Sant Marc 9:3 - Bibl Koad 21: Ar Bibl e Brezhoneg evit ar Vretoned E zilhad a zeuas da vezañ lugernus, gwenn evel an erc’h, ken n’eus gwenner ebet war an douar a c’hellfe gwennañ evel-se. Testamant Nevez 1897 (Jenkins) He zillad a zeuaz da veza lugernus, gwenn evel an erc’h, ker gwenn ken n’euz kandier e‐bed var an douar a helfe renta ker gwenn‐ze. |
C'hwi hag a chom gourvezet e-kreiz ar parkeier, e tegemerit eskell arc'hantek ar goulm hag he fluñv melen-aour.
Deuit ha divizomp! eme an AOTROU. Pa vefe ho pec'hedoù evel ar ruz-moug, e teuint gwenn evel an erc'h, ha pa vefent ruz evel al limestra, e teuint evel gloan.
Hag e sellis betek ma voe lakaet tronioù ha ma azezas Henaour an deizioù. E zilhad a oa gwenn evel an erc'h, ha blev e benn evel gloan glan. E dron a oa evel flammoù-tan, hag e rodoù evel un tan grizias.
Korneli a lavaras: Pevar devezh ’zo, em eus yunet betek an eur-mañ, ha d’an navet eur, e peden em zi. Ha setu, un den gwisket gant dilhad lugernus en em ziskouezas dirazon
evit debriñ kig ar rouaned, kig ar gabitened, kig ar re c’halloudek, kig ar c’hezeg hag ar re a bign warno, kig an holl dud, frank ha sklav, bihan ha bras.
Me a lavaras dezhañ: Aotrou, te a oar. Hag e lavaras din: Bez’ int ar re a zo deuet eus an trubuilh bras, gwalc’het o deus o saeoù ha gwennet anezho e gwad an Oan.
Goude-se e sellis ha setu, un engroez ken bras ken na c’helle den kontañ, a bep broad, a bep meuriad, a bep pobl, a bep yezh, en em zalc’he dirak an tron ha dirak an Oan; gwisket e oant gant saeoù gwenn, gant palmez en o daouarn.