Seanfhocal 22 - An Bíobla Naofa 1981

¹ Tá dea-cháil le roghnú thar bhreis maoine, agus is fearr dea-mheas ort ná airgead nó ór.

² Casann an saibhir ar an daibhir; sé an Tiarna a rinne iad go léir.

³ Feiceann fear na céille an baol chuige agus téann i bhfolach uaidh; téann na baotháin ar aghaidh agus díolann siad as.

⁴ Sé luach saothair na humhlaíochta agus eagla an Tiarna ná saibhreas, onóir agus fad saoil.

⁵ Tá dealga agus gaistí ar chosán an urchóidigh; an té a thugann aire do féin, déanfaidh sé é féin a sheachaint orthu.

⁶ Déan an leanbh a oiliúint sa bhealach is dual dó; agus nuair a rachaidh sé in aois ní thréigfidh sé é.

⁷ Bíonn an toiceach ag mursanacht ar an mbochtán, agus bíonn fear na hiasachta faoi bhois an té a thug rud dó.

⁸ An té a shíolann an éagóir, beidh fómhar na tubaiste aige; air féin a [thitfidh] bata a chuthaigh.

⁹ Tá beannacht i ndán don duine cineálta, mar roinneann sé a chuid aráin leis an mbochtán.

¹⁰ Tabhair bata is bóthar don scigire agus baileoidh an t‑aighneas leis, agus beidh deireadh le hachrann is le hachasán.

¹¹ Tá cion ag [an Tiarna] ar an gcroí glan, agus is cara don rí fear na cainte caoine.

¹² Déanann súile an Tiarna an t‑eolas a fhaire, ach leagann sé ar lár briathra na mbréagairí.

¹³ “Tá leon lasmuigh,” a deir an leisceoir! “Marófar sa tsráid mé!”

¹⁴ Cuithe domhain béal mná deoranta; an té a bhfuil an Tiarna i bhfearg leis, titfidh sé inti.

¹⁵ Tá an bhaois ginte i gcroí an linbh; ach déanfaidh slat an smachtaithe í a dhíbirt i gcéin as.

¹⁶ Luigh ar an mbochtán agus bronnfar maoin air; tabhair rud don saibhir agus déanfaidh tú é a chreachadh.

Ráitis na Saoithe

¹⁷ Ráitis na saoithe: Tabhair cluas agus éist le briathra na saoithe, agus crom ar a bhfoghlaim.

¹⁸ Beidh sé ina shólás agat iad a choimeád i do chroí, agus iad go léir a bheith mar phionna ar do bheola.

¹⁹ Tá [do chosán] á thaispeáint agam duit inniu le go mbeadh do mhuinín agat as an Tiarna.

²⁰ Nach bhfuil [deich gcaibidil fichead] de chomhairlí agus de ghaois scríofa agam duit,

²¹ Le go mbeifeá in ann an fhírinne a léiriú, agus lucht do cheistithe a fhreagairt le briathra stuama?

²² Ná creach an bochtán mar gur bochtán é, agus ná ciap aon duine atá á bhuaireamh i ngeata na cathrach;

²³ Óir déanfaidh an Tiarna a gcúis a agairt, agus ídeoidh sé lucht a n‑ídithe.

²⁴ Ná déan muintearas leis an té atá tugtha don fhearg, agus ná bíodh caidreamh agat ar fhear drochmhianaigh,

²⁵ Le heagla go bhfoghlaimeofá a bhealaí, agus go mbéarfaí ort i ngaiste.

²⁶ Ná bí ar dhuine díobh siúd a thugann gill, agus a théann in urrús le fiacha.

²⁷ Mura mbíonn sás d'fhuascailte agat, tógfaidh siad an leaba a bheidh fút.

²⁸ Ná haistrigh cloch ársa theorann, a leag do shinsir ina leaba.

²⁹ An bhfeiceann tú duine atá oilte ar a ghnó? déanfaidh sé freastal ar ríthe; ní do shuaracháin a bheidh sé ag fónamh.