ПСАЛТЫР 64 - Кнігі Святога Пісання - Біблія - Біблія — пераклад Чарняўскага (выданне 2017 года) Кнігі Святога Пісання - Біблія - Біблія — пераклад Чарняўскага (выданне 2017 года)
ПСАЛТЫР 64

¹ Кіраўніку хору. Псальм. Давідаў.

² Выслухай, Божа, голас мой у роздуме маім; ад страху непрыяцеля ўсцеражы душу маю.

³ Захавай мяне ад зборышча ліхадзеяў, ад мноства тых, што чыняць несправядлівасць.

⁴ Яны востраць, быццам меч, языкі свае, накіравалі стрэлы свае, атрутныя словы,

⁵ каб употай працяць стралой беззаганнага. Знянацку стрэляць яны ў яго і не пабаяцца.

⁶ Умацавалі яны ў сабе нягодны намер. Змовіліся яны, каб патаемна наставіць сеці, сказалі: «Хто ўбачыць іх?»

⁷ Выдумляюць яны злачынствы, ажыццяўляюць прыдуманыя намеры. Унутранае чалавека і сэрца яго — бездань.

⁸ І Бог паб’е іх стрэламі; знянацку з’явяцца раны Яго.

⁹ І зрабіў Ён бяссільнымі языкі іх. Адвернуць галовы ўсе, хто ўбачыць іх.

¹⁰ І кожны чалавек будзе баяцца; і будуць абвяшчаць справы Божыя і будуць асэнсоўваць учынкі Яго.

¹¹ Узвесяліцца справядлівы ў Госпадзе і будзе мець у Ім надзею, і ўслаўлены будуць усе праўдзівыя сэрцам.