2 Peter 1:6 - ASII LAKDAP Bible (BSI)

⁶ Namshiq raq han-ngam ramho ka anin lanta sichang raa tlo. Kiimaq phanrap chamchao, maitai, haikaiq haike saü tlaq kiimin wiita, tsan tiibum lanta nin wan ruq maq sironglaq. Lanta, namrilung ka awongsii Phungmaiqse rilung ma tiija ronglaq.

Hawa Naga Bible 2001

⁶ phaqjic nuex miqmac shauk gvnz ruip rux nuex nanx lvmx muinz, vnanx lvmx nuex tvrac tvtsanc lvmx muinz;

Muklom

⁶ Thunglam jamoq tinthanan shi tachat loi inn, tinthanan jamoq tinthaman shi tachat lot inn, tinthaman jamoq Shkewa mal dangjang shi tachat lot inn,

2 Peter 1:6 Referencias Cruzadas

RAPHA HIQWA LAK 5:24

Apaiq raq arilung ka Shiikeawe rai rintiishi maq sito. Raüta apaiq ka amoshe riikito. Jamkhano ngukla Shiikeawe raq apaiq ka shea wanto.

Tvtsvmc 37:7

Tsankhun maq khelaq laüta Tatiwe ma jaq ka tiishamlaq; juwa chiithe lüwa jarai wantlaq kra chhilaüta naq chaparaikiq riimakla jurwa abi kiimung raüta ongraitlaq kra miitu naq chapakiq.

ISAIA 57:1

Maiqshaqti ka tsaitlo. Shatmaq jurmin tak mak. Kiimaq jurmin broriimak. Shatmaq ümtiikiiwa tsangshiq she tsaitlaq, jamlai chamchao sangrai riimin tsangshiq ka tiichamchao lot mak she.

Luke 21:19

Namshiq jaqkhon ka naq tiihiim rongkiq. Pharang rang maq chap wan ruq li si rong laq. Kra riihan jiila, namshiq raq riikhaqli maiqmii rilung kra milap wan han.”

Luke 8:15

Tsamlai hiqngam ba na arokti ka ara. Maiq ümriiti riiwa, Shiikeawe bomtsi ka tai raüta, tsan mong na tiitsang dada maq rümtlaq, raüta thaq mak phan maq lang tlaq kra chongtlo. Raüta, atsi ango ka dong mantlo.”

Acts 24:25

Shatmaq Paul raq apaiq rai riibom lam maq, kechu rilung, stiq skhaq rilung, kiimaq jai na saüho tlaq Phangthum Khapho Ranaiq wa bom thun kra phanchan chongkuq wan lili riitlo. Kriikha maq, Phelisk ka ahaisi min asi riito. Kriikha maq, “Ümniika ümchaü atiido wan mimai. Ngi raq ümtiikiiwa akhing milap ha kiitiikiitiq mitiihea nong kang” nguta chong kuqto.

Romans 15:4

Riita, ara chong tiikai arai mren, Tongshong Chü na ümchuwa waiq wantaq, kriika, nashiq ma sungkhu tsiilam tiichhike wan miitu waiqto. Arka, Asii bomtsi na waiq wantaq, anin wan bom chong tlaq kra nai tsaijido kewan, tsii chongkuq tlaq kra lümaq, nashiq raq rawiichii rilung miitu, ran tsantsii rüm tiikai kriika, milap rong i dongdii she nguta, mongngam maq siwan miitu waiq thüto.

Romans 2:7

Maiq wiijamti riika, nok ma bin ma shamhea kaiwa, asap ada jaqsham kli shamkuq wan ruq sitlo. Kiimaq Shiikeawe jaq wa, asii khushü nai shreng manto kiimaq tsaiki mak phan tsitsü rilung kli rit wantlo. Tsangshiq miika, Shiikeawe raq pattup pat-sa rilung mikuq.

Romans 8:25

Shatmiitiq, nashiq raq na mak maq, jamlai phan wa chhi mai sitlaq, kra phan kra miitu, nashiq raq ran tsantsii thü wan tiikai. Ara ran tsantsii thü wan tiikai arka, mongngam maq milap wan rong i she dongdii nguta, tsan tiibum laita khewan tiikai.

