ПСАЛТЫР 18 - Кнігі Святога Пісання - Біблія - Біблія — пераклад Чарняўскага (выданне 2017 года)

¹ Кіраўніку хору. Давіда, слугі Госпада, які прамовіў Госпаду словы гэтай песні, калі Госпад яго вызваліў ад моцы ўсіх ворагаў яго

² і з-пад рукі Саўла. Сказаў ён так: «Люблю Цябе, Госпадзе, магутнасць мая.

³ Госпад — апірышча маё, і прыстанішча маё. Выратавальнік мой; Бог мой — памочнік мой, і я на Яго спадзяюся; абаронца мой і рог збаўлення майго і апякун мой.

⁴ Паклічу я Госпада, вартага хвалы, і буду збаўлены ад ворагаў маіх.

⁵ Агарнулі мяне хвалі смерці, і віры Бэліяла ўстрывожылі мяне.

⁶ Путы пякельныя аплялі мяне, смяротныя петлі душаць мяне.

⁷ У роспачы маёй клічу я Госпада, і Бога майго прызываю; пачуў Ён кліч мой з храма Свайго, і прызыў мой перад позіркам вачэй Яго ўвайшоў.

⁸ Здрыганулася і затрымцела зямля; зрушыліся і здрыгануліся падваліны гор, бо Ён запалаў гневам.

⁹ Узняўся дым з ноздраў Яго і агонь знішчальны з вуснаў Яго выйшаў; вуголле [агністае] пачало расцякацца з Яго.

¹⁰ Нахіліў Ён нябёсы, і сышоў, і змрок пад нагамі Яго.

¹¹ І ўзняўся на херубіна, і паляцеў, нёсся на крылах вятроў.

¹² І ахінуўся цемрай, як заслонай, пасярод яе — палатка Яго: цёмная вада, паветраныя хмары.

¹³ Перад бляскам позірку Яго праплывалі хмары, град і агністае вуголле.

¹⁴ І загрымеў на нябёсах Госпад, і Найвышэйшы даў пачуць голас Свой: град і агністае вуголле.

¹⁵ І пусціў Ён стрэлы Свае і рассыпаў іх, насыпаў маланак і ўстрывожыў іх.

¹⁶ І адкрыліся крыніцы вод, і адчыніліся падмуркі сусвету ад ушчування Твайго, Госпадзе, ад подыху гневу Твайго.

¹⁷ Даслаў Ён нарэшце [руку], і прыняў мяне, і выцягнуў мяне з водаў многіх;

¹⁸ вырваў мяне ў ворагаў маіх вельмі моцных і ў тых, што ненавідзяць мяне, бо яны ўзмацніліся лепш за мяне.

¹⁹ Яны напалі на мяне ў дзень смутку майго, і зрабіўся Госпад апораю маёю.

²⁰ І вывеў мяне на прастор, збавіў мяне, бо пажадаў мяне.

²¹ І адплаці мне, Госпад, паводле праўды маёй і паводле чысціні рук маіх аддай мне.

²² Бо я пільнаваў шляхі Госпада і не адступаўся нягодна ад Бога майго.

²³ Бо ўсе прысуды Яго перада мной, і ўсю праўду Яго не адрынуў я ад сябе.

²⁴ І стаў я беззаганны з Ім і высцерагаўся злачыннасці.

²⁵ І адплаціў мне Госпад паводле праўды маёй, і паводле чысціні рук маіх перад позіркам вачэй Яго.

²⁶ Са святым Ты святы будзеш, і з чалавекам беззаганным беззаганны будзеш,

²⁷ і з абраным абраным будзеш, і з заганным падступным будзеш.

²⁸ Бо народ пакорлівы Ты збаўляеш, а вочы пыхлівых прынізіш.

²⁹ Бо Ты, Госпадзе, запальваеш светач мой; Бог мой прасвятляе цемру маю.

³⁰ Бо з Табою я пайду ў наступ на варожыя войскі і з Богам маім пераскочу праз мур.

³¹ Бог, бязгрэшны шлях Яго, словы Госпада выпрабаваны агнём; шчыт Ён усім тым, хто спадзяецца на Яго.

³² Бо хто ёсць Бог, апрача Госпада? Або якая крэпасць, апрача Бога нашага?

³³ Бог, Які падперазаў мяне мужнасцю і ўладкаваў беззаганным шлях мой;

³⁴ Які зрабіў ногі мае, як у аленя, і на вышыні паставіў мяне.

³⁵ Які навучае рукі мае барацьбе, і нацягваюць медны лук плечы мае.

³⁶ І даў Ты мне шчыт збаўлення Твайго, і правіца Твая падтрымала мяне, і Тваё выслухванне ўзвялічвае мяне.

³⁷ Ты пашырыў крокі мае пада мною, і не знясілена ступня мая.

³⁸ Я пераследаваў ворагаў маіх і хапаў іх, і не вяртаўся, пакуль яны не прападалі.

³⁹ Я сцінаў іх, каб не маглі падняцца; яны падалі пад ногі мае.

⁴⁰ І аперазаў Ты мяне мужнасцю для вайны, і тых, што паўсталі супраць мяне, кінуў пад мяне.

⁴¹ І ворагаў маіх прымусіў Ты да ўцёкаў і павынішчыў тых, што ненавідзяць мяне.

⁴² Яны клікалі, і не было таго, хто збавіў бы; да Госпада, і не выслухаў іх.

⁴³ І расцярушыў іх, як пыл па ветры, як вулічны бруд, патаптаў я іх.

⁴⁴ Выхапіў мяне ад бунту народа, паставіў мяне на чале плямёнаў. Народ, якога я не ведаў, служыць мне,

⁴⁵ толькі вухам пачуўшы, слухаецца мяне. Сыны чужыя сталі забягаць перада мною.

⁴⁶ Сыны чужыя саслабелі, дрыжаць у сховішчах сваіх.

⁴⁷ Жыве Госпад, і дабраславёны Апякун мой, і хай узвысіцца Бог збаўлення майго!

⁴⁸ Бог, Які помсціш за мяне і падпарадкоўваеш мне народы, выратавальнік мой ад ворагаў маіх раз’ятраных;

⁴⁹ і над тымі, што паўсталі супраць мяне, Ты ўзвышаеш мяне, ад чалавека гвалтоўнага выхопліваеш мяне.

⁵⁰ Дзеля таго будуць славіць Цябе, Госпадзе, паміж паганамі і імю Твайму прагавару псальм.

⁵¹ Узвялічыў у збаўленні цара Свайго і аказаў міласэрнасць намашчэнцу Твайму Давіду і нашчадкам яго навекі».