150 Biblian jiskʼa tʼaqanakapa Diosan samartʼañ yateqañataki

Nayar jutapjjam take karjatanaca jatjatanaca, nayaw samarayapjjäma. Nayan yugojja apapjjam, ucatsti nayat yatekasipjjaraquita. Nayasti llamp'u chuymani, alt'at chuymaniraquïtwa, ucatwa almaman samarañapjja jicjjatapjjäta. jisct'añataqui —¿Jumätati jutañapäquis uca Cristojja, jan ucajj yakharuch suyapjjäjja? —sasa. Nayan yugojjasti jasa apañaquiwa, qhumojjasti sinti phisnaquiraquiwa.”

Tatituw awatirejjajja, janiw cunats t'akhescäti: suma ch'ojjña pastonacaruw samart'ayitu; k'oma uma thiyanacaruw awatitu, jupaw machak ch'am churitu, cheka thaquinjam irpitu, sutipar jach'añchañ laycu.

“Amuct'jjapjjam, nayan Diosätajj uñt'apjjam: Nayajj marcanacat juc'ampïtwa, oraket juc'ampiraquïtwa.”

Tatay, jumaw sum uñjtajja qhititejj mä sapa amtañaniquïqui ucarojja, jupan jumaru iyawsatap laycu,

Jan jumanacajj cunats llaquisipjjamti, take cunsa Diosar sapjjam oracionana, mayipjjam yuspagarapjjaraquim. Diosajj jumanacarojj churapjjaraquïtamwa samarañapa, ucasti take cuntejj jakejj amuyt'caspas ucat juc'amp jach'awa. Uca samarañasti jumanacan chuymanacamsa, amuyunacamsa imaniwa Cristomp mayaquïpjjatam laycu.

Alajjpachanquir Take atipirin imat sarnaker jakejja, Chijejj janiw jac'achascätamti, usus janiraquiw utamar purincaniti, Diosajj angelanacaparuw qhitanini, sarnakäwim imañataqui. Amparapjjaruw apapjjätam, cayuman kalar jan lanctasiñapataqui; catarinacarusa, asïrunacarus takjjatascaquïtawa, leonanac taypinsa, ajjsarcañ animalanac taypinsa, sarnakascaquïtawa. “Nayar munasitap laycusti, juparojj khespiyäwa, nayar uñt'atap laycusti, juparojj imaraquïwa. Nayar art'asitan ucapachajja, mayisitaparojj jaysäwa. Jupamp chicaw t'akhesiñancä, llaquisiñat irpsü, jach'aruw aptä; walja maranacaw jacayä, ¡khespiyäwejjampiw jupar cusisiyaraquï!” Tatiturojj siwa: “Jumätaw imantasiñajjajja, jarc'akasiñajjasa, Diosajjay, jumaruw takpach chuymamp alcatsma” sasa.

Take llaquisiñanacamsti Diosar jaytapjjaraquim, jupasti jumanacatjja llaquisiraquiwa.

Dios sapanac ajayojjajj samarañ jicjjati, khespiyasiñajjajj jupat juti. Ch'ajjwañanacarojj jan wayusipjjamti; janirac lunthatasiñar chuym catuyasipjjamti; kamiris tucusipcätajja, kollker jan alcatapjjamti. Diosan arsutap ist'ta, jupan arsut arup yatta: “Diosajj ch'amaniwa, ch'amasa, munasiñas jupanquiwa, jupaw sapa maynirojj lurataparjam wajjt'i” sasa. Jupaquiw khespiyitu, arjjataraquitu. Janiw pächascäti, jupaw imantasiñajjajja.

Jupaw karitarojj ch'am churi, pisi ch'ama jakerusti ch'am yapt'araqui. Mä aruw art'asiraqui: “Wasaranjja Tatitutac mä thaqui waquichapjjam, mä cheka thaqui k'omachsupjjam wasara chekanacanjja. Waynanacas karjtaquispawa, ch'amtayapjjaquiraquispawa, wali ch'amaninacasa aynacht'aquiraquispawa, ucampisa take qhitinacatejj Tatitur iyawsapqui ucanacasti machak ch'amanacanïpjjaniwa; pacalinacar uñtataraquiw thoktapjjani, jalanakasinsti janiw karipcaniti, sarnakasas janiraquiw ch'amtayapcaniti.

Tatitun nayrakatapan amuct'am; jupan yanapap llamp'u chuymamp suyam, ñankha lurir jaken atipjatapat jan k'apisimti; ñankhanac amtir jakets janirac mayjt'asimti.

“Tatitur take chuymamampi catuyasim; juman ch'iqhi cancañamaruquejj jan alcatasimti. Take luräwinacamanjja Tatitutjja amtasipunim, ucatsti jupajj cheka thaquinjamwa irpascätam.

Tatitusti, Israelan kollan Diosapajj siwa: “Cuttanjjapjjam, samaratäquïpjjaraquim, khespitäsipcätawa. Samarañampin, iyawsañampina ch'amajj utji.” Ucampis jumanacajj janiw munapctati,

Diosar llaquinacam catuyam, jupasti ch'aman tucuyätam, Diosar jaysirin aynacht'añapjja, janipuniw jupajj muncaniti.

Nayajj jan cuna llaquiniw iquintta, mäquiw icjaracta, Tatay, jumaquiw iyawsañ chuymamp jacayistajja.

“Samarañwa jaytapjjsma. Nayan samarañajjwa churapjjsma, ucampis janiw nayajj samarañjj churcti cunjämtejj acapachajj churqui uqhama. Jan llaquisipjjamti ni ajjsarapjjaraquimsa.

