1 Corintios 14:3 - Qullan Arunaca

³ Ucampis qhititejj Diosan arunacapa parlqui ucajj Diosat catokasinjja jakenacaruw parli iyawsañanacapan jiltapjjañanacapataqui, ch'am catjjatayañataqui uqhamarac chuymachañataquisa.

Aymar Bibliia 1986

³ Ucampis qhititejj Diosan arunacapa parlqui ucajj Diosat catokasinjja jakenacaruw parli iyawsañanacapan jiltapjjañanacapataqui, ch'am catjjatayañataqui uqhamarac chuymachañataquisa.

Qullan Arunaka DC

³ Ukatsipana, khititix profecía arunak yatiyki ukax iglesiar jiltayañatakiw parli, ukampiw ch'amañchi, chuymacharaki.

1 Corintios 14:3 Jak'a apnaqawi uñst'ayäwi

Lucas 3:18

Uqham yakha walja ewjjanacampi churasinwa Bautisiri Juanajj suma yatiyäwinacjja jakerojj yatiyäna.

Hechos 13:15

Moisesan kellkatapampi profetanacan kellkatapampi leet'asinjja, sinagogan jilïrinacapajj jawsayapjjänwa, aqham sasa: —Jilatanaca, jumanacantejj utjapjjstam cuna suma ewjjt'añanacasa, arsusipcaquim —sasa.

Hechos 14:22

Uca marcanacansti Tatitur iyawsirinacarojj ch'amañcht'apjjänwa. Sapjjaraquïnwa: “Tatitur iyawsañanacamanjja ch'aman sayt'apjjam. Diosan marcapar mantañataquejja, t'akhesiñajj waquisipuniwa” sasa.

Hechos 15:32

Judasampi Silasampisti, Diosan profetanacapäsinjja, arunacapampejj jilatanacarojj wal chuymacht'apjjäna uqhamarac ch'amañcht'apjjaraquïna.

Hechos 4:36

Jupanac taypinsti Chiprenquir mä levita jakew utjäna, José sata. Juparusti apostolonacajj Bernabé sasaw sutichapjjaraquïna. (Uca sutisti “chuymachiri” sañ muni.)

Hechos 9:31

Ucapachasti jach'a samarañaraquiw iglesianacanjja utj-jjäna, Judeana, Galileana, uqhamarac Samariana. Jupanacasti wali ch'amaniraquiw tucjjapjjäna. Tatitur ajjsarasaraquiw sarnakapjjäna. Uqhamatwa Kollan Ajayun ch'amapampejj waljaniptapjjaraquïna.

Romanos 12:8

Maynitejj mayninacaru ch'amachañ yatchejja, ucaruy uchaspan; qhititejj churaña yatekejja, take chuyma churpan; qhititejj sarayañ yatchejja, amuyumpi saraypan; pist'atanacar yanapt'aña yatchejja, cusisit chuymampi churaracpan.

Romanos 14:19

Uqhamasti jiwasanacajj cunanacatejj sumancaña apanqui ucanac thakascaquiñäni, ucampiraquiw ajayu token jiltañanjja maynit maynicama yanapt'assnajja.

Romanos 15:2

Sapa mayniw jiwasanacajj jake masisatac take cunansa sumäñasa, jupan iyawsañapajj jiltañapataqui.

1 Corintios 10:23

Chekpachansa maynejj cuntejj munqui ucjj lurascaquispawa, ucampis janiw takpachati maynitaquejj asquïcaspa. Maynitejj cuntï munqui uc luraspajja, ucampis janiw take cunas jupatac asquïquiti ajayu token jiltañataquejja.

1 Corintios 14:12

Ucatpï, jumanacajj niyaqui wali ajayu toketa cuna ch'amsa catokañ munapjjstajja, munapjjapunim cunanacatejj iglesianquirinacar jiltaycaspas ajayu tokenjja uca lurañanac catokaña.

1 Corintios 14:17

Oracionan Diosar yuspagaratamajj wali sumäscaspawa, ucampis maynejj janiw ajayu tokenjja jiltquiti.

1 Corintios 14:26

Uqhamajj jilatanaca, jichhajj acaw utji: Cunapachatï tantacht'asipjjäta ucqhajja, jumanacatjja mayninacajj k'ochusiñwa munapjje, yakhepanacajj yaticht'aña, yakhepanacanjja utjaraquiw Diosan mä cuna yatiyäwipasa, jan ucajj jan uñt'at arunacat parlañasa, jan ucajj uca jan uñt'at arunacat parlatäquis uc khanañchañasa. Ucampis take cunas ajayu token iglesianquirinacar jiltayañataquïpan.

1 Corintios 14:31

Uqhamata take qhitinacatï Diosat catokapcta uca arunaca maynit maynit parlapjjañamataqui, takenis yatekañapataqui, amuyt'asiñapataquiraqui.

1 Corintios 8:1

Jichhajj yakha diosanacar sacrificion churatäquis uca aychanac mank'añanacjjat parlapjjaraquïma. Chekpachansa takeniw aca toketjja yattanjja. Ucampis uca yatitasajja jach'a jach'wa tucuyistu, munasiñasti ajayu tokenwa jiltayaraquistu.

2 Corintios 1:4

Take t'akhesiñanacasanwa Diosajj chuymachistu, jiwasajj t'akhesirinacar chuymachañasataqui, cunjämtï Diosajj jiwasar chuymachquistu uqhama.

2 Corintios 2:7

Jichhajj uca jakerojj perdonjjapjjam chuymachapjjaraquim inampis llaquisiñatjja sinti mayjt'asispa.

