TOBIT 14:4 - BUKUIT NE TILIIL Sireet ne Dutero Kanon “Weeriinnyu, imut lagoguk ak obe ochakte agoi Media, amu ayani ng'olyootap Kamuktaindet ne ki mwa Nahum agobo Nineveh, kole agoi kosulda tuguuchu tugul, ak ityin Assyria ak Nineveh. Ee, kiy age tugul ne ki kamwa maotigap Israel che ki iyoogu Kamuktaindet, ko tuun yaaksei. Ma mi eng' ng'aleekwak ne ma itwoisyoksei, ago tuun itwoisyoksei tugul eng' peetuusyek che kigechopchi. Ara tuun kaigai omi eng' Media kosiir omi Assyria ak Babilon. Ko uu ye angen ak ayani ale kiy ne kagomwa Kamuktaindet ko po iman ak kotwoisyokse; ma mi ng'olyoo agot agenge ne ma itwoisyoksei. “Tuun kiyestoi tupchosyekyok tugul, meng'iigap emetap Israel ak kimut komanda koek luulenik eng' emet ne karaaran. Ak emet komugul ne po Israel ko tuun kuberi, kobooto Samaria ak Jerusalem. Tuun kibeelee kiwoong' hekaluutap Kamuktaindet, ak tuun egu karaatya eng' ki po kasarya. |