ПСАЛТЫР 20 - Кнігі Святога Пісання - Біблія - Біблія — пераклад Чарняўскага (выданне 2017 года)

¹ Кіраўніку хору. Псальм Давідаў.

² Хай выслухае цябе Госпад у дзень роспачы, хай абароніць цябе імя Бога Якубава.

³ Хай пашле табе ўспамогу ад святыні і з Сіёна хай зберажэ цябе.

⁴ Хай прыгадае кожную тваю ахвяру, і цэласпаленне тваё хай успрыме шчодрым.

⁵ Хай аддасць табе паводле сэрца твайго і кожную задуму тваю выканае.

⁶ Будзем цешыцца з выратавання Твайго і ў імя Бога нашага ўздымем харугвы; хай выканае Госпад усе твае просьбы.

⁷ Цяпер спазнаў я, што ўратаваў Госпад намашчэнца Свайго: выслухаў яго з неба Свайго святога сіламі выратавання правіцы Яго.

⁸ Адныя — на калясніцах, іншыя — на конях, а мы імя Госпада нашага сталі клікаць.

⁹ Тыя сагнуліся і ўпалі, а мы выпрасталіся і былі ўзнятыя.

¹⁰ Госпадзе, уратуй цара і выслухай нас у дзень, калі будзем клікаць Цябе!