Salm 135 - An Bíobla Naofa 1981

Moladh leis an Tiarna

¹ Alleluia. Molaigí ainm an Tiarna; molaigí é, a lucht fónaimh an Tiarna,

² a bhíonn in bhur seasamh i láthair an Tiarna, i gcúirteanna áras ár nDé.

³ Molaigí an Tiarna toisc gur maith é an Tiarna; canaigí Salm dá ainm toisc gur grámhar é;

⁴ Óir roghnaigh an Tiarna Iacób, agus Iosrael ina sheilbh dó féin.

⁵ Óir is eol dom gur mór é an Tiarna, ina Dhia os cionn na ndéithe go léir.

⁶ Déanann sé a dtaitníonn leis ar neamh is ar talamh, ar muir agus in íochtar na farraige.

⁷ Seolann sé scamaill ó chríocha na cruinne; déanann sé fearthainn le saighneáin tine; tógann sé na gaotha as a n‑ionaid taisce.

⁸ Bhuail sé céadghin na hÉigipte, idir dhaoine agus bheithígh in éineacht.

⁹ Rinne sé comharthaí agus tuartha i gceartlár do thíre, a Éigipt in aghaidh Fhorainn is a lucht fónaimh go léir.

¹⁰ Bhuail sé a lán de na ciníocha; agus mharaigh sé ríthe cumhachtacha -

¹¹ Síochon, rí na nAmórach agus Óg a bhí ina rí ar Bháiseán, agus ríthe Chanán go léir.

¹² Agus thug sé a dtalamh mar oidhreacht, mar oidhreacht do Iosrael, a phobal.

¹³ Maireann d'ainm de shíor, a Thiarna, agus do chuimhne ó ghlúin go chéile.

¹⁴ Óir déanfaidh an Tiarna a phobal a chosaint; agus glacfaidh sé trua dá lucht fónaimh.

¹⁵ Ór agus airgead íola na gciníocha, saothar lámh na ndaoine.

¹⁶ Tá béal acu ach ní fhéadann siad labhairt; tá súile acu ach ní fheiceann siad dada;

¹⁷ tá cluasa orthu ach ní chluineann siad smid; ná níl puth anála ina mbeola.

¹⁸ Is cosúil leo féin lucht a ndéanta; agus a gcuireann a ndóchas iontu.

¹⁹ A theaghlach Iosrael, tabhair moladh don Tiarna; a theaghlach Árón, tabhair moladh don Tiarna;

²⁰ a theaghlach Léiví, tabhair moladh don Tiarna; a lucht adhartha an Tiarna, tabhair moladh dó.

²¹ Moladh leis an Tiarna as Síón; tá cónaí air in Iarúsailéim!