Salm 2 - An Bíobla Naofa 1981

Réimeas Chríost Rí

¹ Cad fáth a bhfuil na ciníocha á suaitheadh agus na náisiúin ag beartú gan éifeacht?

² Éiríonn ríthe na cruinne, agus déanann na flatha comhcheilg le chéile in éadan an Tiarna agus a ungthaigh:

³ “Réabaimis ó chéile a gcuibhreacha agus caithimis uainn a ngeimhle!”

⁴ An té atá ar neamh, déanann sé gáire: déanann an Tiarna díol magaidh díobh.

⁵ Labhraíonn sé ansin leo go feargach; cuireann scéin agus sceimhle orthu le corp cuthaigh:

⁶ “Chuir mise mo rí féin i réimeas ar Shíón, ar mo shliabh naofa.”

⁷ Foilseoidh mé reacht an Tiarna. “Is tú mo mhac,” a dúirt an Tiarna liom, “inniu is ea a ghin mé thú.

⁸ Iarr orm agus tiomnóidh mé na ciníocha duit agus críocha na cruinne mar oidhreacht duit.

⁹ Déanfaidh tú iad a bhriseadh le slat iarainn; brisfidh tú ina mbloghanna iad amhail soitheach cré.”

¹⁰ Bígí críonna, dá bhrí sin, a ríthe; aire chugaibh! a rialtóirí na cruinne.

¹¹ Déanaigí fónamh don Tiarna le heagla agus tugaigí ómós dó go creathnach, 12 sula gcuirfí fearg air, is go dtéadh sibh ar ceal nuair a bhladhmfaidh a fhearg go tobann. Is aoibhinn dá gcuireann a ndóchas ann.