TOBIT 5 - BUKUIT NE TILIIL Sireet ne Dutero Kanon BUKUIT NE TILIIL Sireet ne Dutero Kanon
TOBIT 5

¹ Ki wolji anyun Tobias kwandanyi kole “Abba ayae kiy age tugul ne keng'ataa.

² Ago anyoorundoi ano robiinik eng' ineendet, amu ma ingeno inee ak mangen ineendet? Nee anyun kiy ne amuuchi agoochi ineendet si konaa ak koyana, ak kogoono robiinik? Kogeny, mangen ortinwek che pendi agoi Media anan ole amuuchi aitita olooto.”

³ Ki wolji anyun `Tobit weeriinnyi Tobias kole, “Ki koono sireennyi ne po kayanjinet ak agoochi agane ineendet sireenyu ne po kayanjinet, ki kinamjine tuwai ak kegereer kepcheune aeng'u; ki ip age tugul kebeberta agenge, ak ki ande agenge kotepto robiinik. Ak nguno ko kagosiirto kenyiisyek tiptemu kobooch agonor robiinichu eng' konorwet. Ara nguno, weeriinnyu, cheeng' chii ne kiyani obe tuwai, kigoochini ineendet melekwek agoi iweege. Ago weegu robiinik eng' Gabael.”

⁴ Ki wo anyun Tobias kocheeng' chii koba tuwai agoi Media, chii ne ki ingen ooreet. Ki wo komanda ak konyoor malaikaiyat Raphael kotononi eng' tainnyi, ago ki ma iguiyo kole inee ko ki malaikayatap Kamuktaindet.

⁵ Koleenji Tobias ineendet, “Ibunu ano, neranani?” Kowol kole, “Abunu kaptilyonutik, piigap Israel, ak kaanyo yu ayai poisyet.” Komwachi Tobias ineendet kole, “Tos ingen ooreet ne wendi Media?”

⁶ Kowol kole, “Ee angen, ki awe olooto konyil che chaang', angen komyee ak angen ortinwek tugul. Ki awe kasarwek che chaang' Media, ak atebi kobooto chiitap ooreenyo Gabael ne menyei eng' Rages ne po Media.Ki panda ne po peetuusyek aeng' keng'eete Ekbatana agoi Rages; amu mi Rages eng' emetap tuloonook, komi Ekbatana eng' kwenutap atebweet.”

⁷ Ki mwachi `Tobias ineendet koleenji, “Igenoo, nerenani, agoi awo ko ak amwachi kwandanyu, amu amache keebe tuwai, ak agoonin melekweguk.”

⁸ Ki wol kole, “Uu nooto, ageniin; ago mat igaage.”

⁹ Ara ki wo ko oriit Tobias kwo komwachi kwandanyi Tobit ak ki leenji ineendet, “Kaanyooru chii age ne po oornyo Yahudyot!” Kowol kole, “Weeriinnyu, kuur konyo ko, si kobiit anai agobo koonnyi ak agobo pororyet ne punu, ak ngot ko chii ne kiyani koit obe tuwai.”

¹⁰ Ki wo anyun Tobias ak koguur ineendet kole, “Weeri ming'in, kuurin kwandanyu.” Ara ki pa ko tuwai kobooto ineendet, ak ki igat `Tobit ineendet korook. Kowol kole, “Taach kagotyetap poiboiyet!”

¹¹ Koleenji `Tobit ineendet, “Tupchoni, ii po kap ng'oo ak ii punu pororyet ainon? Mwaiwo, tupchet.”

¹² Kowol kole, “Amu nee si imach inai pororyennyu?” Ago ki le Tobit, “Amache anain komyee, weeri, ii weeriitap kap ng'oo ak kaineng'ung' ko ngo.”

¹³ Ki wol kole, “Aa Azariah, weeriitap Hananiah ne oo, age ne po tilyonutiguk.”

¹⁴ Ki mwachi `Tobias ineendet koleenji “I tagaat! Saruun Kamuktaindet, tupchet. Amegasyo ng'woonin, tupchet, amu kamache anai komyee agobo kootap kwandang'ung'. Kagoboor keele ii tilya, ak kootap kwandang'ung' ko myach ak ko taagunotiin. Amu ki angen Hananiah ak Nathanak weeriik aeng' che po Shemeliah. Ki cham kebendi tugul agoi Jerusalem ak keyai saautik eng' olooto ak ma pagaakta ooreet. Kaptilyonutiguk ko piik che myach; iyabu piich che myach. I taagat ne po iman!”

¹⁵ Ki tes kole, “Agoonin robiin koek melekwek che po peetuut, kobooto che oboisyen inyee ak weeriinnyu. Ara oba kobooto weeriinnyu,

¹⁶ ak ye oweege ne tala anyoon atesyini kiy melekweguk.” Kowol Raphael kole, “Awendi kobooto ineendet; ara meywei. Kibendi eng' chametapkei ak keweege eng' chametapkei, amu riiboot ooreet.”

¹⁷ Ara ki mwachi `Tobit ineendet koleenji, “Ngiberuurin, tupchennyu.” Ki kuur `ineendet weeriinnyi ak koleenji, “Weeri, chop tuguuk che po panda ak itau panda kobooto tupcheng'ung'. Ngo mutak Kamuktaindet ne mi kipsengwet oit olindo komyee ak oweege eng' chametapkei. Ingwo malaikaiyat kobootok tuwai ak koriibotok, weeriinnyu!” Kin kotomo koba kotai pandanyi, kogoochi saisere kwandanyi ak kamennyi. Ki mwachi Tobit ineendet koleenji, “Oba panda ne myee.”

¹⁸ Ago ki inam koriir kamennyi ak koleenji Tobit, “Amu nee si kaimach iyookte lakweennyu? Tos ineendet koma kirokto ne po eunnyo ye nyoonei ak komandoi eng' tainnyo?

¹⁹ Mat iegu chii ne chamei robiinik miising', kot koek robiinichooto mi ole loo kagoitoetap lakweennyo.

²⁰ Amu sabeet ne ki koonech acheek kobun Kiptaiyat ko yamech.”

²¹ Koleenji `Tobit kwondonyi, “Ameiimgei, wendi weeriinnyo eng' chametapkei ak koweekyeigei eng' chametapkei. Tun igeere ineendet eng' peetuut ye weekyinechkei eng' chametapkei. Mat imwa kiy kogeny. Chepkamennyu, mat iyweisye agobo icheek.

²² Amu wendi ineendet ak malaikaiyat ne myee; pandanyi kosuldoi, ak tuun weeksei eng' chametapkei.”