TOBIT 7 - BUKUIT NE TILIIL Sireet ne Dutero Kanon

Komong'jin `icheek Kootap Raguel

¹ Ye kingo mong'ji icheek Ekbatana, koleenji `Tobias ineendet, “Tupchet Azariah, imuta keebe ole mi tupchennyo Raguel.” Ki imut anyun ineendet kwo kootap Raguel, ole ki nyoorchi kotebye ng'wony eng' kurgat saang'. Ki igat ineendet korook, ak kowol inee kole, “Tupchosyek, kiboboen; ak otogotin eng' talasyo!” Ki imut `ineendet anyun icheek koba ko.

² Ki mwachi kwondonyi `Edna koleenji, “Keero, kerge ne tya weeri ming'in ak chiitap ooreennyu Tobit!”

³ Kiteepsee icheek anyun `Edna koleenji, “Obunu ano tupchosyechu?” Kowol kole, “Ki punu ooreetap Naptali che mi luuleet eng' Nineveh.”

⁴ Komwachi `Edna icheek kole, “Tos ongen chiitap ooreennyo Tobit?” Kowol icheek kole, “Ee, kingen ineendet.” koteebeee `icheek kogeny koleenji, “Tos mi inee komyee-i?”

⁵ Kowol kole, “Ee sabei ineendet ak kochamegei.” Kotes Tobias kole, “Ineendet ko kwandanyu!”

⁶ Kingo kas Raguel niito kong'eet eng' poiboiyet ak kotorooch ak koriir.

⁷ Ki ng'alaalji kora `Raguel ineendet ko uu ni, “Lakweennyu, weeriitap chii ne myee ak ko teegisoot, ingotebenen kaberuret! Acha ko Kor chii ne aiyeep ak ko po iman.” Kitorooch `ineendet chiitap ooreennyi Tobias ak koriir.

⁸ Ki riir agine kwondonyi agobo ineendet, ak koyai ko uu nooto cheptonywa.

⁹ Ki eeny Raguel mengit eng' akweennyi ak kotaach icheek miising'. Kingo kagouungei ak koba kole koamis, koleenji `Tobias Raphael, “Tupchet Azariah, soom Raguel kogoono chepkamatut Sara.”

¹⁰ Ago ki kas Raguel ak koleenji weerooto, “Amisye ak ieise ak ibaibaitu koskoleng'uni amu ma mi chii kobatenen weeri ne tinyei imanda kotun cheptonyu Sarah. Aa! Uu nooto. Ma chamjini chii age kobatenen amu ii tilya ne neegit miising'. Ago lakweennyu kany aaroorun komyee ole uu ng'aleek:

¹¹ Ki agoochi `ineendet piik tisap aleen kotun, ak ki pek tugul eng' kemout ne kingo leen koba icheek kotuiyo ak ineendet. Ago nguno lakweennyu, amisye ak ieise, tononi Kiptaiyat ne kata okweek tuwai.” Ago ki le Tobias, “Ma ndoi kiy kuut agoi imwaiwo tuguuk che namegei ak sabeennyu.” Ara ki le Raguel, “Ayae ko uu nooto. Kagoek neng'ung' ko uu ng'atuutyet eng' bukuitap Musa, ak kageng'at eng' kipsengwet keele ineendet ko kagobunjiin. Imut anyun kwonyi tilyeng'ung'; kobooch nguno ko ii ng'eetap kamennyi ak ineendet koegu chepkameting'ung'. Kagigoonin ineendet kobooch rani agoi koigeny. Lakweennyu, ingondoiywok ak koberuurok tuwai Kiptaiyat kemouni ak kogonok rireenet kobooto kaalyeet.”

¹² Ki kuur anyun `Raguel cheptonyi Sarah. Ye kingo nyo ineendet konam eunnyi ak kogoochi `ineendet Tobias, koleen, “Imut ineendet koek kwondong'ung' ko uu ng'atuutyet ak kaneetisyet ne siraat eng' bukuitap Musa. Nam ineendet ak imut komyee imutyi kwandang'ung'. Ak ingoyai Kamuktaindetap kipsengwet pandang'wong' koberuurok kobooto kalyennyi.”

Tuumdap Katunisyet

¹³ Koguur anyun `Raguel kametap Sarah ak komwachi koip tuguuk che kisirisyen; ak kisir ineendet agobo kayanjinet ne po katunisyet, kosupkei ak chamdaet ne ki igoochi `Sarah Tobias koek kwondonyi ko uu kaneetisyet ne po ng'atuutyetap Musa.

¹⁴ Kingo pata niito konaam anyun koamis ak koeeiso.

¹⁵ Ki kuur `Raguel kwondonyi ak koleenji, “Chepkamet, chop koot age ne kirue, ak imut Sarah kwo yooto.”

¹⁶ Ki wo anyun ak kochop koot ne kirue ko uu ye kaga kemwachi, ak komut Sarah kwo yooto. Ki riir kamet koriirchi cheptonyi. Ne matya, kobuuch peegap kong' ak koleenji ineendet, “Nyiganitu, cheptonyu, ingogoonin Kiptaiyatap kipsengwet poiboiyet kogeree riirek. Nyiganitu, cheptonyu.” Kingo pata kwo ineendet komanda saang'.