ПСАЛТЫР 37 - Кнігі Святога Пісання - Біблія - Біблія — пераклад Чарняўскага (выданне 2017 года) Кнігі Святога Пісання - Біблія - Біблія — пераклад Чарняўскага (выданне 2017 года)
ПСАЛТЫР 37

¹ АЛЕФ. Давідаў. Не зайздросць ліхадзеям і не наследуй тым, што робяць несправядлівасць.

² Бо высахнуць і ападуць яны хутка, як сена і быццам зялёная трава.

³ БЭТ. Спадзявайся на Бога і рабі дабро, і будзеш жыць на зямлі і даглядацца вераю.

⁴ Знайдзі радасць у Госпадзе, і дасць Ён табе тое, чаго патрабуе сэрца тваё.

⁵ ГІМЭЛЬ. Даручы Госпаду свой шлях і спадзявайся на Яго, і Ён здзейсніць.

⁶ І выявіць Ён, быццам зару, справядлівасць тваю, а суд твой — бы поўдзень.

⁷ ДАЛЕТ. Скарыся ў Госпадзе і ўскладзі на Яго ўсю надзею; не зайздросць таму, хто мае шанец на шляху сваім, чалавеку, які чыніць падкопы.

⁸ ГЭ. Перастань гневацца і апануй абурэнне, не будзь зайздросны да таго, што вядзе да ліха.

⁹ бо тыя, што чыняць ліха, будуць знішчаны, а хто спадзяецца на Госпада — зямлю ўспадкаеміць.

¹⁰ ВАЎ. Яшчэ нямнога і не будзе грэшніка; глянеш на месца яго — і не знойдзеш яго.

¹¹ А вось пакорныя ўспадкаемяць зямлю і адчуюць асалоду ў бязмежнасці супакою.

¹² ДЗАЙН. Настаўляе пастку грэшнік на справядлівага і скрыгоча супраць яго зубамі сваімі.

¹³ Але Госпад смяецца з яго, бо Ён ведае заўтрашні дзень яго.

¹⁴ ГЭТ. Вымаюць грэшнікі меч з похваў, нацягваюць лук свой, каб пасцінаць беднага і няшчаснага, каб знішчыць тых, што ідуць правільным шляхам.

¹⁵ Меч іх уваткнецца ў іх жа сэрца, а лукі іх паломяцца.

¹⁶ Лепшая дробязь у справядлівага, чым вялікі дастатак у грэшнікаў.

¹⁷ Бо рамёны грэшнікаў саслабеюць, а справядлівым Госпад надасць сілу.

¹⁸ ЁД. Вызначыў Госпад дні беззаганных, і спадчына іх будзе навечна.

¹⁹ Не пасаромеюцца яны ў ліхую часіну і ў дні голаду будуць насычаны.

²⁰ КАФ. Бо грэшнікі згінуць, і ворагі Госпада змарнеюць, бы зяленіва палёў, змарнеюць, нібыта дым.

²¹ ЛЯМЭД. Грэшнік пазычае, але не вяртае, а справядлівы шкадуе і аддае.

²² Бо дабраславёныя Яго ўспадкаемяць зямлю, а праклятыя Ім будуць знішчаны.

²³ МЭМ. Крок чалавека спасіляецца Госпадам, і ахвотна пойдзе той шляхам Яго.

²⁴ Калі ж паваліцца ён, то не паб’ецца, бо Госпад падставіць руку Сваю.

²⁵ НУН. Быў я малады і састарэў, і не бачыў я, каб справядлівы быў пакінуты і каб дзеці яго прасілі хлеба.

²⁶ Цэлы дзень чыніць Ён міласэрнасць і пазычае, і дзеці яго ў дабраславенні будуць.

²⁷ САМЭК. Ухіляйся ад ліха і рабі дабро, і будзеш ты жыць у вяках.

²⁸ Бо Госпад любіць справядлівасць і не пакіне сваіх святых. АЙН. А несправядлівыя загінуць навечна, і нашчадкі бязбожнікаў будуць знішчаны.

²⁹ А справядлівыя ўспадкаемяць зямлю і век будуць жыць на ёй.

³⁰ ФЭ. Вусны справядлівага спяваюць праўду і язык яго гаворыць тое, што правільна.

³¹ Закон Бога яго ў сэрцы яго, і не хістаюцца яго ногі.

³² САДЭ. Сочыць грэшнік за справядлівым і імкнецца забіць яго.

³³ Але Госпад не пакіне яго ў руках таго, не асудзіць яго, калі тыя будуць асуджаны.

³⁴ КОФ. Чакай Госпада і пільнуй шлях Яго, і Ён узвысіць цябе, каб атрымаў ты ў спадчыну зямлю; калі будуць знішчаны грэшнікі, ты ўбачыш.

³⁵ РЭС. Бачыў я бязбожніка, які надзімаўся ад пыхі і ўзвышаўся, быццам кедр зялёны,

³⁶ і я прайшоў міма, і вось не было ўжо яго; і шукаў я яго, а ён не знайшоўся.

³⁷ СІН. Назірай за бязгрэшным і глядзі на справядлівага, бо будучыня належыць чалавеку міратворцу.

³⁸ А несправядлівыя згінуць разам, будучыня бязбожнікаў будзе знішчана.

³⁹ ТАЎ. Збаўленне справядлівых у Госпада; і Ён абаронца ў час бяды.

⁴⁰ І ўспамагае ім Госпад, і вызваляе іх, і вырывае іх ад бязбожных, і збаўляе іх, бо яны хінуцца да Яго.