TOBIT 10:7 - BUKUIT NE TILIIL Sireet ne Dutero Kanon Kowolji `Annah ineendet koleenji, “Siis inyeendet! Pagaakta, amat ityem ing'aalaa. Kogome lakweennyu.” Ki cham komandoi kochaaktoi peetuut age tugul kole kooro ooreet ne kigabun weeriinnyi, ak ki ma koepchin iit chii age tugul. Kingo rorokto asiista koweek kwo kaa ak koriir kemout komugul, ak ki ma sichei rwondo agot kitigin. Ye kingo keskei peetuusyek tamanu ak ang'wan che po igoortap katunisyet che kiga iyasyo Raguel kole keyai agobo cheptonyi, konyonji `Tobias ineendet ak koleenji, “Iyookto aweektagei, amu angen ale ma koyani kwandanyu ak kamennyu kole ta kogeera kogeny. Asoomin anyun abba ale chamwa awo si amuuch aweekyigei kwandanyu. Kaasip aaroorun agobo ole ki abagaakte ineendet.” |