Philippians 4:6 - ASII LAKDAP Bible (BSI)

⁶ Jamphan miitu min naq chapa rongkiq she. Namshiq ma jamlai phan wa raa tlaq, kra Shiikeawe ma, achu jaü maq chong ronglaq. Wranaiqshe, apaiq ma kechutum lanta, achu jaü ronglaq.

Hawa Naga Bible 2001

⁶ Yvmx lvmz nuex ngoz ruiux muinz nauk rvwvl japa kaz, yuq muinz lvmx ruip saz nuex vjux thoz vtueq kvjungc ruiux kejux rvwvlc thuinz vmungx maq tvtsvmc vtueq, nuimshiq muex rax yaq lvmx kuex Tishox muex tvtay shuinz.

Muklom

⁶ Chamlang raaq ma tho nak tathin inn, etharin thaji raaq shima romtam chu inn, etho kechu ajong kot eq nim raaq shi Shkewa ma bat inn.

Philippians 4:6 Referencias Cruzadas

1 HOKHVMX 8:28

Tatiwe i Shiikeawe lei, ngi ka ümjaqshi se. Ngi achujaü ara trekuq laq. Laüta ümchaü ranaiq ngi raq achu jaükang thun ara tre kuq laq.

2 KAÜWA WERAÜ 32:20

Kiijiishe Hokhamwe Hejekia nai shammiwe Isaia, Amos se raq Shiikeawe jaq wa khrum jaü jaü achu jaüto.

Tvtsvmc 51:15

Ngi ma bom chongke khrumlaq, Tatiwe lei, raüla ngi raq ümnaq mitiitsamkang.

Tvtsvmc 55:17

Ranap na, ranaiq shethung na, kiimaq rawa na ngi raq shoktiikang kiimaq hannyi tiikang thun ka apaiq phana ra na wawantlo, krai mren apaiq raq ibom ka mitai.

Tvtsvmc 55:22

Üm chamchao ka Tatiwe ma kuqlaq, raüla apaiq raq ümniika mitiiwongkuq; apaiq raq mitting maiqsetiim ka re ma tiitang mak phan.

Tvtsvmc 62:8

Wranaiqshe Shiikeawe ma kam ronglaq, isenginok lei. Namshiq chamchao thun wiita apaiq ma chong ronglaq, apaiq kata nashiq tiiwongtiip.

TAKSU LAK 15:8

Maiqshaqti raq achu jaü raüla, Tatiwe ka chochikhiq; shatmaq abi ati maiqse raq, apaiq ma honglu atakuq ka, apaiq raq saisitlo.

TAKSU LAK 16:3

Ümniiraq jamlai sham-akai wa sürii tlaü, Kra Tatiwe ma kiinong kuqlaq. Raüla ümniiraq jaqsham ka mi ong haü.

ASHICHONG 2:14

Ümshamhea ka haütaü ikha, Longraqkam na atiipaü nga ikha. Ümtheaphi tsomhea liipha na. Ümbom sumhea atsaisea ma, ümmaklii min tsomhea tsomhea.

JEREMIA 32:16

Ngi raq kra hiqri lakjaq kom ka Barukh ma kuq latiishe ngi raq akha achu jaükang,

JEREMIA 33:3

“Ngi healaq, raüla Ngi raq mitre kang; Ngi raq ümniima awang chang thun kiimaq amao chang thun ümniiraq khonlot maü phan kra michong kuq kang.

DANIEL 3:16

Kiijiishe, Shadrakh, Meshakh kiimaq Abednego raq treto, “Chaü lei, ara miitu ka naitsam raq maiqmii khum tiikhe bom chang ka ahü.

DANIEL 6:10

Riita, Daniel raq kra aming ka khatto she nguta tho lapto. Apaiq ka ajam na wawanto. Raüta apaiq jam rathong khok na kitanpu thun kilü tlinshat asi riito. Kra kitanpu thun ka Jerusalem chela nü na tiinyi raqraq riito. Kitanpu thun tlin shat kiijaq walili raüta, rahinjaq ratili na jamkho achu jaütlaq kiikha, ranaiqshi na jangtsamtsam kaütsrong na nga raüta Shiikeawe jaq wa achu jaüto.

