãnepa wamiski. Ha inũ, habiatũri nukũ txakabu buakĩ Deus nuku daewashũmiski. Ha dikabi nuku meribi wakubaĩmiski. Ha inũ, habiatũri nukũ txakabu buatã Satanás anua nuku mebikinaniki.

³¹ Nuku haska wanũbariaikiri bebũkiri Jeremiasĩ keneni nĩkairakãwẽ: “Tsuabũra kẽwaĩ hamebi keãma nukũ Yavé Deus besti hau kẽwãkubainũbũwẽ”, iniki.