TOBIT 14 - BUKUIT NE TILIIL Sireet ne Dutero Kanon

¹ Pekyin yu anyun ng'aleegap Tobit che po kalasunet.

Katigonetap Tobit ne po let

² Ki ilil Tobit eng' kaalyeet ko po kenyiisyek pogol ak taman ak aeng', ak ki kigonor eng' teegisto ne oo eng' Nineveh. Ki Kor inee ko po kenyiisyek tamanwogik lo ak aeng' ak kingo kagogeerto kogeny ko meng'iis eng' perurto, kogoitoi kagoochinoik ak koberuuri Kamuktaindet kochulyo ak komwaitoi etunatennyi.

³ Kingo neegit kome Tobit koguur weeriinnyi Tobias ak weeriikyik tisap ak kogoochi ng'atuutyoni:

⁴ “Weeriinnyu, imut lagoguk ak obe ochakte agoi Media, amu ayani ng'olyootap Kamuktaindet ne ki mwa Nahum agobo Nineveh, kole agoi kosulda tuguuchu tugul, ak ityin Assyria ak Nineveh. Ee, kiy age tugul ne ki kamwa maotigap Israel che ki iyoogu Kamuktaindet, ko tuun yaaksei. Ma mi eng' ng'aleekwak ne ma itwoisyoksei, ago tuun itwoisyoksei tugul eng' peetuusyek che kigechopchi. Ara tuun kaigai omi eng' Media kosiir omi Assyria ak Babilon. Ko uu ye angen ak ayani ale kiy ne kagomwa Kamuktaindet ko po iman ak kotwoisyokse; ma mi ng'olyoo agot agenge ne ma itwoisyoksei. “Tuun kiyestoi tupchosyekyok tugul, meng'iigap emetap Israel ak kimut komanda koek luulenik eng' emet ne karaaran. Ak emet komugul ne po Israel ko tuun kuberi, kobooto Samaria ak Jerusalem. Tuun kibeelee kiwoong' hekaluutap Kamuktaindet, ak tuun egu karaatya eng' ki po kasarya.

⁵ Ago tuun rireee Kamuktaindet kogeny icheek ak komut icheek koweek emetap Israel. Tuun teechei icheek kogeny hekaluutap Kamuktaindet, ago ma uu ne ki po tai agoi kasarta ye itu peetuusyegap katwoisyet. Ko kagobata niito koweek icheek tugul kobunu luuleet ak koteech kogeny Jerusalem eng' karaaranindo; ak eng' yooto keteechei kogeny hekaluutap Kamuktaindet, ko uu ye kiga komwa maotigap Israel agobo nooto.

⁶ “Tuun kiwalei pororyosyek eng' ng'wony komugul ak koot Kamuktaindet eng' iman. Metoi icheek kanamonikwak, che eng' ng'aalseet ko ki kondochi icheek koba koyai ne ya;

⁷ ak eng' imanda kolasu Kamuktaindet ne po koigeny. Piik tugul che po Israel che ki kesar eng' peetuusyechooto ak kongen Kamuktaindet ko tuun pwanei kibagenge. Tuun pendi icheek Jerusalem ak komeng'iis komyee koigeny eng' emetap Abraham, ak tuun kigoochin icheek. Chooto chamei Kamuktaindet eng' iman ko tuun poiboitu, ago chooto yaei tengekto ak yaityet ko petos eng' ng'wony tugul.

⁸ Ara nguno, lagokyuk, kang'atak ale oboisyechi eng' iman Kamuktaindet ak oyai ne myee eng' tainnyi.

⁹ Kanyool keng'at lagokwok koyai nooto po iman ak kogoito kagoochinoigap toretisyet. Ak keng'at kobwaat Kamuktaindet ak koberuur kainennyi eng' peetuusyek tugul kobooto imanit ak kimnateennywa tugul. Ara nguno, weeriinnyu, uui eng' Nineveh, mat itebi yu.

¹⁰ “Eng' peetuut ne kegonor kamenng'ung' eng' ye neegito, ko me tebi kemounooto eng' nganasani. Ageere yaityet ne oo eng' yuto, ak ng'aalseet ne oo ne kiyaei, ye ma tinyei piik kalilanet. Keer, weeriinnyu, kiit ne ki yachi `Nadab Ahikar ne kiga koriibon ineendet.Tos ma ineendet ne ki igoochi kome kota kosabei? Ki igeeronji `Kamuktaindet ineendetkou poisyonikyik che yaach che po kalilanet. Kimong'ji Ahikar lapkeiyet ago ki wo Nadab mesundeito ne po koigeny amu kityem kobar Ahikar. Ko uu ye ki igoitoi Ahikar kagoochinoigap toreteet, ko kichelile inee mesteet ne kigachopchi Nadab, ago ki ibutyi ineegei yooto, ak kong'emak.

¹¹ Ara nguno, lagokyuk, keer kiit ne yaei kagoochinoigap toreteet ak ogeer ng'emisyet ne kanyei icheek che tetyin alak yaityet! Ago nguno ko wendi sabeennyu kogesugei.” Ki imogon Tobit anyun eng' itogunnyi, ak kome ineendet; ak ki igoochi yaitaet ne po teegisto ne oo.

Meetap Tobit ak Annah

¹² Kingo me agine kametap Tobias, kotupchi ineendet ye neegitee ole kigatupchi kapyugoinyi. Ki ng'eetyo anyun ineendet ak kwondonyi kobooto lagok koweek agoi Media ak komeng'iis eng' Ekbatana kobooto Raguel kwandap osotyonnyi.

¹³ Ki riip komyee sigiik che kisiche kwondonyi eng' koonyit ne oo eng' oosindanywa, ak kotup icheek eng' Ekbatana ne po Media. Ki indi anyun tuguugap Raguel ak che po kwandanyi Tobit

¹⁴ Kime Tobias ko po kenyiisyek pogol ak taman ak tisap.

¹⁵ Kingo tomo kome ko kiga kogas agobo ng'emisyetap Nineveh. Ki keer kimonororinik kimutu kobwa Media, chooto kiga konam Laitoryat Cyaxares ne po Media koek luulenik. Ki ilas `Tobias Kamuktaindet amu tuguuchooto kiga koyachi piigap Nineveh ak Assyria. Ki paibait agobo Nineveh kotoom kome, ak ki itoroor Kiptaiyat Kamuktaindet koigeny ak koigeny. Amen!