1 Corinthians 9:25

Phanrap atochang phan na maiq arlong laa wanti sitlaq kriika tsangshiq ma shrinke liipan bala, pinthum thungtri atsin maq shrin kuq tlo. Arka athen kai chang poksi khushü dong chang khuphok lap wan kra miitu riilong tlo. Shatmaq nashiq riika, pattup thenki mak phan poksi lap miitu sham tiikai.

2 Corinthians 6:4

Naishiq raq ümchuwa jaqsham tiikai na, litkot chamchao, athaiq alaiq kiimaq asiq areng ümchuwa riihum wan tiikai ka, tsan tiibum laita nin wan tiikai. Laita ara nin wan tiikai ara lümaq, naishiq ka Shiikeawe jaqshisetiim dea nguta nokwe man na, tiichhi kuq wan tiikai.

Galatians 5:23

sobsob bombom, kiimaq kai stiq skhaq raüta shonga rilung. Ara chong kai thun, Asii Wenyi raq maiqse rilung na, tiitsi kuq tlaq arka, abi nguta tiishut chang thungtri ka ahü she.

Colossians 1:11

Apaiq raq namshiq ka, apaiq ningkun achhai anyii rüm tlaq kriimaq, srea laqkong miidea mija laq nguta naishiq raq achu jaü kuq tiikai. Kra raütiq, namshiq raq phanrap haikaiq haike ümchuwa saü tlaq kra wiita minin wan lot han. Kiimaq namshiq raq chojong chise maq, Awejong Shiikeawe ma kechutum ronglaq. Shiikeawe raq jamlai wa tiije wantaq, apaiq phan amaq maiqse thun miitu, rawü mungtan na thü tlaq kra lap wan dam miitu namshiq ka seshaq ma tiija kuq wanto she.

1 Thessalonians 1:3

Naishiq raq, namshiq ka, na Shiikeawe kiimaq Nawejong Shiikeawe man na, namshiq raq kamtsantsii ka jaqsham ma shiitai tlan kra miitu, kiimaq Shiikeawe ma lungwiitsii rüm tlan kriikha maq, Shiikeawe jaqsham ka pinthum shiichaq lanta sham tlan kra miitu, kiimaq namshiq raq, nashiq Tati Jesuq Khristo ma ran tsantsii thü tlan kra, pharang rang maq thü tlan kra miitu, Shiikeawe man na, laq maiq maq achu jaü tiikai.

2 Thessalonians 1:4

Arningkhan, naishiq raq namshiq tsa ka, Phungmaiqsetiim ahin na sitibi man na, shomra siq tiikai. Maiqse raq namshiq ka ümtinkhan wa tiichamchao tlo. Shatmaq, namshiq raq kamtsantsii ka apha maq, tsan tiibum lanta, tsankhun maq litkot chamchao thun saü tlaq kra, wiita nin tlan. Namshiq kamtsantsii apha maq sitlan kra chhi laita, naishiq raq namshiq ka nanok Phungmaiqse ahinti man na, kai somra tiikai.

2 Thessalonians 3:5

Shiikeawe raq namshiq lungwii tlaq kra, namshiq raq atsaü maq khon wan miitu, Tatiwe raq namshiq ma taksu tsii kli apa mikuq laq nguta kiimaq, Khristo raq namshiq ma anin wan ningkun ka apa kuq wan ruq mirlaq nguta, achu jaükuq tiikang.

1 Timothy 2:10

Shatmaq, jechakre nyungre miika, tsangshiq raq shamhea kaiwa, athuk atsom jaqsham tlaq kra miitu, nanok raq tsangshiq shomra tlaq kra kata, tsangshiq ma athuk atsom, rahea phan miirii. Arkata, tsangshiq ma riikhaqli Phungmaiqse nyungre kamasham rilung miirii.

1 Timothy 2:2

Mangjong hiq na mung rümti, honyung hokhambi sitlaq kra miitu, kiimaq mung welabi, lüsi lüwabi ajong alabi ümchuwa sitlaq kra miitu, achu jaüke chang. Akha achu jaükuq tiikai arka, nashiq ka Shiikeawe shreng laita, awokhong na athuk atsom maq, khusang rakhang maq shongnga wan miitu jaütiikai.

