Salm 4 - An Bíobla Naofa 1981

Urnaí Oíche

¹ Do stiúrthóir an chóir; le gléasanna téad. Salm le Dáiví.

² Éist liom is mé ag éamh ort, a Dhia na fíréantachta. D'fhuascail tú mé ó mo phianpháis, éist liom go trócaireach.

³ A fheara, cá fhad dom faoi mhíchlú agus náire, agus sibhse ag tabhairt taitnimh don bhaois is don éitheach?

⁴ Is é an Tiarna a roghnaíonn dó féin an duine diaga: éistfidh an Tiarna nuair a ghlaofaidh mé air.

⁵ Bíodh eagla oraibh; ná peacaigí, déanaigí machnamh in bhur leaba.

⁶ Déanaigí íobairtí córa, bíodh bhur ndóchas sa Tiarna agaibh.

⁷ Is iomaí duine á rá: “Cé a nochtfaidh nithe fónta dúinn? Ardaigh solas do ghnúise os ár gcionn, a Thiarna.”

⁸ Is mó a chuir tusa d'aoibhneas i mo chroí ná iad siúd de bharr flúirse aráin agus fíona.

⁹ Rachad a luí faoi shuaimhneas: déanfad codladh go sámh, óir is tú amháin, a Thiarna, a choimeádann ó bhaol mé.