Apocalipse 15:4 - Kaxinawá Bíblia (BR)

⁴ Mia besti meribi hiwea mĩ kaneisma unãkĩ yurabu betsa betsapa dasibibũ mia yui mesewai datebetanã duawakĩ mia kẽwãshãkanikiki, mĩ pepawẽ kaneama mĩ akubaĩmiswẽ taeshunã”, akaibũ

Kashinawa : Diosun Jesúswen taexun yuba bena yiniki

⁴ Mia besti medibi jiwea min kaneisma unankin yudabu betsa betsapa dasibibun mia yui mesewai datebetanan duawakin mia kenwanxankanikiki, min pepawen kaneama min akubainmiswen taexunan”, akaibun

Apocalipse 15:4 Referencias Cruzadas

Salmos 22:23

Dasibibũ mã Senhor Deus duawamisbuũ, matũ huiwẽ kẽwãkãwẽ. Dasibi Jacó enabuũ, Senhor Deus pepawakĩ ewapawakãwẽ. Dasibi Israelĩ enabuũ, Senhor Deuski mesekĩ kẽwãkãwẽ.

Salmos 22:27

Senhor Deusrã, ha nukũ shanẽ ibu kayabiki. Mae pakea tibi hatu shanẽ ibushũmiski. Haskawẽ taeshũ mai hirabi anu hiwebaunabu yura betsa betsapa shukuabũ Senhor Deus shinãtã ha bebũ dãti ishũ hau kẽwaĩ beshanũbũwẽ.

Salmos 22:3

Hakia miarã, meribi hawa txakabu mĩ hayamaki. Mĩ hatu shanẽ ibushuna Israelĩ enabũ mia kẽwãkubaĩkanikiki.

Isaías 45:23

Emebi hãtxai yubakakĩ hawẽ maemakĩ binumati ẽ yuimisrã, ha ẽ yubakani hãtxarã, ẽ meneshanaii. Eskashãkanikiki: Dasibibũ ea kẽwaĩ ea bebũ dãti itã, ‘Mia besti mĩ Deuski’, ikĩ ea datã akĩ

Isaías 6:3

Habu yuinamei hãtxabaũkĩ yuikĩ: “Meribi pepa, pepahaira Senhor Deus kushipahaira nukũ Shanẽ Ibuhairaki. Hatunã, mai hirabi dasibi hawẽ kushipawẽ atxi keyuaki.”

Isaías 60:5

Matũ bakebu beaibu mã uiãyã benima paẽ matu atxia mã huĩti shinã txãkã paepashanaii. Maewã ianẽwã kesha anu hiweshũ mabu pepa itxawaimashũ beshũ matu inãshãkanikiki.

Habacuque 1:12

nĩkatã eã Senhor Deus yuikĩ: “Senhor Deusuũ, ẽ Mekenika Deus meribi mawatiruma mĩ hiwei ikibi ika ẽ unaiĩ. Ẽ Mekenika Senhor Deusuũ, Israelĩ enabu txakabumisbu hau mia hatu kupishũshanũbũ Caldéia nawabu mĩ hatu kushipa waniki.

Malaquias 1:11

Yura shukuabu tibi matunabuma mai hirabi anu manibauna ewẽ datekĩ hanira hiwebaunabu anushũ ea kẽwãkĩ sheni inĩti ea inãkuĩkĩ kuakubaĩkĩ hawara pepa besti ea menushũriamisbuki.

Romanos 15:9

Haska nukukiri bestima mã Israelbumawẽri taea Cristo tashnirianiki. Haskakiraniwẽ taeshũ mã Israelbumã Deus duapahaira mã kẽwãriakubaĩtirubuki. Haska bebũkiri Deusũ hãtxa yuishunika Davi hariri nawai kenekĩ: “Haskawẽ taeshũ nawa shukua betsa tibibũ mia kẽwaĩbũ hatubetã mia xinãkĩ kẽwãkĩ hui kuxipawẽ nawati pepawẽ ẽ mia kẽwãkubaĩshanaii”, iyamakẽ

1 Pedro 1:16

Deusũ Moisés yuikĩ: “Ẽ meribi pepawẽ taea maturi meribiri pepakubaini hiwekubaĩkãwẽ”, ikai nĩkatã keneniki.