Efesios 4:29

Jan wali arunacjj jan parlapjjamti, jan ucasti suma arunacamp parlapjjam, uqhamata ist'irinacamajj jiltañana yanapt'atäñapataqui, uqhamarac bendicitäñapataqui.

Efesios 6:22

Ucataquiw qhitanta, cunjämäsipctejj uc jumanacaru yatiyañapataqui, uqhamat juc'amp jumanacaru ch'amañchañataqui.

Colosenses 4:8

Ucataracwa jumanacan ucaru qhitanta, jumanacar yatiyañapataqui cunjämäpctejj uca toketa, uqhamarac jumanacaru ch'amañcht'añataqui.

1 Tesalonicenses 2:11

Yatipjjaractawa cunjämtejj ch'amañchapjjäyäsma, chuymachapjjaraquïyäsma sapa mayni jumanacaru, cunjämtejj mä awquejja wawanacapampi lurqui uqhama.

1 Tesalonicenses 2:3

Yatichäwinacajjanjja janiw pantjatäpcäyätti, janiraquiw jan wali amtäwimpisa parlapcsmati ni sallka amtäwimpisa.

1 Tesalonicenses 3:2

ucatsti Timoteo jilataruw qhitanipjjsma jumanacar uñjiri. Jupajj Diosan sirviripawa, Tatitun khespiyasiñ arunacap parlañanjja nanacamp chicaraquiw irnake. Ucatsti jupajj ch'amacht'apjjeristamwa, nayraruw irptapjjeristam iyawsäwinjja,

1 Tesalonicenses 4:1

Jichhajj jilatanaca, achict'apjjsmawa, ewjjt'apjjaracsmawa acjja Tatit Jesusan sutipana: cunjämatejj nanacajj yatichapjjsmajja Diosar cusisiyquiri sarnakañjjatjja, uqhamarjama lurasipcaquim juc'amp juc'ampi.

1 Tesalonicenses 4:18

Uqhamajj maynit maynicama aca arunacampejj ch'amañchasipjjam.

2 Tesalonicenses 3:12

Uca casta jakenacarojj Tatit Jesucristosan sutipjjaruw ewjjt'apjjta: “Llamp'u chuymampi jacañataquejj irnakapjjpan” sasa.

1 Timoteo 1:4

janirac nayra jan tucusquir parlanacar ist'asipcañapataquisa. Acanacajj inamaya ch'ajjwañanacaruquiw api, ucatsti Diosajj cuna ewjjanactejj iyawsäwi laycu phokhañasataqui churquistu ucarojj janiw yanapquistuti.

1 Timoteo 4:13

Nayan puriniñajjcamajja, jakenacan nayrakatapana Diosan arunacap leeñaru uchasim, jilatanacar ch'amañchasina, uqhamarac yatichasina.

1 Timoteo 6:2

Mayninacatejj iyawsir uywirinacanïchejja, janiw iyawsirïtap laycuquiti juc'ac ajjsaratañapäquejja, jan ucasti uywatanacajj juc'amp suma uñjañampiw sirvipjjañapajja, qhitinacatejj jumanacan asqui luräwinacam catokapctam ucanacajj iyawsir uywirinacawa, munat jilatanacaraquiwa.

2 Timoteo 4:2

Tatitun arunacap parlam; waquisqui ucqhasa, jan waquisqui ucqhas parlapunim. Amuyt'ayam, ewjjt'araquim, ewjjanacs churaraquim, take llamp'u chuymampi yatichasa.

Tito 1:9

Uqhamaraquiw catjjäsiñapa yatichatäqui uca cheka arunaca, uqhamat yakhanacar waytt'añapataqui uca suma yatichäwimpi, uqhamarac qhitinacatejj jan Diosar ist'añ munapqui ucanacar iyawsayañapataquisa.

Tito 2:15

Acanacwa jumajj yatichañamajja, yanapt'asa, uqhamarac take jilïr cancañampi ewjjt'asa jan qhitimpis jisc'achayasisa.

Tito 2:6

Uqhamaraqui waynanacarus waytt'am suma amuyunïpjjañapataquipuni.

Tito 2:9

Uywatanacarusti ewjjt'am, uywirinacaparu take cunansa ist'apjjpan, janiraqui jupanacarojj ayncatapjjpati.

Hebreos 10:25

Janiraquiw tantachasïwinacasar janejj sarañasäquiti cunjämtejj yakhepanacajj jan sarapquiti uqhama, jan ucasti maynit mayniruw waytt'asiñasa, Tatitun jutäwipa jac'ancjjatapa yatisinsti juc'ampïñapawa.

Hebreos 13:22

Jilatanaca, achict'apjjsmawa llamp'u chuymampiqui aca ewjja arunac catokapjjañama, mä jisc'a cartacwa kellkt'anipjjsma.

Hebreos 3:13

Ucampis, maynit maynicam sapüru ch'amacht'asipjjam, jichhüru tiempojj utjquipana, jan qhitis jumanacat juchamp atipjatäñapataqui, ucat chuymapajj jan wal tucuñapataqui.

1 Pedro 5:12

Silvanojj nayataquejj mä suma asqui jilatat uñt'atawa, juparaquiw aca cartjja jumanacatac apani. Nayasti ewjjt'apjjsmawa, ucatsti chekwa sapjjsma cuna bendicionanactejj Diosat catokapctas ucajj, Diosan cheka munasiñapwa uñacht'ayistu. Aca tokensti sumpun sayt'asipjjam.

Judas 1:20

Jumanacasti munat jilatanaca, uca kollana iyawsäwinacamanjja ch'aman sayt'asipjjam, Kollan Ajayun ch'amapampirac Tatitut mayisipjjam.