Cheka uñjäwisti sumancañwa utjayani, samarañana sarnakasiña, jan ajjsarasa, ucasti wiñayataquïniwa. Marcajjasti mä suma samarañ chekanwa jacani, suma utanacana, samarata jacañ utanacana,

Willjtat sarnakatanacajj inamayawa, jayp'ucam irnakatas inamayawa, jump'i apsutamp t'ant'a mank'atas inamayawa, Diosajj munat wawanacapan iquiñanacapcam t'ant'a churqui ucapachajja.

Ucatsti Tatitojj sänwa: —Nayawa jumampi chica sarascäjja, uqhamarac samarañsa churaraquïmawa —sasa.

t'akhesiñ urunacan samarañ catokani, ñankha lurir jaketaquisti, aynacht'añap waquicharapisqui.

Almajjay, jichhajj samarasjjam, Tatitun nayat qhuyapayasitap laycu.

Tatitojj marcaparojj siwa: “Thaqui jac'anacaru sayt'asipjjam ucatsti uñatatasipjjaraquim, nayra thaquinacat jisct'apjjam; cawquïrisa suma thaquejja ucata; ucatsti uca thaquinjam sarapjjam, ucapachaw samarapjjaraquïta.” Ucampisa jupanacajj sapjjewa: “Janiwa, janiw uca thaquinjam sarapquiristti” sasa.

Yant'apjjam, uñjapjjaraquim, Tatitun munasir cancañapa, jupar take chuymamp maqhatirejj cusisiñan jakewa.

samarañaru mantjjapjjatapatjja. Cheka thacwa jupanacajj sarapjjäna, jichhasti sepulturanacapan samarasipqui.

Jumaw imantasiñajjätajja, jarc'akasiñajjätasa, arunacamaruw takpach chuymajj catuyta.

Jan ajjsaramti, nayaw jumampïscta, jan ajjsaramti, nayäsctwa juman Diosamajja. Nayaw ch'amañchascäma, nayaraquiw yanapascäma, atipjiri amparajjampiraquiw uywascäma.

Ucatsti jumanacajj jan llaquisipjjamti aqham sasa: ‘¿Cunsa mank'añäni? ¿Cunsa umañäni, cunampiraquis isisiñäni?’ sasa. Diosat jayancquis uca jakenacaquiw take aca yänacatjja llaquisisipqui, ucampis jumanacan alajjpachanquir Awquimajj yatiwa cuntejj jumanacaru waquisipctam ucjja. Uqhamasti, nayrakatajj Diosan reinopa munapjjam, uqhamarac cunatejj chekäqui jupan nayrakatapanjja ucanaca, ucatsti take aca yänacajja jumanacarojj churataquïpjjätawa. Jan llaquisipjjamti cunatï kharürojj pascani ucatjja, kharürusti take uca llaquisiñanacapampi phokt'ataraquïniwa, sapüruraquiw uqham llaquinacan phokhantatäsqui.

Nayajj Tatitump chicapuniw sarnakascta, jupaw cupëjjajjanqui, janiw cunas tincuyquitaniti. Ucat chuymajjajj walpun cusisi, ajayojjas cusisi, janchejjas samararaqui.

Cunjämatejj mä awquejj wawanacapat qhuyapayasquejja, uqhamaw Tatitojj iyawsirinacapat qhuyapayasi; jupajj jiwasanacan lak'ätas yati, ñek'it luratäpjjatas yatiraqui.

chhekhanacapampiw imjjatätam, chhekhanacap mankhäjjan imantasïta. Amparapajj jarc'acasiñar uñtataw imätam. Ajjsarcay arum ch'amacarojj jan ajjsarcamti, urun flecht'at mich'inacarus jan ajjsarcamti,

“Naya, naya quipcaw jumarojj ch'amachsma. ¿Qhitirus ajjsarta? ¿Jakenacaruti? ¿Jiwir jakenacaruti ajjsarta, qhitinacatejj korar uñtata tucusipjjani ucanacaru? ¿Qhititejj alajjpachsa, acapachsa lurqui uca Tatitu Diosamatjja armasïtati, qhititejj alajjpacha janatati, oraksa utt'ayaraqui ucatjja? ¿Qhitinacatejj jumar tucjañataquejj jac'ancqui, wali colerata uñch'uquisctam ucanacataquejj qhathatiscaquïtati? Ucampis ¿cawquinquis colerasiñapajja?

Tatituw khanajjasa, khespiyasiñajjasa, ¿qhitirurac ajjsarästi? Tatituw jacañajjar arjjati, ¿cunarurac ajjsarästi?

Tatitu pachpaw juman nayram sarani, jumampiraquïniwa, janiraquiw jaytcätamti ni antutcaraquïtamsa, uqhamasti jan ajjsaramti, janirac lajllasimsa.”

Tatitur takpach chuymamp iyawsirinacajj jan onjjtcayäpjjewa; Sión kollur uñtatäpjjewa, wiñayataquiw sayt'asipjje.

Acjj sapjjsmawa jumanacajj samarañ jicjjatapjjañamataqui nayaru iyawsatanacam laycu. Acapachanjja jumanacajj t'akhesipjjätawa, ucampis ch'am catjjatapjjam, nayajj acapacharojj atipjtwa —sasa.

Tatitun amparapar sarnakäwim catuyasim, jupar take chuymamp alcatam, jupasti yanapätamwa.

Cawquïritejj jawsapctam ucajja phokheriwa, uqhamajj phokhaniw take acanacjja.

Nayasti sum yattjja, Diosajj cuna suma luräwinactï jumanacampi kalltqui ucanacajj lurascaquiniwa, Jesucriston jutañapcama.

