TOBIT 6 - BUKUIT NE TILIIL Sireet ne Dutero Kanon BUKUIT NE TILIIL Sireet ne Dutero Kanon
TOBIT 6

¹ Ara ki muita anyun Annah, ma ta koriir. Ki wo anyun weerooto ming'in. Ki wo malaikaiyat kobooto ineendet;

² ak ki isup icheek seset. Ki pa icheek tuwai eng' pandanywa ak ye kiityi icheek imenindo, ko ki it komuuny eng' ye neegitee aineetap Tigris.

³ Ki wo anyun weerooto kochoortagei kwo koun keelyekyik eng' aineet. Eng' sainooto komong' njiryot ne oo eng' peek ak komach konam keeldo ne po weerooto ming'in, ak ki waach kogasak.

⁴ Ago ki mwachi `malaikaiyat ineendet koleenji, “Nam njiryot amemete!” Ki nam anyun weerooto njiryot ak kowiirta kwo kooret ole yaamaat.

⁵ Ki leenji anyun `malaikaiyat ineendet, “Til njiryot koyaatak ak inemu kipsegetetyet, muguleldo ak koennyi. Riip chooto, ago wiirte agutanik. Amu kipsegetetyet, muguleldo ak koennyi ko kerich che toretisye.”

⁶ Ara kingo kagotil njiryot koyaatak, koyum `weerooto kipsegetetyet, muguleldo ak koet; yeityo kobeel ak koam kebebertap njiryot, ak konam kebeberta age kosirigenee munyuk. Ki testai tuwai eng' ooreet agoi koriikta Media.

⁷ Kiteebse anyun `weerooto malaikaiyat ak koleenji ineendet, “Tupchet Azariah, nee kerichek che po kamanuut che mi eng' muguleldap njiryot ak koet, ak eng' kipsegetetyennyi?”

⁸ Kowol kole, “Agobo muguleldap njiryot ak koennyi, ko nyolu ibeel komong' iyeto eng' taitap muren anan kwony ne inyaliili oindo anan tamirmir ne ya. Ak mweei kanyaliilo age tugul ak ma ng'etu agot perut.

⁹ Ak agobo kipsegetetyet, iilee konyegap chii ole taagu ko leel, kuutyi kebeberta ne leel eng' konyekyik, ak saptos koonyek.”

¹⁰ Ye kingo mong'ji `ineendet Media ak ko kagoriikyi Ekbatana,

¹¹ koleenji `Raphael weerooto ming'in, “Tupchoni Tobias.” Kowol ineendet kole, “Ami yu.” Koleenji `Raphael ineendet, “Kanyool kimung'e lagatuni kootap Raguel. Ineendet ko tilyeng'ung', ak ko tinyei chepto ne kiguure Sarah.

¹² Ma tinyei ineendet chii ne weero ne indiie tuguuk kobatee cheptonyi Sarah, ak inyee, ko uu ye ii tilya ne neegit eng' chebito, itinye kosiir murenik alak rikyinet ne imuuch kobunjin. Kogeny ko itinye imanda indii tuguugap kwandanyi. Ne siirei, chebito ko ng'oom, nyigan, ak ko karaaran kot, ak kwandanyi ko chii ne myee.”

¹³ Ki testai kole, “Itinye imanda imut ineendet eng' katunisyet. Ara kasa, tupchoni, eng' lagatuni awendi si ang'alaalji kwandanyi agobo chebooto, si kimut ineendet koek murereng'ung'. Amu angen ale ma imuuchi Raguel koeetenen ineendet anan koyamisyi chebooto chii age koma ityi kergong'yet ko uu ng'atuutyetap bukuitap Musa. Ingen ineendet komyee kole inyee, ama chii age, konyooljin kotun cheptonyi. Kasa anyun nguno, tupchoni, awendi si keng'alaal agobo chebooto ak ketet keyai koito. Ak ye ki weeksei eng' Rages kimut ineendet ak keebe kot keit koong'ung'.”

¹⁴ Ki mwa anyun Tobias kowoljin Raphael kole, “Tupchet Azariah, koagas keele ki kotun ineendet murenik tisabu ak ki pek icheek komi eng' koot ne po igoortap tuumdo. Ki meei age tugul eng' icheek kemout ye kingo pa ak kwonyooto. Koagas piik komwaei koleen ki par `oindet icheek.

¹⁵ Ma imuuchi oindet kong'em murereet, ago parei chii age tugul ne kamach kole koriikyi ineendet. Ara nguno, amu aa weeriit ne ineegei eng' kwandanyu, aiywei amu imuuch ame ak aipchi kwandanyu ak kamennyu koba kererit, koriirtos eng' ng'wanindo agobo anee. Ma tinyei weeriit age ne tubei icheek.”

¹⁶ Ago ki mwachi `Raphael ineendet koleenji, “Tos mebwaate ng'aleek che ki ng'atin kwandang'ung' ye king'atin kole icheeng'jigei osotyot eng' kootap kwandang'ung'? Kasaa anyun nguno, tupchet, mata ites imwa agobo oindoni. Imut murereet. Angen ale kemouni po ra kegoonin ineendet koek ne ituni.

¹⁷ Ye kaiwe koot nooto po igoortap tuumdo, inam kebebertap koetap njiryot ak muguleldo, ak inde paragutap kegenganik che po nyamdutik. Piitu eng' yooto ng'uunet,

¹⁸ ing'ue oindet ak komwei, ak ma koi ki keer eng' ye neegitee ineendet kogeny.”