ПСАЛТЫР 19 - Кнігі Святога Пісання - Біблія - Біблія — пераклад Чарняўскага (выданне 2017 года) Кнігі Святога Пісання - Біблія - Біблія — пераклад Чарняўскага (выданне 2017 года)
ПСАЛТЫР 19

¹ Кіраўніку хору. Псальм Давідаў.

² Нябёсы абвяшчаюць хвалу Бога, і пра справу рук Яго паведамляе цвярдыня.

³ Дзень перад днём прамаўляе слова, і ноч ночы абвяшчае веды.

⁴ Няма моў і маўленняў, голас якіх не быў бы чуцён:

⁵ па ўсёй зямлі загучаў голас іх, і словы іх — аж да ўскрайкаў сусвету.

⁶ Ён паставіў на іх палатку для сонца, і яно, быццам жаніх, выходзячы з пакоя свайго, цешыцца, як волат перад неабходнасцю прабегчы шлях.

⁷ Ад ускрайкаў нябёсаў — пачатак шляху яго, і схіл яго — аж да іх ускрайкаў, і няма таго, што ўхілілася б ад цеплыні яго.

⁸ Закон Госпадаў бязгрэшны, аднаўляе душу, сведчанне Госпада вернае, што надае мудрасць малым.

⁹ Прысуды Госпада правільныя, пацяшаюць сэрцы, запавет Госпада светлы, прасвятляе вочы.

¹⁰ Страх Госпада чысты, трывае на векі вечныя, суды Госпада праўдзівыя і адначасова справядлівыя.

¹¹ Яны больш жаданыя за золата і мноства каштоўных камянёў і саладзейшыя за мёд і струмяністыя соты.

¹² Бо слуга Твой удасканальваецца праз іх; у пільнаванні іх — вялікая адплата.

¹³ Хто ж разумее свае аблуды? Ад патаемнага ачысці мяне

¹⁴ і ад пыхі ўпільнуй слугу Твайго, каб не запанавала нада мной. Тады буду я бязгрэшны і ачышчуся ад вялікага злачынства.

¹⁵ Няхай жа спадабаюцца словы вуснаў маіх і разважанне сэрца майго перад Табою, Госпадзе, Апякун мой і Збаўца мой!