Diosaw imantasiñasajja, ch'amañchirisasa, jupaw chijinacan arjjatirisajja. “Amuct'jjapjjam, nayan Diosätajj uñt'apjjam: Nayajj marcanacat juc'ampïtwa, oraket juc'ampiraquïtwa.” ¡Nuwasir taman Tatitupajj jiwasanacampïsquiwa! ¡Arjjatirisajj Jacobon Diosapawa! Uca laycuw jan ajjsarapcañäniti, orakes qhathatiscpan, kollunacas lamar kotar tincuntascpan,

Tatitojj art'asirinacapan jac'apancasquiwa, takpach chuymamp jupat art'asirinacan jac'apanquiwa.

Diosaw nayar khespiyirejja, juparuw iyawsta, janiw cunsa ajjsarcäti. Tatituw nayan arjjatirejjajja, nayar ch'amañchirejjasa, jupaw khespiyirejjajja.”

Janirac kollkerus munapjjamti; cunatejj utjapjjtam ucampejj cusisitaquïpjjam, Diosajj siwa: “Janiw cunapachas jaytcämati ni armt'ascämasa” sasa. Uqhamajj jichhajja, take iyawsañampiw arssnajja: “Tatituw yanapt'irejjajja; janiw cuntejj jakejj lurquitaspa ucjj ajjsarcäti” sasa.

Llaquinacajjajj walipun yapjjatascän ucapachaw chuymachäwimampejj cusisiyista.

Llaquisiñajjan Tatitur art'asta, jupasti ist'ituwa, khespiyaraquituwa. Tatitojj nayampïsquiwa: janiw ajjsarayascäti; ¿camächaraquitan jakesti?

Nayan ovejanacajjajj arojj uñt'iwa, nayasti uñt'aractwa, jupanacasti arcapjjaraquituwa. Nayajj wiñay jacañwa churta, janiw cunapachas jiwapcaraquiniti, ni qhitis amparajjatjja apakcaraquitaniti. Cuntejj Awquejjajj churquitu ucasti, taket sipansa jach'araquiwa, janiraquiw qhitis amparapatjja apakañataqui ch'amanïquiti.

Jach'a kollunacajj yakha chekarusay sartasipcpan, kollunacas aynacharusay jutasipcpan, ucampis munasiñajjajj jumataquejj janipuniw tucuscaniti, uqhamaraqui sumar mantäwi arust'äwejjajj janiw t'unjatäcaniti.” Uqham siwa jumar qhuyapayiri Tatitojja.

Ajjsarcay urun waytasita, nayajj jumaruquiw alcatsma. Diosaruw takpach chuymamp iyawsta, arunacap jach'ar aptaracta; Diosaruw takpach chuymamp alcatta, janiw cunarus ajjsarcti: ¿Camächaraquitan jakesti?

Nayajj jumarojj irpascapunïmawa, wasaransti mank'añjja jilarquir churaraquïma, janchimarusti ch'amañcharaquïmawa, mä suma karpata pankar yapjamaw tucuraquïta, mä uma jalsur uñtataw tucüta, umamasti janiw tucuscaraquiniti.

Tatitojj asqui jaken arnakasitaparojj ist'iwa, take llaquinacapat waysuraqui. Tatitojj llaquimp aynacht'atanacan jac'apancasquiwa, jupanacar khespiyañataqui, aynacht'at chuymanacap waytañataqui.

Yatiractanwa Diosajj jupar munirinacarojj take cunsa asquitaquiw waquicharapi qhitinacatejj jupan amtataparjam jawsatäpqui ucanacataquejja.

Tatituw marcaparojj ch'am churi, jupaw marcaparojj sumancañ churi.

Cristow sumancayirisajja, jupajj judionacsa jan judionacsa mä sap marcacwa tucuyawayi cawquïr uñisiñatejj mä perkjama jaljcäna uc t'unjasina.

Diosasti janiw alek ch'ajjwañ Diosäquiti, jan ucasti sumancaña Diosawa. Take iglesianacansa jilatanacarojj yatichatawa:

Jan wali yatiyäwinacarojj janiw ajjsarquiti, chuymapajj Tatituncasajj wali thurt'atawa.

Tata, nanacat qhuyapt'ayasipjjeta, nanacasti jumaruquiw suyt'apjjsma. Sapa alway nanacan arjjatirejjämjja jan walt'añ horasansti khespiyapjjaraquitaya.

Ucampis jichhajj Israel, Jacobon marcapa, jumar uywiri Tatitojj sistamwa: “Jan ajjsaramti, nayaw khespiysma, nayaw sutimat jawssma, jumajj nayanctawa. Tatitusti siwa: “Jumanacäpjjtaw nayan khanañchirinacajjajja, nayan ajllit sirvirinacajja, nayaw jumanacar ajllisipjjsma nayar uñt'apjjañamataqui, alcatapjjañamataquiraqui, uqhamat amuyapjjañamataqui qhitïctejj nayajj uca. Nayat nayrajj janiw qhiti diosas utjcänti, acat kheparus janipuniw utjcaniti. Naya sapaquïtwa Tatitojja, nayat yakhasti janiw khespiycaspati.” Tatitusti siwa: “Nayaw yatiyta, art'aracta, nayaw khespiyaracta; janiw mä jan uñt'at diosati khespiyqui, jumanacasti uca toketjja khanañchirejjäpjjtawa. Nayratpach nayaquipunïtwa Diosajj. Janiw qhitis ch'amajjatjja khespiycaspati. Cuntejj nayajj lurcta ucsa janiw qhitis t'unjcaspati.” Tatitojj, Israelan Kollan Diosapajja, qhititejj jumanacar khespiyapctam ucajja, siwa: “Jumanacar khespiyañataquejj Babiloniarojj jakenac qhitanï, take puncunac jist'arayaraquï, caldeo jakenacan cusisiñanacapasti t'akhesiñaruw tucuni. Nayätwa Tatitojja, Israelar acapachar uscurejja, Kollan Dios, jumanacan reyima.” Tatitusti mä thaqui jist'araraqui jach'a kokanjama, mä jisc'a thaqui jist'ari walja khothutiri umanac taypina; mä ch'amani ejercitoruw mistsuyani, carronacapampi, caballonacapampi t'unjayañataqui. Liwinucutaw uñjasipjje, ucampis janiw sayt'asipcaniti; jiwt'ir mechar uñtataw tucusiwayjjapjje. Jichhasti Tatitojj marcaparojj siwa: “Cunatejj wasüru pascän ucjja jan amtcjjamti, janirac juc'ampi cunanacatejj pascän ucanacs amtcjjamti. Nayaw jichhajj take cunsa machak lurä, ucsti jichpacharaquiw uñjäta. Wasaran thaquinacwa jist'arä, jan achuri orakensti jawiranacwa jist'araraquï. Umanjam maqhatañamächejja, nayaw jumampïscäjja, jawiranac maqhatañamächejja, janiw jalantasin jiwcätati; ninanjam pasañamächejja, janiw naqhantcätati, ninas janiw jumanjja naccaniti.

