ПСАЛТЫР 74 - Біблія (пераклад А.Бокуна)

Пс 74

¹ Навучаньне Асафа. Чаму Ты, Божа, нас назаўсёды адкінуў? Чаму ўзгарэўся гнеў Твой на авечак чарады Тваёй?

² Узгадай пра грамаду Тваю, якую Ты здаўна набыў, якую бароніш, як кій спадчыны Сваёй, гару Сыён, на якой Ты жывеш!

³ Зьвярні стопы Твае да таго, што загінула назаўсёды, усё панішчыў вораг у сьвятыні.

⁴ Рыкаюць ненавісьнікі Твае пасярод [намёту] спатканьня Твайго; паставілі на знак [гэтага] знакі свае.

⁵ Яны падобны да тых, што падымаюць у гушчары лясным сякеру,

⁶ і цяпер усе рэзьбленыя рэчы ў [сьвятыні] бярдышамі і молатамі крышаць.

⁷ Яны пусьцілі з агнём сьвятыню Тваю, [кінуўшы] на зямлю, апаганілі сялібу імя Твайго.

⁸ Сказалі ў сэрцы сваім: «Усё зруйнуем дазваньня!»; папалілі ўсе [месцы] спатканьня з Богам на зямлі.

⁹ Знакаў нашых ня бачым мы болей; няма больш прарока, і нікога няма, хто б ведаў, як доўга гэта будзе.

¹⁰ Як доўга, Божа, будзе зьневажаць прыгнятальнік? Ці заўсёды вораг будзе пагарджаць імем Тваім?

¹¹ Чаму Ты стрымліваеш руку Тваю і правіцу Тваю? Вым яе з-за пазухі Тваёй і ўдар!

¹² Бог ёсьць Валадар мой заўсёды, Які збаўленьне дае на зямлі.

¹³ Ты моцай Тваёй разьдзяліў мора, скрышыў галовы цмокаў у водах.

¹⁴ Ты раструшчыў галаву левіятану, аддаў яго на ежу народу, што жыве ў пустыні.

¹⁵ Ты расьсек крыніцу і ручай, Ты высушыў рэкі магутныя.

¹⁶ Твой ёсьць дзень, і Твая ёсьць ноч; Ты ўмацаваў сьвятло і сонца.

¹⁷ Ты назначыў усе межы зямлі; лета і зіму — Ты іх уфармаваў.

¹⁸ Памятай пра гэта: вораг зьневажае ГОСПАДА, і народ бязглузды пагарджае імем Тваім!

¹⁹ Не аддавай хеўры [гэтай] душу туркаўкі Тваёй; не забудзь назаўсёды грамаду прыгнечаных Тваіх.

²⁰ Узглянь на запавет Твой, бо цёмныя месцы зямлі напоўненыя сялібамі гвалту.

²¹ Няхай не вяртаецца ўцісьнёны асаромленым, няхай бедныя і прыгнечаныя хваляць імя Тваё!

²² Паўстань, Божа! Змагайся ў справе Тваёй! Узгадай, што бязглузды ганьбіць Цябе кожны дзень.

²³ Не забудзь голас ненавісьнікаў Тваіх, гармідар тых, якія паўстаюць супраць Цябе, што ўсьцяж узьнімаецца!