Jeremías 6:16 - Qullan Arunaca

¹⁶ Tatitojj marcaparojj siwa: “Thaqui jac'anacaru sayt'asipjjam ucatsti uñatatasipjjaraquim, nayra thaquinacat jisct'apjjam; cawquïrisa suma thaquejja ucata; ucatsti uca thaquinjam sarapjjam, ucapachaw samarapjjaraquïta.” Ucampisa jupanacajj sapjjewa: “Janiwa, janiw uca thaquinjam sarapquiristti” sasa.

Aymar Bibliia 1986

¹⁶ Tatitojj marcaparojj siwa: “Thaqui jac'anacaru sayt'asipjjam ucatsti uñatatasipjjaraquim, nayra thaquinacat jisct'apjjam; cawquïrisa suma thaquejja ucata; ucatsti uca thaquinjam sarapjjam, ucapachaw samarapjjaraquïta.” Ucampisa jupanacajj sapjjewa: “Janiwa, janiw uca thaquinjam sarapquiristti” sasa.

Qullan Arunaka DC

¹⁶ Tatitux markaparux siwa: “Thakhi jak'anakar sayt'asipxam ukatsti uñatatasipxarakim, nayra thakhinakat jiskt'asipxam; kawkïris suma thakhix ukata; ukatsti uka thakhinjam sarapxam, ukapachaw samarañ jikxatapxäta.” Ukampis jupanakax sapxiwa: “Janiwa, janiw uka thakhinjam sarapkiristti” sasa.

Jeremías 6:16 Jak'a apnaqawi uñst'ayäwi

1 Reyes 8:36

jumajja alajjpachatpacha ist'asinjja perdonam Israel marcamana uywatanacamana juchanacapa. Ucatsti yaticham asqui thaqui sarapjjañapäqui uca. Ucatjja marcamaru aca orake herenciata churcta ucarusti jalluma puriyanim.

2 Crónicas 19:11

Amarías jach'a jilïri sacerdotewa jumanacar ujapjjätam Diosan arunacap toketjja, ucatsti marca toketa uñjerejja Ismael chachan Zebadías yokaparaquïniwa, jupajj Judá tribunjja jilïriwa; ucatjja levitanacajja jumanacan yanapirinacamäpjjaniwa. ¡Uqhamasti ch'amachasipjjam, ucatsti phokhapjjaraquim! ¡Tatitojj qhititejj asqui lurcani ucampïpan!” sasa.

Salmos 116:7

Almajjay, jichhajj samarasjjam, Tatitun nayat qhuyapayasitap laycu.

Isaías 2:5

¡Jacobon marcapa, jin sarañäni, Tatitun khanapanarac sarnakañäni!

Isaías 28:12

Jupasti nayraw jumanacarojj sapjjtam: “Acajj t'acuräwejja, acajj samarañasa; karit jakejj samart'aspan” sasa. Ucampis janiw ist'añjja munapctati.

Isaías 30:21

Cupi tokeru, jan ucajj ch'eka tokerus saranucütajja, khepäjjamatsti mä aru ist'äta, saraquïtamwa: “Aca chekaw thaquejja, sarasipcaquim” sasa.

Isaías 46:9

amtasipjjam cunanacatejj nayratpach lurascän ucanaca. Nayaquïtwa Diosajja janiw yakhajj utjquiti, nayätwa Diosajj, janiraquiw qhitis nayampejj chicachascaspati.

Isaías 57:2

samarañaru mantjjapjjatapatjja. Cheka thacwa jupanacajj sarapjjäna, jichhasti sepulturanacapan samarasipqui.

Isaías 8:20

¿Uqhamat mä cuna yatiyäwsa catokañataqui?’ sasa. Uqhampunwa parlapjjani, ucampis uca parlatanacapajj mä lokhe jaken parlatanacapjamawa.

Jeremías 12:16

Jupanacaw marcajjaru Baal diosataqui juramento lurañsa yatichapjjejja, ucampisa jichhajj marcajj taypinjja utjnokasjjapjjaniwa, sititejj marcajjan Diosaparu yupaychañataqui catokapjjani, sutejjaruraqui jurapjjani sasa: ‘Tatitojj jacasquiwa’ sasa.

Jeremías 18:12

Ucampisa jupanacajj sapjjaraquïtamwa: ‘¡Jan inamaya parlcamti! Cunjämarutejj nanacajj munapjjta uqhamaruw nanacajj sarnakapjjä, uqhamaraqui chuymanacajjan jan wali amtatanacaparuw arcaña munapjjarcta’ ” sasa.

Jeremías 18:15

Ucampis marcajjajj nayarojj armituwa, ucatsti c'ari diosanacaruw inciensonac loktasipjjaraqui. Nayra thaquipatsti yakha thaquiruw saranucuwayjjapjjaraqui, ucatsti jan uñt'ata thaquinjam sarapjjaraqui.

Jeremías 2:25

“¡Israel, jan cayunacamjja chhojjriñchjasimti k'ara cayu jalnakasajja, janirac mallk'amsa wañantayasimti! Ucampis jumajj sistawa: ‘Janiwa. Janipuniw sayt'quiristti, jayanquirinacaruw wal muntjja, jupanacampiraquiw sarjjä’ sasa.

