ПСАЛТЫР 91 - Кнігі Святога Пісання - Біблія - Біблія — пераклад Чарняўскага (выданне 2017 года)

¹ Хто жыве ў апецы Найвышэйшага і прабывае ў засені Усемагутнага,

² кажа ён Госпаду: «Ты прыпынак мой і цвярдыня мая, Божа мой; я маю надзею на Яго».

³ Бо Ён Сам вызваліць цябе з пасткі паляўнічых, ад нягоднага слова.

⁴ Агорне Ён цябе Сваімі крыламі, і пад пер’ем Яго схаваешся; шчыт і заслона — праўда Яго.

⁵ Не будзеш баяцца жахаў начных, ані стралы, што ляціць удзень.

⁶ Ані заразы, што бадзяецца ў цемры, ані пошасці, што пустошыць апоўдні.

⁷ Хоць падзе пры баку тваім тысяча, а дзесяць тысяч праваруч, ты ўсцеражэшся.

⁸ Сапраўды, пабачыш на ўласныя вочы, і паглядзіш на адплату грэшнікам.

⁹ Бо Ты, Госпадзе, прыстанішча маё, учыніў ты Найвышэйшага паселішчам тваім.

¹⁰ Не падступіцца да цябе ліха і бізун не наблізіцца да палаткі тваёй,

¹¹ бо загадаў Ён анёлам сваім наконт цябе, каб сцераглі цябе на ўсіх тваіх дарогах.

¹² На руках будуць насіць цябе, каб часам не скалечыў аб камень нагі сваёй.

¹³ На змяю і яшчарку наступіш, ды растопчаш ільва і дракона.

¹⁴ Паколькі прытуліўся ён да Мяне, вызвалю яго; падтрымаю яго, бо спазнаў ён імя Маё.

¹⁵ Будзе клікаць мяне, і Я выслухаю яго, у бядзе Я разам з ім, вырву яго і ўслаўлю яго.

¹⁶ Напоўню яго доўгасцю дзён і пакажу яму збаўленне Маё.