“Cusisiñanïpjjew jachirinacajja, jupanacasti Diosampi chuymachatäpjjaniwa.

Iquintcäsa, iccäsa, uñatatcä ucapachasa: Tatituw nayarojj yanapasquitu. Nayar catuntañatac muyuntir jakenacajj janiw ajjsarayquituti.

Nayasti jacañ oraken Tatitump cusisiñataquiw suyt'ascta. Tatitur takpach chuymamp iyawsam, ch'amañchasim, jan ajjsaramti, ¡Tatitur takpach chuymamp iyawsam!

Chijejj janiw jac'achascätamti, usus janiraquiw utamar purincaniti, Diosajj angelanacaparuw qhitanini, sarnakäwim imañataqui.

Ch'aman sayt'asipjjañäni, jan pächasisa, iyawsäwisanjja cuntejj suyt'ctan ucanjja, Diosasasti phokhaniwa cuntejj arsuwayquistu ucjja.

Cunjämatejj mä taycajj wawaparojj chuymachejja, uqhamaraquiw nayajj jumanacarojj chuymachapjjäma, Jerusalenansti chuymachasiña jicjjatapjjaraquïta.”

Cawquintejj munasiñajj utjqui ucanjja janiw utjquiti ajjsarañajja. Ucat sipana chekpach munasiñanejja ajjsarañjja apanucuwa; ajjsarañasti mutuña catokañataquiwa. Maynitejj ajjsarascchi ucajja, janiw chekpach munasiñanïquiti.

Uca suyt'añ churiri Diosajja, cusisiñampi, sumancañampi jumanacar phokhantpan juparu iyawsapjjatam laycu, uqhamat uca suyt'añanjja phokt'atäpjjañamataqui Kollan Ajayun ch'amap toke.

Tatitur ajjsarañajj jacañaruwa irpi; ucatsti cusisitaquiwa jacasi, cuna jan walt'añansa jan t'akhesisa.

Tatiturojj take chuymamp alcatam, asc luraraquim, oraken jacasim, chekaparac jacam; Asqui jakejj yatiñ cancañampiw parli, lajjrapajj chekap sarnakañ khanañchi. Diosapan leyinacap chuymapar catjjäsi, cayunacapasti janipuniw llust'caniti. Ñankha lurir jakejj asqui jakeruw uñch'uqui, jupar jiwayañ amtaraqui; Tatitusti janiw amparapar jalt'ayquiti, janiraquiw taripäwin juchañchat uñjasiñap munquiti. Tatitur takpach chuymamp suyt'am, jupar jaysaraquim, jupaw orak catokañamataquejj ch'amañchätam, ñankha luririnacan t'unjasïwip uñjaraquïta. Ñankha lurir jakeruw jach'achasir uñjta, ch'ojjña kokjam jilantasquir uñjaracta; uca khepat wasitat uñjir sarta, jupasti tucusjjataynawa, jupar thakasasti janiw jicjjatcti. Asqui jaker uñtam, suma jaker uñjam: jutir jacañapajj sumancañ jacañäniwa; ñankha luririnacasti tucjatäpjjaniwa, jutir pachpa jacañapaw t'unjascani. Asqui jakenacajj Tatitut yanap catokapjje, juparaquiw jan walt'añ urunacan arjjatiripajja. Tatiturojj suma chuymamp munasim, jupasti chuyma mankheman mayisitamarjamaw churätam.

Ucampis: “¿Mä taycajj wawanacaparojj armasiti, munasiñaps janiraquich churqui? Inas uca taycajj armaschispa, ucampis nayajj janipuniw armascäti. Nayajj amparajjan kellkt'atpuni irpsma, perkanacamatsti amtasipuntwa.

Uqhamajj jichhajj yattwa, janiwa cunas Diosan munasiñapatjja apakquistaspati, janiw jiwañasa, ni jacañasa, ni angelanacasa, ni alajjpach ch'amanacasa, ni jichhasa, ni jutcani ucasa, ni patancqui ucasa, ni mankhancqui ucasa, ni cuna yakha yänacasa Diosan munañapatjja apakquistaspati, uca munasiñsti Cristo Jesús Tatitus tokwa uñacht'ayistu.

Ucampis qhititejj nayar ist'quitani ucajja, sumancañanwa jacasini, ucatsti janiw ajjsarayascaniti cuna jan walt'añanacansa.’

Janiw pist'ayasitajj laycuti uc sisctjja, ucampis nayajj yattwa cunatejj utjquitu ucampejj cusisitäñajja. Yatiractwa cunjämäquitejj pobresan jacañäquis ucjja, uqhamarac yatiractwa take phokt'at jacañsa. Yatekaractwa cunjäm sarnakañsa sist'atäñansa jan ucajj awtjatäñansa, yatiractwa walja utjirinïñsa, jan cunanïñsa. Criston ch'amapampejj take cunaruw saycatirista.