Jeremías 22:21

Cunapachatejj jumajj wali suma sarnakascäyäta ucapachaw nayajj jumarojj parlsma, ucampis janiw ist'añ munctati. Wayna cancañamatpacha uqhampuniw sarnaktajja; ¡arunacajj ist'añsti janipuniw munctati!

Jeremías 31:21

“Israel, jichhajj thaquinacam suma chimpusim, uqhamat wasitat janc'aqui jicjjatjjañamataqui; cawquïri thaquinacantejj sarnakcäyäta ucanacjja sum amuyam. ¡Israel marca, cuttanjjam, cuttanjjam marcanacamaru!

Jeremías 42:3

Tatitu Diosamarusti saraquim, cawqui cheksa nanacajj sarapjjä, cunsa lurapjjä ucanac toketjja —sasa.

Jeremías 44:16

“Cuna arunactejj jumajj Tatitu toket apanipjjesta ucanacarojj janiw ist'apcäti.

Jeremías 50:5

Sión thaqui toketwa jisct'asipjjaraquini, ucatsti ucsaruw aqham sasa sarapjjaraquini: ‘Tatitun ucaru sarjjañäni, jupampisti mä wiñayataqui arust'äwi luraraquiñäni, jan mayampitaqui armasquiri’ sasa.

Jeremías 7:23

Ucampisa jupanacarojj saraquïyätwa nayaru ist'apjjañapa; uqhamatwa nayajj jupanacan Diosapäyäjja, jupanacasti nayan marcajjaraquïniwa sasa. Ucatsti saraquïyätwa cunjämtejj nayajj siscta uqhamar sarnakapjjañapa, uqhamat take cunas sumaqui sarañapataqui.

Jeremías 7:24

Ucampisa janiw nayarojj ist'apquituti ni jaysapcaraquitusa, jan ucasti kala chuymanacapar jaysasaquiwa ñankha lurañanacaru catuyasjjapjjejja. Nayaru uñtañcamayasti, nayatjja maysaruw uñtapjjänjja.

Jeremías 7:3

Cuntejj Tatitojj sisqui ucanaca, jupasti take ch'amaniwa, Israelan Diosaparaquiwa. Asquichasipjjam sarnakäwinacama, uqhamaraqui luräwinacamsa, nayasti ucatjja jumanacarojj aca oraken jacayasipcämawa.

Malaquías 4:4

“Jumanacajj amtasipjjamaya cawquïri leyinactï Moisés uywatajjaru Horeb sat kolluna churcta ucanacata. ¡Ucanacasti ewjja arunacänwa, camachi arunacaraquïnwa take Israel marcan phokhañapataqui!

Lucas 16:29

Ucampis Abrahamajj juparojj sänwa: ‘Jupanacanjja utjiwa Moisesan, uqhamaraqui profetanacan kellkatanacapajja; ucanacar ist'apjjpan’ sasa.

Juan 12:35

Jesusasti ucjjarojj sänwa: —Mä juc'a urunacaquiw khanajj jumanac taypincani. Sarnakapjjamay khana utjquipanjja, jan ch'amacamp catjayasiñataqui; ch'amacan sarnakeristi janiw cawcsaru saratapsa yatquiti.

Juan 13:17

Acanactejj amuyt'apjjäta, ucat lurapjjaraquïta ucajja, cusisitäpjjätawa.

Juan 5:39

Jumanacajj Kellkatanacjj take amuyumpiw leepjjtajja, uca Kellkatanacan wiñay jacaña jicjjatañ amuyasina; ucampis Kellkatanacajj nayjjataracwa parli.

Hechos 17:11

Uca marcanquir judionacasti juc'amp suma chuymanïpjjänwa, Tesalonicanquir judionacat sipansa. Jupanacasti take chuymaw Pablompir Silasampirojj isch'uquipjjäna. Sapüruraquiw Kellkatanacsa yatjjatapjjäna —Uca arunacajj ¿chekapunïpachati janicha? —sasa.

Romanos 4:12

Chekawa, Abrahamajj circuncidatanacan awquipawa, ucatsti iyawsañampiraquiw arcapjje, cunjämatejj Abrahamajj janïr circuncidatäcasin iyawsañanïna uqhama.

Deuteronomio 32:7

“Uñtam khepa tokeru, amuythapisiraquim nayra maranacatsa; awquimarus mayiraquim ucat parlañapataqui, uqhamaraqui jilïri jakenacampi parlayasim:

Colosenses 2:6

Ucatpï cunjämtï Tatitur iyawsapctajja, uqhamaraquiw mayaqui jupampi jacapjjañamajja.

Hebreos 11:2

Nayra awquinacasajj sumaru uñt'atänwa iyawsañanïpjjatap laycu.

Hebreos 6:12

Janiw jayra tucupjjañama munapcti, jan ucasti yatekasipjjam qhitinacatejj iyawsäw toke, jan karjasisa take cunatejj Diosajj: “Churämaw” sisqui uca herencia catokapqui ucanacata.

Jueces 2:17

Ucampis israelitanacajj uca jilïrinacarojj janiw ist'añjja munapcänti. Dios nayrakatan jan walïpjjatap laycusti yakha diosanacaru yupaychiriw sarapjjäna. Jupanacan nayra awquinacapasti Diosan mandamiento arunacaparu ist'asaw jacapjjäna, ucampis jupanacajja janiw uca uñacht'äwirjam sarañjja munapcänti.