ПСАЛТЫР 75 - Біблія (пераклад А.Бокуна) Біблія (пераклад А.Бокуна)
ПСАЛТЫР 75

¹ Кіраўніку хору: на лад: “Не загубляй!”. Псальм Асафа. Сьпеў.

² Славім мы Цябе, Божа, славім, і тыя, што блізкія да імя Твайго, абвяшчаюць цуды Твае.

³ «Калі Я прызначу [месца] спатканьня, Я буду судзіць паводле справядлівасьці.

⁴ Калі растапляецца зямля і ўсе, хто жыве на ёй, Я ўзважваю слупы яе. (Сэлях)

⁵ Я кажу да тых, якія хваляцца сабою: “Не хваліцеся!”, і да бязбожных: “Не падымайце рогі!

⁶ Не падымайце высока рогі свае, не прамаўляйце, дзёрзка [трымаючы] шыю!”»

⁷ Бо ані з усходу, ані з захаду, ані з пустыні вывышэньне,

⁸ але Бог ёсьць Судзьдзя, гэтага Ён паніжае, а таго вывышае.

⁹ Бо ў руцэ ГОСПАДА келіх з віном, якое пеніцца; ён поўны напою зьмяшанага, і Ён з яго налівае, але толькі фуз ягоны будуць піць усе бязбожнікі на зямлі.

¹⁰ А я буду апавядаць [пра гэта] вечна, буду выслаўляць Бога Якуба.

¹¹ І ўсе рогі бязбожнікам я адсяку, і будуць узьнятыя рогі праведнага.