Munasiñamajj chuymachitpan, nayatac arscäyätajj ucarjam phokhasiñapataqui.

Yupaychañäni Jesucristo Tatitusan Dios Awquiparu. Jupaw jiwasar qhuyapayasir Awquisajja, uqhamarac chuymachirisasa. Take t'akhesiñanacasanwa Diosajj chuymachistu, jiwasajj t'akhesirinacar chuymachañasataqui, cunjämtï Diosajj jiwasar chuymachquistu uqhama.

Uqhamajj Yokatejj khespiyasiñ churapjjstamjja, chekpachansa khespitaw sarnakasjjapjjäta.

Tatitojj takenir munasiriwa, takpach luratanacaparojj munasiñampiw uñji.

Juparaquiw take llaquinacapatjja khespiyi. Janiw jupan mä qhitanitapati khespiyquejja; jan ucasti quipca Tatituw khespiyi. Qhuyapayasiñap laycu, munasiñap laycuraquiw jupajj khespiyi, jupaw wayti, amparat caturaqui. Uqhampunwa luri.

“Sapjjaracsmawa, jan llaquisipjjamti, cuntejj mank'apcäta, umapcaraquïta, isisipcäta ucanacatjja. ¿Janiti jacañajj mank'at sipansa juc'ampi sumäqui, janchisti isitsa juc'ampïcaraquejja?

Ucatwa jiwasanacajj walja iyawsañani jakenacampi muyuntatätan, cunatejj jarc'quistu ucjja maysaru apanucuñäni, uqhamarac jiwasar apnakquistu uca juchsa, ucatsti ch'amañchasisa jalañäni cunatejj nayrakatar jalañasäqui ucanjja. Janchi awquinacasajj juc'a tiempotaquiquiw chekachawayistu cunjämtejj amuyupanjj walïquejj uqhamaru, ucampis Diosajj jiwasan asquisataqui, kollan tucuñasataqui, cunjämatejj jupajj kollanäqui uqhamaruw chekachistu. Chekpachansa janipuniraquiw cuna mutuyäwi catokasas —Walic mutuyitojj —sisctanti, jan ucasti usustuwa, qhitinacatejj uca mutuyäwi toke yatekapjje ucanacajj mä suma asquin samarañanracwa jacapjje. Uqhamajj machak ch'amay churapjjamjja uca karjata amparanacarojja, uqhamarac t'uqha konkorinacamarusa. Chekap thaqui thakapjjam, ucatsti cojo cayüquis ucajj waliptjjaniwa, janiraquiw mayampsa k'ewsuscjjaniti. Takenimpis suman sarnakasiñ thakapjjam, k'oma jacañan sarnakasa, jan ucampisti janiw qhitis Tatitur uñcatcaspati. Amuyasipjjamay takenis Diosan yanapt'apa catokapjjañamataqui, jan jumanacata maynisa cunjämatejj mä jan wali c'asc'a korajj mayninaca jan walt'ayqui, uqhamäpjjamti. Janiraqui qhitis wachoka jucha lurasa sarnakcpati, janirac jisc'achapjjamti cunatejj k'omäqui ucarusa. Esaú chachajj ucwa luränjja, mä plato mank'a laycuquiw jilïr yokall wawäñjja aljasïna. Yatipjjaractaw cunapachatejj Esaú chachajj bendición awquipat catokañ munäna ucapachajja, janiw churatäcänti, wali jachatapampis janiw cutsuycänti uca luratapatjja. Jumanacajj janiw jac'achasipctati israelitanacjama qhaya kolluru llamct'añjamäcän ucarojja, ucanjja ninaraquiw akäna, lajja ch'amacanacan jach'a thayampi cuna; janiraquiw trompeta phust'atarus ni Diosan arunacaparus jumanacajj ist'apcäyätati. Uca ist'irinacasti achict'asipjjänwa jan juc'amp parljjañapataqui. Jesusaruy uñtañäni, jupatwa iyawsañasajj juti, juparaquiw uca iyawsañasjja phokhachani. Jesusasti crusanwa t'akhesi, jan uca casta jiwañaru p'enkasisa. Jupajj yatisïnwa uca t'akhesitapatjja khepürunjja cusisiñ jicjjatañapata; ucatsti Diosan tronopan cupëjjaparuw kont'asi.

Jumaw imantasiñajjätajja: jan walt'añanacat khespiyista, atipjäwi k'ochunacampiw muyuntayaraquista.

“Ucampisa, kollanawa cawquïri jaketejj nayaru iyawsquitu, uqhamaraqui take suyt'añapsa nayaru usccaraqui ucajja. Jalir umani jawir thiyaru ayruntata kokjamäniwa, saphinacapasti uca uma tokeru saphintataraquiwa, cunapachatejj lupejj purinqui ucqhasti janiw ajjsarcaraquiti, laphinacapasa take horasansa ch'ojjñaquïscaniwa. Waña horasa purinipansti janiw mayjt'ascaniti, take horasansa achuniquïscaniwa.

Janiy jumanacajj acapacha saräwinacarjamajja jacjjapjjamti, jan ucasti amtañanacamanjja machakat amtasjjapjjam, uqhamat jumanacan jacañanacamajj sumäjjañapataqui. Uqhamatwa jumanacajj Diosan munañapjja yatipjjäta, cunatejj asquïqui, cunatejj Diosarojj cusisiyqui, k'omäcaraqui ucanacsa.

Jumamp arjjatayasiñ thakerinacajj cusisipjjpanaya, jupanacar imascatam laycojj, cusisiñat wiñayapun k'ochupjjpan. Jumar munasirinacajj jumïpan cusisipjji: Tatay, jumaw iyawsir jakerojj asquinac churtajja, qhuyapayasiñamajj jarc'akasiñar uñtataw muyuntasqui.