Matthew 10:19

Ümtiikiiwa namshiq ka rung na tiichap wantlaq, kra akhing na tsangshiq bom ka jamkhii tre chang wa miraq nguta tiima lanta akhiismin naq chapa rongkiq. Kra akhing na namshiq khum tiichhii miitu jamlai bom chong chang wa miraq, kriika Shiikeawe raq namshiq ma achong mirkuq.

Matthew 13:22

Tsamlai kiimko rang babaiqhü ba na arokti kriika, maiq ümriiti riiwa Shiikeawe bomtsi ka tai raüta kamtsantsii ka thü wantlaq. Shatmaq mangjong han-ngam miitu chapa sang ka cham wan raüta kiimaq tsiiq nai nyam ma ranphan tsantsii sang kra cham raüta, tsangshiq kamtsantsii ka tiijong lap mak kaqbaiq tlo. Kriikha miishe tsangshiq kamasham rilung ka atsi ango min ahü miili she mokitlo.

Matthew 6:34

Arkha maq anap miitu ka naq chapa rongkiq. Anap miitu ka anaptiq tiima wan chang. Aranaiq holai jamlai wa sitlaq, kriili howan lili ronglaq.”

Matthew 6:8

Tsangshiq raq jaü tlaq kiikha naq jaü rongkiq. Nam We Shiikeawe raq namshiq ma jamlai wa ra tlaq kriika namshiq raq mijaü shaq niili, apaiq raq asap wishe dongdii.

Luke 10:41

Kiijiishe, Tatiwe raq apaiq ma treto, “Martha, Martha, ümniika phanrap phanrii tiima laüta, acha apa kiimaq tsaihü jihü sitlaü.

Luke 12:22

Kra chongkuq lot raütiishe, Jesuq raq ajaqshisetiim ma akha chongkuqto, “Arkha maq tiina, ngi raq namshiq ma chongkuq tiipha ara. Atra maq siwan miitu, dungjada ra tlaq kra nai khum tiikhe chang khu akhea ra tlaq kra miitu, namshiq ka naq chapa rongkiq.

Luke 12:29

“Riita ara chong tiikang arai mren, namshiq ka jamlai wa miphaq siq rong i nguta, naq chapa rongkiq.

Luke 18:1

Kiijiishe, Jesuq raq ajaqshisetiim ma tsangshiq ka wranaiqshe achu jaü ruq sichang kiimaq ümtiikaq ranaiq jiimin tsaiji tran ra mak nguta tsii chongkuqto. Apaiq raq kra tsii chongke bomtsi ka ara shiiton manphan armaq chong kuqto. Manphan ka ara.

Luke 18:7

Ikhiijiika, Shiikeawe riika, asengi raq ranaiq rawa hoq raüta, achu jaü tlaq, kriiti ka tiiwongke miitu tsangshiq kha ka phokuq mak sha miraq? Apaiq raq tsangshiq ka jaqlolo maq khrum kuq mak sha miraq?

1 Corinthians 7:21

Ümniika Phung na shang laü akhing na dise sha riilaü? Ikhiijiila, ahea jam raa mak. Shatmaq ümniima miikiimse ma jawan akhing asi jiika aheasii hali; dongkikiq.

1 Corinthians 7:32

Ngi raq namshiq ka akha acha apa mong wa binlu binli sihan jaq ahea riichang nguta tiima tiikang. Noriiwe, achak lamhüti riika, atsan atsii ka Tati jaqsham na kiinong tlii mikuq lot. Ara jamkhano chongtiikang ngukla, apaiq raq Tatiwe tsan tiihea miitu atsan atsii ka tiitsi raüta jaq misham lot.

2 Corinthians 1:11

Arka namshiq raq naishiq miitu achu jaü kuq tlan kriikha maq mitiichhii kuq. Kiimaq Shiikeawe raq naishiq ma achu mishman kuq. Krai mren, maiq ahinti pahea raq naishiq miitu Shiikeawe ma kechu mitum kuq wan.

