ПСАЛТЫР 90 - Кнігі Святога Пісання - Біблія - Біблія — пераклад Чарняўскага (выданне 2017 года) Кнігі Святога Пісання - Біблія - Біблія — пераклад Чарняўскага (выданне 2017 года)
ПСАЛТЫР 90

¹ Маленне Майсея, чалавека Божага. Госпадзе, Ты стаўся нам прыстанішчам з пакалення ў пакаленне.

² Перш чым паўсталі горы і нарадзілася зямля і сусвет, і спакон вякоў, і на век Ты — Бог.

³ Ты вяртаеш чалавека ў парахно і Ты сказаў: «Сыны чалавечыя, вярніцеся».

⁴ Бо тысяча гадоў перад вачамі Тваімі, як учарашні дзень, які прамінуў, і начная варта.

⁵ Ты аддаляеш іх, і стануць яны сном:

⁶ зранку — як трава, што прабіваецца, зранку цвіце і вырастае, вечарам вяне і ссыхае.

⁷ Бо мы марнеем ад гневу Твайго і ў абурэнні Тваім стурбаваліся.

⁸ Ты паставіў несправядлівасці нашыя перад вачамі Тваімі, цёмныя справы нашыя — у святле аблічча Твайго.

⁹ Бо ўсе нашы дні прамінаюць у гневе Тваім, спыняюцца гады нашыя, быццам дыханне.

¹⁰ Колькасць нашых гадоў — семдзесят або, у здароўі, восемдзесят, а большая частка іх — праца і марнасць, бо хутка праходзяць, а мы адлятаем.

¹¹ Хто зразумеў вялікасць Твайго гневу і сілу абурэння Твайго?

¹² Навучы нас лічыць дні нашы так, каб прывялі мы сэрца да мудрасці.

¹³ Павярніся, Госпадзе, дакуль жа яшчэ? І будзь жа спагадны для сваіх паслугачоў.

¹⁴ Напоўні нас уранку міласэрнасцю Тваёй, і мы ўзрадуемся і пацешымся праз усе дні нашы.

¹⁵ Павесялі нас за тыя дні, у якія прыніжаў нас, за гады, калі мы бачылі ліха.

¹⁶ Хай адкрыецца слугам Тваім учынак Твой, а аздоба Твая — сынам іх.

¹⁷ Хай будзе велічнасць Госпада Бога нашага над намі, і справы рук нашых умацуй над намі, і справу рук нашых умацуй.