Janipuniw jupajj tincuñam muncaniti, janipuniw jumar uñjirejj iccaniti. Janiw jupajj icquisa, samart'quisa, Israel marcar uñjirejj janipuniw icquiti.

Marcajjay, jupar take chuymamp iyawsam, chuymanacam jupar jist'arapjjam, Diosaw jiwasan imantasiñasajja.

Jumanacasti jan llaquisipjjamti, Tatituwa jumanac lantejj nuwasiscani —sasa.

“Nayan ucar jutapjjam, nayaw khespiyapjjäma, orake tucusin utjir marcanaca, nayaquïtpï Diosajja, janiw yakhajj utjquiti.

Chuymajjasa, janchejjas tucusisquiwa, ucampis Diosaw wiñay catokäwejjajja, jupaw chuymajjarojj catjjäsisqui.

jan maynis aca jan walt'añanacampejj mayjt'asiñapataqui. Jumanacajj asquiw yatipjjta acanacajj pasañasapuniwa. Cunapachatejj jumanacampïsipcäyät ucqhajja sapjjapunïyäsmawa: “Llaquinacajj utjaniwa” sasa; uqhamapuniw lurasi, jumanacajj ucjj yatipjjtawa.

Camisatejj kollunacajj Jerusalenar muyuntejja, uqhamaw Tatitojj marcapar muyunti jichhasa, wiñayasa.

Iyawsäwi laycu Dios nayrakatan asquit uñt'atäjjatasatwa Diosampi sumancañajj utjistu Jesucristo Tatitusana.

Tatituncasajj cusisitäpjjapunim take urunacana. Wasitat sapjjsma, cusisipjjam. Suma chuymanïpjjatamajj take jakenacan uñt'atäpan. Tatitojja jac'anquiwa.

Nayan yugojja apapjjam, ucatsti nayat yatekasipjjaraquita. Nayasti llamp'u chuymani, alt'at chuymaniraquïtwa, ucatwa almaman samarañapjja jicjjatapjjäta.

Tatituw nayarojj asquinacamp phokhantitani: Tatay, qhuyapayasiñamajj wiñayawa, amparamamp luratanacarojj janiquiy armanucumti.

Nayaw juchanacamsa, pantasitanacamsa chhaktaytjja, cunjämatejj kenayanacajj chhaktapjje uqhama. Nayan ucar cuttanjjam, nayajjay jumarojj khespiysmajja.”

“Nayar munasitap laycusti, juparojj khespiyäwa, nayar uñt'atap laycusti, juparojj imaraquïwa. Nayar art'asitan ucapachajja, mayisitaparojj jaysäwa. Jupamp chicaw t'akhesiñancä, llaquisiñat irpsü, jach'aruw aptä;

Tatitun sutipajj imantasiña jach'a torrer uñtatawa, asqui jakenacajj jupan ucar imantasiñataqui jutapqui ucanacataquejja.

Nayajj Tatituruw takpach chuymajjamp suyt'äyäta: jupasti naya toker alt'anisin arnakasitajjar ist'i;

Utjistuwa Diosar iyawsañasajja, yatiractanwa cuntejj Diosarojj mayiñäni munañaparjama ucjja jupajj ist'istuwa. Cunjämtï yattanjja Diosajj oracionanacasarojj ist'istuwa, uca pachparaquiw yattanjja cuntejj mayctanjja ucajj niyaw utj-jjestu.

Arunacam munirinacajj suman jacasipjje, janiw cunas jupanacarojj tincuyquiti.

Amtasipjjam, Tatitojj Diosawa: jupaw irnokestu, jiwasanacasti jupancapjjtanwa, jupan marcapäpjjtanwa, ovej tamapäpjjaractanwa.

“Ist'apjjeta jumanaca, qhitinacatejj yatipcta cunatejj chekäqui uca, nayan yatichäwinacajj sum catoker marca. Jan ajjsarapjjamti jaken jan wali parlatanacapjja, janiraqui jaken jisc'achäwi arunacapampis sustjasipjjamti,

Uca laycuw iyawsañasampi jac'achasiñasa munasir Dios Awquisan tronoparojja, jiwasat qhuyapt'ayasiñapataqui, uqhamarac munasiñapata jiwasar yanapt'añapataqui, p'ist'ayasctan uca horasanacana.

Ajjsarcay lajja ch'amac chekawja sarcasasa, janiw cunarus ajjsarcäti, nayamp chic saratam laycu: lawamasa, thujrumasa, ch'am churitani.

Nayasti Diosan utapanjja, ch'ojjñasquir olivo kokar uñtatätwa, wiñayataquiw Diosan qhuyapayasiñaparojj alcatä.

Jan walt'añ urunac purincan ucapachajj, Tatituw utapan imantitani; ch'iwipampiw imjjäsitani; mä karka patjjaruw sayt'ayitani,

Munañamampisti apnakapjjeta. Munañamasti luratäpan acapachanjja, cunjämatï alajjpachana luratäqui uqhama.

Intimajj janipuniw ch'amact'caniti, phajjsin khanapas janiraquiw chhaktcaniti naya Tatituw juman wiñay khanamäyäjja uca laycu, lutosiña urunacamasa tucusjjaniwa.

Tatituw t'akhesiyat jakenacarojj arjjatasqui, jupaw llaquisiñ pachanacan imasqui.

Diosan reinopajj janiw mank'añäquis ni umañäquisa, jan ucasti cheka sarnakaña, cusisiña, sumancaña Kollan Ajayu toke ucawa.

Ucampis uca mä juc'a urunacana t'akhesipjjatama pasjjepansti, Diosajj jumanacarojj sumwa tucuyapjjätam, sum sayt'ayapjjaraquïtam. Uca Diosasti qhititejj take bendicionanac churquistu ucawa, uqhamarus Jesucristompi chicäñasataquiraquiwa jawsistu wiñayataqui.