Ephesians 5:20

Tati Jesuq Khristo mang maq, Awe Shiikeawe ma, phanrap phanrii miitu, wranaiq she, kechutum ruq si ronglaq.

Ephesians 6:18

Riita ara chongtiikai thun arka, achu jaü lantli sham ronglaq. Shiikeawe raq mikhrum kuq. Asii Wenyi raq shunshea tlaq kra phanphan, jaqsham aweatek na, achu jaü lanta sham ronglaq. Arningkhan, honkam shat maq sirong laq. Ümtiikiimin naq thaq rongkiq. Wranaiqshe Shiikeawe sengi miitu achu jaüshat maq sirong laq.

Colossians 3:15

Khristo raq namshiq ma sanglili tsantsii kuq tlaq kriika, namshiq raq jamlai phan sham akai wa riichong tlan akhing na, athuk atsom wiq maq bom shat miitu kuqto. Ara jamkhano chongtiikai ngukla, Shiikeawe raq namshiq hea wantaq kriika, ara kaütak rishi maq, adam na tushi na triitam hea wanto. Kiimaq Shiikeawe ma kechutum shat maq sirong laq.

Colossians 3:17

Ümchaü sanha, namshiq raq, na We Shiikeawe ma kechutum tlan na, abom na kiimaq phanrap jaqsham tlan na, Jesuq Khristo mang niili she sham rong laq.

Colossians 4:2

Achu jaü ka teptep maq jaü ronglaq. Jamlai wa jaü tlan, kra tsan na tiitsang shat maq jaü ronglaq. Kiimaq Shiikeawe ma kechutum shat maq si ronglaq.

1 Timothy 2:1

Riita arkha maq, nashiq wiitarü ma reng pinthum jaqsham chang ka, Shiikeawe ma tiihaisong shat maq siwan tsantsii nai phanrap lam phan na, tiima tsantsii ka asii maq, khusang rakhang maq siwan miitu, Shiikeawe ma achu jaü wan nai kechutum wan laitli siwan chang. Nashiq achu jaü na, maiqse angu tarü ka tlom laita, Shiikeawe ma kechutum chang.

1 Timothy 5:5

Ata awiiti wa maiq apaiq liike wanti jumin ahü she, manti-nyung sitlaq kriiti riika Shiikeawe jaq lii raütli she sitlo. Apaiq ka ranaiq rawa achu jaü lam miili she sitlo.

1 Peter 4:7

Phangthum akhing ka saü wanto she. Namshiq tarü mit asii maq sirong laq. Kiimaq honkam shat maq sirong laq. Achu jaü shatmaq sirong laq.

1 Peter 5:7

Ümchapa hekiilai ümchuwa sitlaq kra apaiq ma phong kuqlaq. Jamkhano ngukla apaiq raq ümnaq shiikum pantlo.

1 SAMUEL 1:15

Kiijiishe, “Riimak, ngi ka chephe riimak, shiilangwe lei,” nguta apaiq raq treto. “Ngi raq che ka nyang mang! Ngi ka pinthum chamchao ümkhla min jasiq mang. Kra ningkhan ngi raq ngi chamchao ka Tatiwe ma raükuq lata achu jaütiikang.

1 SAMUEL 30:6

Dawit miika pinthum chamchao chapa jonghea akhing ashi riito. Jamkhano ngukla asengibi thun ka tsangchak tsangsetiim re raq tsuq wan kiita, tsangshiq tsankhiq bisi tsi miishe, Dawit apaiq kriimin long maq tiiq raüta tseabaiq wan ngutiishe tankhanto. Shatmaq Dawit Tatiwe, apaiq Shiikeawe raq, Dawit ma ningkun shoqkuqto.

1 SAMUEL 7:12

Raütiishe Samuel raq longkaü ashi do raüta, Mijpa chela nai Shen chela liipan na shongto. Raüta akha nguto, “Tatiwe raq namshiq ka lam wiilülü khrum kuqto.” Raüta kra apaiq raq, “Kra longkaü ka Khrum Longkaü,” nguta mangto.