Números 20:1 - Qullan Arunaca

¹ Marat mä phajjsi sarakquipansti, israelitanacajj Zin sat wasararuw puripjjäna; take marcpachaw Cades sat chekana kamarapjjäna. Ucanwa Mariajj jiwjjäna, ucanaracwa imantatäjjäna.

Aymar Bibliia 1986

¹ Marat mä phajjsi sarakquipansti, israelitanacajj Zin sat wasararuw puripjjäna; take marcpachaw Cades sat chekana kamarapjjäna. Ucanwa Mariajj jiwjjäna, ucanaracwa imantatäjjäna.

Qullan Arunaka DC

¹ Israelitanakax marat nayrïr phaxsi saraqataruw Sin sat wasarar puripxäna; ukatsti Cadés chiqan mä qawqha pacha qamarapxäna. Ukan Mariax jiwxäna, ukanarak p'amp'atäxäna.

Números 20:1 Jak'a apnaqawi uñst'ayäwi

Génesis 14:7

Quedorlaomer reyisti, uqhamarac jupampïpcän ucanacasti cuttasinjja En-mispat chekaruw puripjjäna, cawqhatejj Cades satäcaraqui uca chekaru. Ucansti take cuntejj jicjjatapcän thaquinjja take ucanacwa t'unjapjjäna amalecitanacan orakep tokena, uqhamarac amorreonacampejj uca quipca luraraquïna, ucanacasti Hazezon-tamar sisqui ucsa tokenacanwa jacapjjäna.

Salmos 29:8

Tatitun arupajj wasararuw qhathatiyi, Tatituw Cades wasararojj qhathatiyaraqui.

Éxodo 15:20

Ucat Aaronan María sat profetisa cullacapampi, uqhamarac mayni warminacampejj panderetanac tocasisaw thokhopjjäna.

Éxodo 2:4

Ucatsti uca wawan cullacapampiw jaya chekat uñch'uquiyäna, cunatejj wawaru pascaspa uca uñjañapataqui.

Éxodo 2:7

Ucatsti uca wawan cullacapajja faraonan phuchapar jicjjatasinjja sänwa: —¿Waliquïspati hebreo warminac taypita mayni irptanirista aca wawa jumatac uywañapataqui? —sasa.

Ezequiel 47:19

“Aynach tokenquiri korpasti Tamar sisqui uca chekat sartanisasti Meriba-cades sisqui uca ch'ojjña chekwa pasaraquini, Egipto jawiranjama, jach'a Mediterráneo kota lacaru puriñcama.

Miqueas 6:4

Nayaw jumarojj Egipto marcat apsunsma, t'akhesiñat khespiyanisa; nayawa Moisés, Aarón, uqhamarac María jupanacaru qhitanta, jumar irpañapataqui.

Números 12:1

Mariampi Aaronampejj Moisés contraw parlapjjäna jupan mä etiope warmimpi casarasitapata.

Números 12:10

Cunapachatejj kenayajj carpat sarjjäna ucqhajj Mariajj lepra usumpiw uñstäna, take janchinacapas jank'or tucuta. Aaronajj Mariaru uñtasinjja lepra usunwa uñcatäna,

Números 12:15

Uqhamaw Mariajj pakallko urutaqui campamentotjja ankaru jakonucutäna. Ucchañcamajj janiw marcajj cawcsarus onjjtcänti.

Números 13:21

Jakenacasti sarasinjja uñatatapjjänwa marcjja; aynach token Zin sat wasarata, amsta token Rehob sat chekacama, Hamat sat mantañ chekacama.

Números 13:26

Cades sat chekaru, Parán wasararu. Ucanwa Moisesas, Aaronas uqhamarac take israelitanacas jicjjatasipjjäna, ucatsti yatiyapjjänwa cuntejj jupanacajj yatjjatanipcän take ucanaca, uqhamaraquiw uca oraken achunacapsa uñacht'ayapjjäna.

Números 20:16

Ucatsti Tatituruw arnakasipjjta, jupasti ist'apjjetuwa mayisitanacajjarojja, angelap qhitanipjjetu, ucatwa Egiptot irpsunipjjaraquitu. Uqhamaw jichhajj Cades sat marcancapjjta, orakemampis korpasqui ucqhana.

Números 20:22

Take Israel marcajj Cades sat chekat sartawayasajj, Hor sat kollu tokeruw sarapjjäna.

Números 20:28

Ucqhanwa Moisesajj Aaronarojj sacerdote isipa issuyäna, ucatsti Eleazararuw isintayäna. Uca pachpa kollu patjjanwa Aaronajj jiwjjaraquïna; Moisesampi Eleazarampisti kollutjja sarakanjjapjjänwa.

Números 26:59

Amram chachasti casarasïnwa Leví chachan mä imill wawapampi, sutipasti Jocabed satänwa, jupasti Egipton nacitayna cunapachatejj Leví chachajj Egiptonccän ucqha. Amram, Jocabed ucanacasti Aaronan, Moisesana, Mariana awquipa, taycapänwa.

Números 27:14

jumanac paninejj Zin sat wasaranjja, cunapachatejj marcajj naya contra sartcäna ucqhajja, jan arunacajjar ist'apjjatam laycu, janiraquiw jumanacajj jach'añchapquistati jupanac nayrakatanjja, cunapachatejj uma mayipquitän ucqhajja. (Acasti Meriba uma jalsut parlasi, Cades chekana, Zin sat wasarana).

Números 33:36

Ezión-geber sat chekat mistuwayasajj Zin sat wasararuw kheparapjjäna, cawqhatï Cades sat sutinïcaraqui ucqharu.

Deuteronomio 1:46

Ucatwa jumanacajj Cades sat chekaru kheparjjapjjäyätajja walja maranaca ucan jacañataqui.

Deuteronomio 2:14

“Cunapachatï Cades-barnea chekat mistunipctan, ucat Zered sat jisc'a jawir maqhatapctan uca urcamajj quimsa tunca quimsakallkon maraw pasjjäna. Ucañcamasti campamenton guerran nuwasiñatac waquichatäpcän take uca jakenacaw jiwarjjapjjäna, cunjämatï Diosajj juramentompi arsüna uqhamar phokhasa.

Deuteronomio 32:51

Jumanac paninisti jan iyawsañaniw Israel marca nayräjjan nayataquejj tucupjjäyätajja, cunapachatejj Meriba-cades umanacana, Zin sat wasarana jicjjatasipjjäna ucqhajj janiw jumanacajj jupanac nayräjjana nayarojj jach'añchapquistati.

Jueces 11:16

Nanacasti Egiptot mistunisasti, wasaran sarnakaniwayasajja Mar Rojo sat kotaruw purinipjjta, ucatjja Cades sata marcaruraqui.