Tatitur suyt'irinaca, ch'amañchasipjjam, jan ajjsarir chuymanïpjjaraquim.

Uca suyt'äwiw sum catjjäsistu uqhamarac almasa uñjaraqui, cunjämatejj anclajj mä barcorojj catjjäsejja uqhama. Jiwasan utjquistu uca suyt'äwejj alajjpach templon cortinap khepäjjan suma acht'ayatawa,

Diosan thaquipajj chekapawa, Tatitun arsutanacapajj take chuymamp iyawscayawa, Diosajj jupar take chuymamp alcatirinacarojj imascapuniwa.

Cupi tokeru, jan ucajj ch'eka tokerus saranucütajja, khepäjjamatsti mä aru ist'äta, saraquïtamwa: “Aca chekaw thaquejja, sarasipcaquim” sasa.

“Munat wawajjay, ch'iqhi cancañampipuni sarnakam, ewjja arunacarjama sarnakaraquim, ucasti jumarojj jacañwa churätam, mä collarjamawa c'achacht'araquïtam. Ucatsti jumajj jan ajjsarasaw sarnakäta, janipuniw cunapachas lanctcaraquïtati. Samart'ascäta ucqhasti janiw ajjsarayascätati; iquintjjäta ucqhasa jan ajjsarasaw icjjaraquïta.

Marcajjasti mä suma samarañ chekanwa jacani, suma utanacana, samarata jacañ utanacana,

Jilatanaca, janiw nayajj ucampejj sañ munapcsmati niyas jicjjatquirista uqhama, jan ucasti cunatejj khepancqui ucjja, armanuctwa, nayrancquis uc jicjjatañcamaw ch'amañchasiscta, cawqharutejj puriñasäqui, ucar puriñataqui, alajjpachan chürawi catokañataqui, cunataquitejj Diosajj Cristo Jesús tokejj jawsquistu uc catokañataqui.

Tatitutejj jan yanapquitasapänjja, niyaw jiwatanacamp chicäjjeriscäyäta. Tatay, niy lanctasiñampïscäyät ucapachaw, qhuyapayasiñamajj yanapt'itu. Llaquinacajjajj walipun yapjjatascän ucapachaw chuymachäwimampejj cusisiyista.

Juyqhunacarusti jan uñt'at thaquinacanjamwa irparaquëjja. Jupanacan nayrakatapansti ch'amacjja khanaruw tucuyäjja, kollunacsti pampa orakeruw tucuyaraquëjja. Take ucanacsti lurapunïwa.

“¿Janit pä jamach'is juc'a kollker aljasquejja? Ucampis janiw maynisa aca orakerojj liwektquiti jan Diosan munañapatjja. Felipe, Bartolomé, Tomás, Mateo impuesto cobriri; Jacobo Alfeon yokapa; Tadeo, yakha sutipasti Lebeo sataraqui; Ucampis jumanacatjja take ñic'utanacamasa mayat mayat suma jact'atawa. Uqhamasti jan ajjsarapjjamti, jumanacajj uca jisc'a jamach'inacat sipanjja wali jila alanïpjjtawa.

Acapachancquis ucanacat llaquisiñajja jiwañar apiriwa, ucampis Ajayun jacañat llaquisiñajja wiñay jacañaru, uqhamarac sumancañaruw api.

Uqhamasti munat jilatanaca, jumanacajj Tatitumpejj sum sayt'asipjjam, janirac sarakapjjamti. Irnakasipcaquim juc'ampi juc'ampi Tatitun luräwipanjja; jumanacajj yatipjjaractawa Tatitumpi mayaqui irnakapjjatamajj janiw inamayäquiti.

Diosajjay, mayisitajjarojj ist'aquimaya. Janiquiy mayisitajjarojj jan ist'ir tucumti. uruy arumaw marca taypin muyupayapjje; marcansti jake jiwayañamp ñankha amtañampiquiw utji, ñankha lurañanacaquiw utjaraqui, marca taypinjja, cunayman ñankhanacaw lurasi; khoru cancañampi, c'arisiñampejj janiw marcat chhaktquiti. Uñisirejjatejj tokenoketaspajja, amuquïsquiristwa; timajjatejj nayatac sayt'aspajja, jupataquejj imantasjjeristwa; ucampis jumaw nayamp chic sarnakerïtajja, jumätaw nayan alcatañajjajja, jumampiw wali sum parlt'asïyätan; cusisisaw jakenac taypin Diosan utapar saräyätan. Jiwajj acatjamat timanacajjar catuntpan. ¡Mankhapacharojj jacquirpach mantapjjpan, ñankhajj chuymanacapan tapachrantatawa! Nayasti Diosaruquiw art'asï; Tatitusti khespiyitaniwa. Jayp'usa, willjtasa, chicürusa, jacht'asisaw jupar yatiyasï. Diosasti mayisitajjarojj ist'aniwa. Nuwasïwinacan imitani, jacañajj khespiyani, uñisirinacajjajj waljanïcchi ucasa. Wiñay jaquir Diosaw ist'itu, jupanacarusti aynacht'ayaniwa, janiw sarnakäwinacap chekachasiñ munapquiti, janiraquiw Diosarus ajjsarapquiti. Jaysaquitaya, ist'araquitaya: llaquinacajjaw aynacht'ayitu. Uñisirejjan arupaw ajjsarayitu, ñankha lurir jakenacan wararitanacapaw qhathatiyitu. Cunayman llaquimpiw apjjatapjjetu, k'apisiñampiw catjañ munapjjetu.

Qhitinacatejj karjata, jan ch'amani sarnakasipqui ucanacarusti mank'añampi, umañampjja jilarquirwa churaraquï” sasa.