Apocalipse 11:15

Ha sete nai tsumabu hawẽ heneatũ trombeta txã akai ẽ nĩkaya nai anua hui kuxipawẽ habũ kẽwãkĩ yuikĩ: “Nukũ Shanẽ Ibu Deus inũ hawẽ bake Messias Jesus Cristo besti natiã mai hirabi anu ha besti shanẽ ibukĩ hatu mekekubaĩshanikiki, niti ikamarã”, ikaibũ

Apocalipse 14:7

hui kuxipawẽ yuikĩ: “Deusũ nai inũ mai inũ iãnẽwã inũ ũpash txatxa tibi damiwanitũ yura dasibi unãti watã na habiatiã hatu kupikĩ taewaikiki. Haskakẽ menã haki dãti itã Deuski datekĩ kẽwãrikãwẽ”, ikainaya

Apocalipse 16:5

nai tsuma hene hatũ mekemistũ Deus yuikĩ: “Mai hayariama mĩ hiweni inũ natiãri Deus meribi hiwemistũ hawa kaneama habis hatu unãti wakĩ mĩ amisrã, mĩ mia besti nũ unaiĩ.

Apocalipse 16:7

hanushũ Deus kẽwãkĩ tapu hanu hawẽ inãkuĩti hanamisbu anushũ tsuãra yuikĩ: “Shanẽ Ibu Epa Deus dasibi binuatuũ, hanuki. Dasibi kuxipayakĩ kaneisma yurabu unãti watã txanima mĩ xinã kayatapiawẽ miã besti mĩ hatu kupiaii. Mĩ pehairaki”, akaya

Apocalipse 19:2

Ha inũ, yura dasibibu unãshũ kaneama kupimiswẽ taeshũ mae ewapa aĩbu hininipa keskatũ yurabu dasibi txakabuwamakubainai ma kupikiki. Ha inũ, aĩbu hininipa keskatũ Deusũ tsumabu tenãkubaĩmiswẽ taeshũ Deusũ hawẽ mae ewapa haki sinata paepakĩ yamawaikiki”, itã

Apocalipse 19:8

Tima tari hushupa txashakapa pehaira ha Deusunabu meribi habũ hatũ xinãwẽ kaneama txibã pewamisbũ hau sawenũbũ, iwanã, hatũ hiwea meribi unãmati ha tari ma hatu inã saweabuki”, ikaibu ẽ nĩkashuki.

Apocalipse 3:7

Ana Jesusũ ea yuikĩ: “Hatũ Deusũ hãtxa yuinika Filadélfia anu itxamisbu mekea na hãtxa ẽ mia yuiai keneshũriwe: ‘Ea ẽ meribi inũ ẽ txanimahaira Davi kuxipa ini keska binua hawẽ bepẽti chave ẽ hayaki. Tsuãra ha mae bepeã tsuã beputiruma inũ ha mae bepua tsuã bepẽtirumaki. Haska mekeatũ ẽ matu yuiaii.

Apocalipse 4:8

hatibu seis pũyã peiya habũ yura hirabi hawẽ berunati txasha dakabũ bariri inũ mexu merã Deus kẽwãkĩ habũ heneisbumã yuikĩ: “Mĩ pepahairaki. Mĩ dasibi kuxipa binuaki. Mai hayariama nukũ Shanẽ Ibu Deus dasibi kuxipahaira hiwea haya inũ, natiã hiwekũkainai inũ, ana mĩ butushanai nũ unaiĩ”, ikĩ

Apocalipse 6:10

habũ hãtxa kuxipawẽ yuikĩ: “Mĩ nukũ Shanẽ Ibu binu keyua meribi mĩ txanima kayabiki. Haskakẽ mai anushũ habũ nuku tenãniburã, hatiã mĩ hatu unãti watã hatu nuku kupishũshanai?” akabu

1 Samuel 2:2

Senhor Deusuũ, tsua meribi mia keska hayamaki. Nukũ mekenika Deusuũ, mĩ nuku mekemis keska tsua hayamaki. Tsuã mia binua ana betsa hayamahairaki.