Salm 8 - An Bíobla Naofa 1981

Maorgacht Dé agus Gradam an Duine

¹ Do stiúrthóir an chóir. Ar an “gittith”. Salm Dháiví.

² A Thiarna, ár dTiarna, nach éachtach é d'ainm ar fud na cruinne! Moltar do mhaorgacht os cionn na spéartha

³ as béal naíonán agus leanaí cíche. Bhunaigh tú daingean in aghaidh d'eascairde d'fhonn naimhde agus ceannaircigh a chloí.

⁴ Nuair a fheicim na spéartha, saothar do mhéar - an ré agus na réaltaí a rinne tú -

⁵ cad is duine ann go dtógfá ceann de? ná mac an duine go ndéanfá cúram de?

⁶ Rinne tú beagán níos lú ná dia é gur chuir tú barr glóire agus gradaim air.

⁷ Thug tú ceannas ar oibreacha do lámh dó agus chuir tú gach aon ní faoina chosa,

⁸ idir chaoirigh agus eallaí agus eile agus ainmhithe uile an mhachaire,

⁹ éanlaith an aeir agus iasc na mara agus a ngluaiseann ar raonta na farraige.

¹⁰ A Thiarna, ár dTiarna, nach éachtach é d'ainm ar fud na cruinne!