1 Timothy 3:16

Nashiq raq kam tiikai tengteng bomtsi manphan ka, nashiq ma tiichhi kuqto she. Arka pinthum maiq mao chang manphan: Khristo ka mangjong hiq na maiqse ma pokito: Apaiq ka amaa wa dong wanto. Raüta apaiq ka TATIWE dea nguta tiichhi kuqto. Apaiq raq rasetiim kunli peng tlo. Asengi Phungmaiqse raq apaiq tsa ka barap na chongkuq wanto. Krai mren mangjong maiqse pahea raq apaiq ma kamwanto. Apaiq ka Shiikeawe rai siwa wawanto.

1 Timothy 6:11

Shatmaq, ümniika Shiikeawe jaqshise. Krai mren, ara chongtiikai ngarai rahai thun arka ümdü na naq tiisaükiq. Ümniiriika wranaiqshe, Shiikeawe raq jamlai jaqsham wa thikuq tlaq, kriili sham wan ruq maq si laq. Laüta, athuk atsom Phungmaiqse kechu rilung kra riikhaqli maq silaq. Khristo ma kamwan ruq maq silaq. Laüta, Phungmaiqse phunaino thun kra lungwii laüta, silaq. Laüta, phanrap haikaiq haike ümtinkhan wa saütlaq, kra anin riilaüta silaq. Kiimaq nanok tarü rai sobsob bombom maq silaq.

1 Timothy 6:3

Phungmaiqse liipan na, nashiq Tati Jesuq Khristo raq achongkuq kamtsantsii bomtsi, kiimaq nashiq Khristan kamasham tingting tri raü ka jin raüta, lamhin, ajiq lamphan shrinketi, arot shrabi maiq asi.

1 Timothy 6:6

Tsiiq anyam maiqmii jaq na ümchuwa asi, kriili hong raijiiq nguta, tsantsii asii maq siti miika, kamasham rilung ka chiithe jong rilung ashi.

2 Timothy 3:5

Tsangshiq ka rakhütsiri na Phungmaiqse nguta mitiingo. Shatmaq, tsangshiq rilung na, tsangshiq chap anga maq, tsangshiq kamasham ka hiqtili ikhli mitiija baiq. Ümniika akhnok maiq rai ümtiikiimin naq lom damkiq. Ümniika alu na hailaq.

Titus 1:1

Ngi, Paul, Shiikeawe jaqshise kiimaq Jesuq Khristo kiimwe raq waiq tiikang. Ngi ka tsea wanto raüta tiiwato Shiikeawe raq atsea wan asenginok kamasham kra khrumke wa miitu. Kiimaq tsangshiq ka nashiqnok kamasham lamphan na shrinkuqtlaq tengtlaq bomtsi kra tiisapke wan lan na shunshea wan miitu.

Titus 1:8

Apaiq ka, wanwe shiiliti riichang. Kiimaq jamlai wa ahea sitlaq, kra phan jaq shamti riichang. Apaiq ka phanrap anin raüta sitiwe riichang. Mitting maiqse ashi riichang. Apaiq ka, akhum Shiikeawe ma kiinong raüta siti riichang. Kiimaq phanrap na athuk atsom shiiting shrai raüta, shiiku wan wan maq sitiwe riichang.

Titus 2:2

Maiqlare ma tsii chongkuq ruq riilaq, tsangshiq ka maiqla nguta kamto maq misi laq. Tsangshiq ka phanrap na taksu maq sichang, kiimaq phanrap ka anin raüta sichang. Tsangshiq kamtsantsii ka awongsii mirüm laq. Kiimaq nanok ma lungwiitsii rüm tlaq kriika, khangriri hea maq mirüm laq. Kiimaq phanrap na, nin wan ruq maq misi laq.

Hebrews 10:36

Shiikeawe raq thikuq tlaq kra jaqsham ma jiila, namshiq ka tsankhun maq, tsan tiibum lanta, jaqsham shiichaq wan ruq chang li. Kra riihan jiitiq, Shiikeawe raq mikuq ha nguta kiqkham kuqtaq poksi kra milap han.

