រត់គេចពីការល្បួង1 កូនរបស់ខ្ញុំអើយ ចូរប្រុងស្ដាប់ប្រាជ្ញារបស់ខ្ញុំ ចូរផ្ទៀងត្រចៀករបស់អ្នកនឹងការយល់ដឹងរបស់ខ្ញុំចុះ 2 ដើម្បីឲ្យអ្នកបានរក្សាសមត្ថភាពពិចារណា និងឲ្យបបូរមាត់របស់អ្នកបានការពារចំណេះដឹង។ 3 ថ្វីត្បិតតែបបូរមាត់របស់ស្ត្រីផិតក្បត់ស្រក់ទឹកឃ្មុំ ហើយមាត់របស់នាងរលូនជាងប្រេងក៏ដោយ 4 ប៉ុន្តែចុងបញ្ចប់របស់នាង គឺល្វីងជូរចត់ដូចស្លែង ហើយមុតដូចដាវមុខពីរ។ 5 ជើងរបស់នាងចុះទៅឯសេចក្ដីស្លាប់ ជំហានរបស់នាងឈានទៅស្ថានមនុស្សស្លាប់។ 6 នាងមិនស្ទង់មើលផ្លូវនៃជីវិតឡើយ គន្លងរបស់នាងតែងតែប្រែប្រួលឥតនឹងនរ ប៉ុន្តែនាងមិនដឹងឡើយ។ 7 ដូច្នេះឥឡូវនេះ កូនរាល់គ្នាអើយ ចូរស្ដាប់តាមខ្ញុំ ហើយកុំបែរចេញពីពាក្យនៃមាត់ខ្ញុំឡើយ! 8 ចូរដាក់ផ្លូវរបស់អ្នកឲ្យឆ្ងាយពីនាង ហើយកុំទៅជិតមាត់ទ្វារផ្ទះនាងឲ្យសោះ 9 ក្រែងលោអ្នកប្រគល់កិត្តិយសរបស់អ្នកទៅអ្នកដទៃ ហើយប្រគល់អាយុជីវិតរបស់អ្នកទៅមនុស្សឃោរឃៅ; 10 ក្រែងលោជនមិនស្គាល់បានឆ្អែតដោយកម្លាំងរបស់អ្នក ហើយការនឿយហត់របស់អ្នកបានទៅលើផ្ទះរបស់ជនចម្លែកវិញ។ 11 នៅចុងបញ្ចប់របស់អ្នក ពេលសាច់ និងរូបកាយរបស់អ្នកត្រូវបានបំផ្លាញ នោះអ្នកនឹងថ្ងូរ 12 ហើយនិយាយថា៖ “ខ្ញុំបានស្អប់ការប្រៀនប្រដៅយ៉ាងណាហ្ន៎! ចិត្តខ្ញុំបានមើលងាយការស្ដីប្រដៅយ៉ាងណាហ្ន៎! 13 ខ្ញុំមិនបានស្ដាប់តាមសំឡេងគ្រូៗរបស់ខ្ញុំ ហើយក៏មិនបានផ្ទៀងត្រចៀកនឹងអ្នកបង្រៀនខ្ញុំដែរ; 14 ខ្ញុំស្ទើរតែវិនាសទាំងស្រុង នៅកណ្ដាលចំណោមអង្គប្រជុំ និងសហគមន៍!”។ ពេញចិត្តតែនឹងប្រពន្ធខ្លួន15 ចូរផឹកទឹកពីអាងទឹករបស់ខ្លួន ចូរផឹកទឹកដែលហូរចេញពីអណ្ដូងរបស់ខ្លួនចុះ។ 16 តើគួរឲ្យប្រភពទឹករបស់អ្នកហូរខ្ចាយទៅផ្លូវ ហើយគួរឲ្យប្រឡាយទឹករបស់អ្នកហូរខ្ចាយតាមកន្លែងសាធារណៈឬ? 17 ត្រូវទុកសម្រាប់អ្នកតែម្នាក់ឯងប៉ុណ្ណោះ គឺមិនមែនសម្រាប់ឲ្យអ្នកដទៃចែកជាមួយអ្នកឡើយ។ 18 សូមឲ្យប្រភពទឹករបស់អ្នកបានពរ ហើយចូរត្រេកអរនឹងប្រពន្ធដែលបានតាំងពីយុវវ័យរបស់អ្នកចុះ 19 គឺប្រៀបដូចជាក្ដាន់ញីដ៏ជាទីស្រឡាញ់ និងប្រើសញីដ៏ស្អាត—— សូមឲ្យដោះនាងបំពេញចិត្តអ្នកគ្រប់ពេល សូមឲ្យអ្នកឈ្លក់វង្វេងនឹងសេចក្ដីស្រឡាញ់របស់នាងជានិច្ច។ 20 កូនរបស់ខ្ញុំអើយ ហេតុអ្វីបានជាអ្នកឈ្លក់វង្វេងនឹងស្ត្រីផិតក្បត់ ហើយឱបរឹតដើមទ្រូងស្រីក្រៅដូច្នេះ? 21 ដ្បិតផ្លូវរបស់មនុស្សនៅចំពោះព្រះនេត្ររបស់ព្រះយេហូវ៉ា ហើយព្រះអង្គស្ទង់មើលគ្រប់ទាំងគន្លងរបស់គេ។ 22 អំពើទុច្ចរិតរបស់មនុស្សអាក្រក់ចាប់ខ្លួនគេជាប់ ហើយអ្នកនោះត្រូវបានចាប់ចងដោយចំណងនៃបាបរបស់ខ្លួន។ 23 អ្នកនោះនឹងត្រូវស្លាប់ដោយសារគ្មានការប្រៀនប្រដៅ ក៏នឹងត្រូវវង្វេងបាត់ព្រោះតែភាពល្ងីល្ងើយ៉ាងខ្លាំងរបស់ខ្លួន៕ |