ПСАЛТЫР 36 - Кнігі Святога Пісання - Біблія - Біблія — пераклад Чарняўскага (выданне 2017 года)

¹ Кіраўніку хору. Давіда, слугі Госпада.

² Нашэптвае несправядлівасць бязбожніку ў самым сэрцы яго; няма страху Божага перад вачамі яго.

³ Бо ён патурае сам сабе перад сабою, каб не шукаць несправядлівасці сваёй і каб не ненавідзець.

⁴ Словы вуснаў яго — несправядлівасць і хітрасць, перастаў ён разумець, як чыніць дабро.

⁵ Задумаў ён несправядлівасць у пасцелі сваёй, узыходзіць на любую благую дарогу, да ліхога не адчувае нянавісці.

⁶ Госпадзе, да неба міласэрнасць Твая і праўда Твая — да аблокаў;

⁷ Справядлівасць Твая, быццам горы Божыя, суды Твае — вялізная бездань: людзей і жывёл Ты збавіш, Госпадзе.

⁸ Як жа незлічона міласэрнасць Твая, Божа! Сыны ж чалавечыя будуць мець надзею пад покрывам крылаў Тваіх;

⁹ нап’юцца яны дастаткам дому Твайго і поіш Ты іх струменем асалоды Тваёй.

¹⁰ Бо ў Цябе крыніца жыцця, ды ў Тваім святле ўбачым мы святло.

¹¹ Пашыр міласэрнасць Тваю на тых, што ведаюць Цябе, і справядлівасць Тваю — на тых, што простыя сэрцам.

¹² Хай не топча мяне нага пыхлівага і рука грэшніка хай не дакранаецца мяне.

¹³ Вось жа паваліліся тыя, што чыняць несправядлівасць, — выгналі іх, і не змогуць яны падняцца.