Hebrews 12:1

Riita, ija ümchaü sanha, nashiq trotam na, nashiq kamasham rilung na, nashiq ka jamkho shongnga tiikai, ara liiwanti, maiq hakhi bi ara chong wankai thun ara asi. Krai mren, ümchaü sanha, nashiq khum na tiibanbi chang ngarai, tiima tsantsii ümchuwa sitlaq kra thun ka wiita, chhut baiq thütlo wan rong i. Laita, kamtsantsii rilung na, ajong alu wan miitu, ümloq na saü li ju chang wa, kiijaq saü wanli chang miitu, shiikut laita ju rong i.

Hebrews 6:12

Ngi raq namshiq ka, roknin riishin ma tiija ka romang. Shatmaq ngi raq namshiq ka, Jesuq ma kamti maiqsetiim dea nguta, kamasham lamphan na, jaqkhon tiipha tiipha maq siti ma jawan kra lungwii tiikang. Raüta, Shiikeawe raq mikuqha nguta, kiqkham raüpot khakuqtaq kongphiq kra lap wantiiti bi, kiikha namshiq min si ronglaq nguta tiitai tiikang.

Hebrews 6:15

Krai mren, Abraham raq, pinthum maklii khamthii maq, Shiikeawe bom ma kam raüta, kongphiq kra lap miitu khewanto. Raüta, Shiikeawe raq akhamkuq kongphiq kra, apaiq raq lapto.

2 Peter 1:3

Khristo raq, apaiq asii ningkun lümaq, nashiq ka awongsii Phungmaiqse rilung siwan miitu, ningkun ümchuwa raa tlaq kra kunli kuqto she. Khristo ka nashiq ma tsanwa we she nguta sap tiikai ara lümaq, asii ningkun kra lap wan tiikai. Apaiq raq nashiq ka apaiq asii kechu rilung khushü pülii tlaq thun kra riishake miitu hea wanto.

2 Peter 3:11

Riita ümchaü nashiq raq asap i, ra nai hiq arka, arjaq chongtlaq akha wiita ashthen mirbaiq. Riita arkha maq, namshiq ka asii kechu maiqsetiim nguta, Shiikeawe ma khum kiinong kuq lanta, apaiq wokhong na tingting maq sichang.

Revelation 1:9

Ngi ka Johan, namshiq kongti phunowe. Ngi ka Jesuq wokhong na siti kha maq, namshiq ma jamkho tiichamchao tlaq, kiikha ngi miimin tiichamchao tlo. Nashiq tarü ka, Khristo mungtan la she sitiikai. Krai mren, nashiq tarü raq, chamchao litkot saü wan tlaq arka, tsan tiibum laita nin wan ruq maq sichang li she. Ngi raq maiqse ma, Shiikeawe bomtsi kra chiiriim lata chongke wan kha na nai Jesuq hakhi kewan kha na, tsangshiq raq ngi ka, ara khamjong mong hiq Patmos mung na, phaqtek na shaqto.

Revelation 13:10

Juwa re raq lap chang, kriika kamto milap wan dongdii; juwa atseabaiq chang; kriiti ka nepja thaq maq tengteng mitsai dongdii. Arka Shiikeawe sengi raq, anin chang raüta kamtsantsii pharangrang maq si miitu tsii chongtlo.”

Revelation 14:12

Arningkhan, Shiikeawe sengi bi, Shiikeawe wokhong na sitibi ma, kiimaq Jesuq wokhong na sitibi raq anin wan chang raa tlo.

Revelation 2:2

Namshiq Ephisia na siti Phungmaiqse raq jamlai wa sham lan, kriika ngi raq asapha. Namshiq ka pinthum jaqsham shiikut chaq wan tlan. Kiimaq namshiq tiichamchao wan taq kiimin tsan tiibum lanta nin wan lan. Ngi raq asapha, namshiq raq maiq abi lamphanti, namshiq phana awa ka ninlot man riilan. Kiimaq jurwa kiimwebi jatiikai nguta, namshiq makki na tiichan ne wi taq, kra namshiq raq chechiip lan. Lanta, tsangshiq ka awong riimak, achhü nguta sap lan.