TOBIT 4 - BUKUIT NE TILIIL Sireet ne Dutero Kanon

Kogoochin `Tobit weeriinnyi kaneetisyosyek

¹ Eng' peetuunooto, ko ki ibwaat Tobit robiinik che kiga metochi Gabael eng' Rage eng' Media koriip.

² Ki ibwaatyigei kole, “Kasoom meyaat. Kalya si ma kuur weeriinnyu Tobias si amwochi agobo robiisyechooto kotomo amei?”

³ Ki kuur anyun weeriinnyi Tobias, ak ye kingo it koleenji, Weeriinnyu, ye kamei, iyaiywo kasaiseretet ne myee. Konyit komet amemete eng' peetuusyegap sabeennyi tugul. Yai kiy tugul ko uu magennyi, ameyachi kiy ne imuuch konach ineendet.

⁴ Weeriinnyu, ibwaat ineendet amu ki nyoor inee pichiinwek che chaang' agobo inyee ye ki imi maennyi. Eng' kasarta kogaigeskei inee, otup inee ketetkei eng' kererit.

⁵ Weeriinnyu, iywei Kamuktaindet eng' peetuusyeguk tugul, ak iyesye yaityo anan ibistoe ng'atuutikyik. Tebi eng' ooreet ne myee eng' peetuusyegap sabeeng'ung' tugul, amewe eng' ooreetap yaityo;

⁶ Amu icheek che poisyei eng' imanit, koberuuroksei eng' poisyonikwak tugul.

⁷ Eng' icheek che yaei imanda, igoite kagoochinoik eng' tuguuguk, ame keere kong' ne ya konunotyot ye igoitoi. Ametuptochi patai icheek che ponoon, ye iyai ko uu nooto koma istoenengei togeetap Kamuktaindet.

⁸ Icheru che itinye. Ngitinye che chaang' icheru che chaang'. Agot ngitinye che ng'ering', icheru kebebertap chooto ng'ering'.

⁹ Ngiyai ko uu nooto, ko kegonorchigei konorwet ne myee eng' peetuusyegap pichiindo.

¹⁰ Amu ngetoret che ponoon kosaru chii eng' meet ak kosar si ma luusyi imenindo;

¹¹ ak icheek tugul che yaei ko uu nooto, ko tiseiywek che taagatin eng' taitap Ne Toroor Miising'.

¹² Weeriinnyu, riibegei atebeetap kesesnatet. Ne tai, itun kwony eng' kwenutap ooreetap aguiywogiguk; amecheeng'jigei itun kwony kobun pororyet age ne ma po pororyetap kwandang'ung'; amu ki po acheek ooreetap maotik. Ibwaat anyun weeriinnyu ile Noah, Abraham, Isak ak Jakobo, kwanisyekyok che po keny, ko ki itunjigei kwonyiik eng' kaptilyonutikwak. Ki iberuurok eng' lagokwak, ak iyotennywa ko namei emet.

¹³ Ara nguno, weeriinnyu, cham kaptilyonutiguk. Amesas icheek eng' muguleldang'ung', weeriik ak tiibiik che po piiguk, ye iyesye itunjigei kwony eng' kwenunnywa. Ole mi menoteet komi ng'emisyet ak nyalilda ne oo. Ak ye mi chorirnatet koma mi keljinet ak piitu pananda ne oo, amu chorirnatet ko kametap rubeet.

¹⁴ Mat itepte melekwegap icheek che poisyeun agoi peetuut ne isubi, ago igoiten eng' chokyinet. Ngot iboisyechini Kamuktaindet inyooru melekto. Riipkei, weeriinnyu, eng' kiy age tugul ne iyae ak eng' ateptong'ung' tugul.

¹⁵ Ameyachi chii kiy ne ya nooto memache keyaun. Ameee maiyek kot kosiirto, anan ichamji pogitet koek chorweng'ung'.

¹⁶ Igoochin kebebertap amitwogiguk icheek che amei rubeet, ak igoochi kebebertap ngoroiguk icheek che mi aach ngor. Igoite tuguuguk tugul che siirtootiin koek kagoochinoik, amegere kong' ne ya kagoitoetap kagoochinoiguk.

¹⁷ Obooru aiyebindo eng' paragutap kereritap che po imanda, ago megoochi kiy kiptengeginik.

¹⁸ Cheeng' katigonet eng' chii age tugul ne utaat ak mesas katigonut ne toretisye.

¹⁹ Ilasu Kiptaiyat Kamuktaindet kotugul, ak isoom ineendet koek ortinweguk che lititen ak si koek ortinweguk ak tetutiguk che iberuuroksei. Amu ma mi age eng' pororyosyek ne iguitos, ago igoochin `Kiptaiyat ineegei icheek katigonet ne myee; ago ngo lewen koma igoito katigonet, kochoortoi koba ng'wony oriit ye mi che ki kobek. Ara nguno, lakweennyu, ibwaat ng'atuutichu, ak megoochi kousak eng' muguleldang'ung'.

²⁰ “Ak nguno, weeriinnyu, amwaun ale ki ametechi Gabael weeriitap Gabrias koriip robiinik che chaang', ne mi Rages eng' Media.

²¹ Amearagen, weeriinnyu, amu kageigu che ponoon. Itinye mogornateet ne oo ye iywei Kamuktaindet ak ye imwee tengek age tugul ak iyai nooto myee eng' taitap Kiptaiyat Kamuktaindeng'ung'.”