ПСАЛТЫР 63 - Кнігі Святога Пісання - Біблія - Біблія — пераклад Чарняўскага (выданне 2017 года)

¹ Псальм Давідаў. Калі быў ён у пустыні Юдэйскай.

² Божа, Ты — мой Бог, перад Табою я чуваю ад світання. Сасмягла па Табе душа мая, Цябе запатрабавала цела маё ў зямлі пустыннай, ссохлай і бязводнай.

³ У святыні адкрыў я Цябе, каб убачыць магуцце Тваё і славу Тваю.

⁴ Бо міласэрнасць Твая лепшая за жыццё. Вусны мае будуць хваліць Цябе.

⁵ У жыцці маім дабраслаўляю Цябе, у імя Тваё падымаю я рукі мае.

⁶ Быццам тукам і маслам алівы, насыціцца душа мая, і голасам радасці хваліць будуць вусны мае.

⁷ Буду помніць я Цябе на пасцелі маёй, і на золку буду разважаць пра Цябе.

⁸ бо Ты — Успаможца мой, і пад покрывам крылаў Тваіх я радуюся.

⁹ Прытулілася да Цябе душа мая, правіца Твая падтрымлівае мяне.

¹⁰ А тыя, што будуць шукаць пагібелі для душы маёй, сыдуць у апраметныя зямлі,

¹¹ хай загінуць яны ад мяча, пажывай лісаў будуць.

¹² А цар узвесяліцца ў Богу; праслаўлены будуць усе, хто прысягнуў Яму, бо закрыліся вусны тых, хто прамаўляе несправядліва.