ПСАЛТЫР 38 - Кнігі Святога Пісання - Біблія - Біблія — пераклад Чарняўскага (выданне 2017 года) Кнігі Святога Пісання - Біблія - Біблія — пераклад Чарняўскага (выданне 2017 года)
ПСАЛТЫР 38

¹ Псальм Давідаў. На ўспамін.

² Госпадзе, не ўшчувай мяне ў абурэнні Тваім і не карай мяне ў гневе Тваім.

³ Бо стрэлы Твае працялі мяне і апусцілася на мяне рука Твая,

⁴ няма нічога здаровага ў маім целе праз гнеў Твой, няма супакою касцям маім праз грахі мае,

⁵ бо правіннасці мае вышэй галавы маёй узняліся, прыгнятаюць яны мяне вельмі, быццам вялікі цяжар.

⁶ Сасмярдзелі і нагнаіліся раны мае праз дурноту маю.

⁷ Сагнуты і прыгнечаны я надзвычайна, цэлы дзень хадзіў засмучаны.

⁸ Бо крыжавіна мая напоўнілася ліхаманкай, і няма нічога здаровага ў маім целе.

⁹ Прыгнечаны і прыніжаны я надзвычайна, роў я ад трымцення сэрца майго.

¹⁰ Госпадзе, перад Табою ўся жальба мая, і ўздыханне маё не ўтоена ад Цябе.

¹¹ Затрапяталася сэрца маё, пакінула мяне сіла мая; святло вачэй маіх — і таго няма са мною.

¹² Прыяцелі мае і блізкія мае сталі наводдаль ад пакутаў маіх, а сваякі мае сталі здалёк.

¹³ І расставілі пасткі тыя, што шукалі душу маю, а тыя, што вельмі жадалі мне ліха, прамаўлялі падступнае і цэлы дзень планавалі хітрасці.

¹⁴ А я, быццам глухі, не чую і, як нямы, не адкрываю вуснаў сваіх.

¹⁵ І зрабіўся я, быццам чалавек, які не чуе і не мае ў вуснах сваіх апраўданняў.

¹⁶ У Табе бо, Госпадзе, надзею маю, Ты выслухаеш, Госпадзе, Божа мой.

¹⁷ Дык вось я кажу: «Хай не пацяшаюцца з мяне, калі хістаюцца ногі мае, хай не ўзвышаюць сябе перада мной».

¹⁸ Я ўжо магу хутка зваліцца, і боль мой заўжды перада мной.

¹⁹ Дык і прызнаюся ў сваёй правіннасці і з прычыны граху майго я ўстрывожыўся.

²⁰ Але непрыяцелі мае жывуць, і яны сталі дужэйшымі, і памножыліся тыя, што ненавідзяць мяне несправядліва.

²¹ І тыя, што ліхам адплачваюць за дабро, нападаюць на мяне, бо іду я следам за дабром.

²² Не пакідай мяне, Госпадзе, Божа мой, не адступайся ад мяне,

²³ спяшайся мне на дапамогу, Госпадзе, Збаўца мой.