¡Diosay, munasiñamajj muspharcayawa! Chhekhanacamamp imantayasiñataquiw jakenacajj jumar thakapjjtam, utaman utjir mank'ampejj sist'atäpjjewa, mojjsa uman jawirat umayaractajja:

Jumajj pobrenacan arjjatiripätam laycu, qhititejj aynacht'atäqui ucarus arjjataractawa, jan walt'añanjja jumaw arjjattajja lupinsa jumaw ch'iwiñcht'aractajja. Khoru jakenacan samananacapasti thaya horasan jach'a thayar uñtatawa,

¿Cun sañänisa take acanacarojja? Diosatejj jiwasampïchejja, ¿qhitirac jiwas conträspasti?

“Nayätwa uva alejja, jumanacasti layminacäpjjtawa. Qhititejj nayampi mayaquïchi, nayasti jupampi mayaquiraquïta, uquïrejj walwa achuraqui, uqhamasti jumanacajj jan nayampejj janiw cuns lurapcasmati.

Pachpa samarañan Tatitojj jumanacarojj samarañ churpan take horasansa, cunayman toketsa. Tatitojj take jumanacampïpan.

Nayarusti, nayranacaman kalaparjamay imita, chhekhanacaman ch'iwipar imantita,

Naya, juman Tatitu Diosamaw, jumarojj amparat wayjjarsma, irparacsma; nayaw saracsma: ‘Jan ajjsaramti, nayaw yanapascäma.’ ”

Uqhamajja, Diosan munañaparjam t'akhesirinacajja, asquinac lurasipcañapaquiwa, Diosaruraquiw almanacapsa catuyasipjjañapa, qhititejj jiwasar lurirïqui ucaru, jupasti chekaparaquiwa.

“Lunthatajj jutiwa lunthatasiñataqui, jiwayañataqui, tucjañataqui, ucampis nayajj juttwa jacañanïpjjañamataqui, uqhamarac jilarquir jacañanïpjjañamataquiraqui.

Mä jawiraw Diosan marcaparojj cusisiyi, Alajjpachanquirin kollan marcaparu. Diosajj marcap taypinquiwa, jupaw imascani; Diosaw khanjtatpach marcaparojj yanapascani.

Jesusasti jupanacar uñtasinjja sänwa: —Jakenacataquejj take acanac lurañajj wali ch'amawa, ucampis Diosataquejj janiw ch'amäquiti —sasa.

¡Alajjpacha, cusisiñat art'asim! ¡Orake, walpun cusisiraquim! ¡Kollunaca, cusisiñatsti wal arnakasipjjam! Tatitun marcaparu chuymachatap laycu, llaquisiñ horasapansti Tatitojj marcapatjja qhuyapt'ayasiwa.”

Janiw esclavo tucuyir ajayu catokapctati ajjsaratac sarnakascañataqui, jan ucasti catokapjjtawa Diosan wawapa tucuyquistu uca Ajayu, ucat jupajj arsuyistu: “Nayan Awquejja” sasa.

Jesusasti jupanacarojj sänwa: —Nayätwa jacañ churir t'ant'ajja. Qhititejj nayaru jutqui ucajja, janiw mayampis awtjayascaniti. Qhititejj nayaru iyawsquitani ucajja, janiw mayampis pharjayascaniti.

Nayasti jumamp chicapuniw utjasïyäta, jumaw cupi amparajjat wayjjarustajja, amtatamarjamaw irpistajja, khapak chekawjaruw puriyaraquitätajja.

“Nayätwa take jaquirinacana ch'amani Diosapajja. Janiraquiw nayataquejj cunas jan lurasirjamajj utjquiti.

Tatitojj sapür jach'añchatäpan, Diosaw jan walt'añanacas apasqui, jupaw Diosasajja, khespiyasiñasasa.

Tatituw nayarojj yanapasquitu, ucatwa jaken jan wali arunacapajj jan chuyma ust'ayquituti, ucatracwa nayajj mä karkar uñtata suma sayt'astjja, yatiractwa nayajj janiw cuna p'enksa pascäti.

Diosaw suma amtäwinac churapjjtam, jupa pachparaquiw yanapasipctamjja uca lurañanac phokhañanjja jupan munañaparjama.

“Janiw wajcha jaytapcämäti, nayajj cutt'anïwa jumanacampïscañataqui.

niya p'aquisirjam sokos lawsa janiw p'acjcaniti, janiraquiw niya jiwt'asquirjam mechsa phust'caniti. Chekpachansa jupajj sumancañampi cheka cancañampwa apanini.

Arunacamajj sarnakäwejjatac khanawa, thaquejjan khantiriraquiwa.

Cawquintejj paninisa, quimsanisa sutejjaru tantachatächejja, nayajj jupanac taypinctwa.

uqhamaraqui cunja jach'asa jan tucusquiriraquisa ch'amapajja, cawquïritejj lurqui jiwas iyawsirinacjjana. Aca muspharcañ ch'ama Diosajj uñacht'aycäna, Jumanacasti Dios Awquisan uqhamaraqui Tatit Jesucristosan bendicionapa, samarañapa catokapjjam. cunapachatejj jiwatanac taypit Cristoru jactayqui ucawa, ucatsti alajjpachanjja jupan cupëjjaparuw kont'ayasi, take munañaninacjjaru utt'ayasa, marca apnakerinacjjaru, autoridadanacjjaru, ch'amaninacjjaru, cunatejj utji jichhürunacansa, khepa urunacansa utjcani ucanacjjarusa.

¡Cunja sumas Diosan yatiñ cancañapajja, munañapasa, amuyt'apasa! Janiw jupan amtäwinacapjja khanañchcsnati, ni jupan thaquipsa amuyt'caracsnati.