Iób 31 - An Bíobla Naofa 1981

Iób á Chosaint Féin

¹ Rinne mé margadh le mo shúile, Nach ndéanfaidís moill ag amharc ar mhaighdean.

² Cén roinn a dheonaíonn Dia ó neamh? Cén oidhreacht a bhronnann an tUilechumhachtach ó na flaithis?

³ Nach tubaiste ar an gcoirpeach? Agus mí-adh ar lucht na hurchóide?

⁴ Nach bhfeiceann sé mo bhealaí Agus nach n‑áiríonn sé mo choiscéimeanna?

⁵ An raibh mé cois ar chois leis an mbreag? Nó ar sodar i ndiaidh na calaoise?

⁶ Déanadh sé mé a mheá sa mheá ionraic, Agus bíodh m'fhíréantacht ar eolas ag Dia!

⁷ Má chuaigh mo chos i leataobh ón mbealach, Nó má lean mo dhúil mo shúil, Nó má thóg mé aon ní i mo ghlac,

⁸ Go gcuireadsa an síol ach go mbaine duine eile an fómhar; Go ndéantar mo shliocht a stoitheadh ar shiúl!

⁹ Má mealladh mé riamh ag bean, Nó má fhan mé ag faire ag doras mo chomharsan,

¹⁰ Go meile mo bhean a phlúr do dhuine eile, Agus go gcodlaí sí faoi bhraillín nach liomsa.

¹¹ Ba pheaca drúise é sin, Coir le [díolt ag an dlí],

¹² Coir a d'adhnfadh tine a loscfadh go hAbadón. Agus a dhófadh m'fhómhar go léir.

¹³ Dá ndiúltóinn do cheart mo dhaoráin Nó mo dhaoirsí, nuair a bhíodar ag aighneas liom,

¹⁴ Cad a dhéanfainn nuair a d'éireodh Dia? Cad déarfainn nuair a dhéanfadh sé fiosrú?

¹⁵ An té a rinne mise sa bhroinn, nach ndearna sé iadsan freisin? Nach é an [Dia] céanna a rinne sinn go léir i mbolg ár máthar?

¹⁶ Ar dhiúltaigh mé don bhocht aon ní a bhí de dhíth air? Ar chuir mé gruaim ar shúile na baintrí?

¹⁷ Ar chaith mé mo chuid bia liom féin, Gan cuid a thabhairt don dílleachta?

¹⁸ Óir bhí [Dia] mar athair agam do m'oiliúint ó m'óige, Agus threoraigh sé mé ó bhroinn mo mháthar.

¹⁹ An bhfaca mé riamh ainniseoir gan éadach, Nó fear bocht gan bhrat,

²⁰ Agus gan é do mo bheannú ó chroí, Agus lomra mo chaorach á théamh?

²¹ Ar ardaigh mé mo lámh in aghaidh an [neamhchiontaigh], Le barr muiníne as mo dhea-mheas ag an ngeata?

²² Má rinne mé amhlaidh, go dtite mo ghualainn ó mo shlinneán, Agus go stractar mo ghéag as alt!

²³ Óir thiocfadh uafás Dé anuas orm, Agus ní sheasóinn an fód i láthair a mhórgachta.

²⁴ Ar chuir mé mo mhuinín san ór? Nó ar dhúirt mé leis an ór fíre: “Is tú mo thaca.”

²⁵ Ar mhaígh mé as flúirse mo mhaoine? Nó as an raidhse a ghnóthaigh mé i mo ghlac?

²⁶ Nuair a chonaic mé an ghrian ina glóir, Nó niamh na gealaí ina cúrsa,

²⁷ Ar mealladh mo chroí os íseal Is gur chaith mé póg ó mo láimh leo?

²⁸ Ba choir é sin leis a bheadh le díolt ag an dlí - Mé a shéanadh Dé in airde.

²⁹ Ar bhain mé taitneamh as mí-ádh mo namhad, An ndearna mé lúcháir nuair a bhuail an tubaiste é?

³⁰ Cé nár lig mé do mo theanga aon olc a dhéanamh, Á mhallachtú nó ag guí dianbhás do.

³¹ Nár dhúirt lucht mo bhotha: “An bhfuil aon duine nach bhfuair a sháith dá fheoil?”

³² Níor ghá do dheoraí riamh codladh sa tsráid; Bhí mo dhoras riamh ar leathadh don [taistealaí].

³³ Ar cheil mé riamh mo chionta [ó dhaoine]? Agus ar chuir mé m'urchóid i bhfolach i mo chliabh?

³⁴ An raibh eagla orm riamh roimh chúlghearradh an phobail Nó scéin roimh fhonóid ón aon teaghlach?

³⁵ Uch gan [Dia] le héisteacht liom! Tá deireadh ráite agam, ó A go U; freagraíodh an tUilechumhachtach mé.

³⁶ Nuair a bheidh a scrolla scríofa ag mo chúisitheoir i mo choinne, Caithfidh mé ar mo ghualainn é, Nó cuirfidh mé ar mo cheann é mar choróin;

³⁷ Tabharfaidh mé cúntas ar gach beart de mo shaol, Agus rachaidh mé go fearúil, mar thaoiseach, ina araicis.

³⁸ Má ghlaoigh mo chuid talún i m'aghaidh, Agus go raibh gach clais ar snámh le deora,

³⁹ Má ith mé a thoradh gan díol as, Nó má thug mé cúis ghearáin do lucht a shaothraithe,

⁴⁰ Go bhfása sceacha mar a mbíodh an chruithneacht, Agus fiailí nimhneacha mar a mbíodh an eorna. (Sin críoch ar bhriathra Iób.)