Nthi 3:6 - ÎVUKU RÎA ÛVORO MWARO Ririkanaga Ngai-Mûnene maûndûrî maku monthe, nake nîakaarûngaria njîra ciaku. |
Mûthamaki Daudi nîwerire Solomoni atîrî, “Mwana wakwa, ûmenye Ngai wa aguo na ûmûtungatagîre na ngoro yonthe na meciria marî na wendi. Ngai-Mûnene nîatuîragia ngoro cionthe na nîamenyaga meciria na mîvango yacio. Ûngîmûcaria, ke nîagûgwîtîkîra. Nwatî ûngîmûrega nîagûgûtiganîria nginya tene na tene.
Nake Ezira nîwacokire akiuga atîrî, “Ngai-Mûnene, Ngai wa methe metû ma tene arokumua! Nîûndû nîatûmîte mûthamaki agîe na wendi wa kûva gîtîîo hekarû ya Ngai-Mûnene îrîa îrî Jerusalemu.
We Mwathani, thikîrîria mavoya makwa na mavoya ma ndungata icio ciîngî ciaku irîa irenda gûgûkumia ikenete. Ûmûnthî va ndungata yaku ûvootani na ûtûme mûthamaki ambîguîre ntha.” Vîndî îo nînie naarî ndungata yake ya kûmenyerera ndivei.
Ngai nîwacokire akîmvotithia kûgomanithia andû, atongoria vamwe na anene ao nîguo mandîkwe kûringana na njiarwa ciao. Nînoonire îvuku rîa njiarwa irîa ciaûkire kuuma îthamîriorî mbere, narîo rîandîkîtwe maûndû mama:
Ngai-Mûnene augîte atîrî, “Nîngûkwonia njîra îrîa wagîrîrwe nî kûrûmîrîra, nî ngûthomithia na ngûmenyerere.
Ûthingu nîûtûmaga mûndû agîe na mûtûûrîre mwaro, nwatî mûndû mwaganu agwîthagua nî waganu wake.
Njîra ya andû arîa athingu nî nûngarû; we Ngai-Mûnene nîûrûngaragia njîra cia andû arîa athingu.
Mûngîvîtia njîra mûthiî na mwena wa ûrîo kana wa ûmotho, nîmûkegucaga mûgambo vuva wenyu ûkîmwîra atîrî, “Îno nîyo njîra; mîrûmîrîreni.”
Nînie nathire Cairasi avingie ûrîa nendaga na kîvooto, na nîngaarûngaria njîra ciake cionthe. Nîagaatuma rîngî îtûûra rîakwa Jerusalemu, na arekererie andû akwa arîa marî îthamîriorî. Ageeka ûguo atakûrîvwa kana avakwa kîveo.” Ûguo nîguo Ngai-Mûnene augîte.
Ngai-Mûnene Ûrîa Mûtheru wa Isiraeli mûvonokia waku, arauga atîrî, “Nie nînie Ngai-Mûnene, Ngai waku, nînie ngûrutaga maûndû ma gûkûguna, nînie ngûtongoragia njîra îrîa wagîrîrwe nî kûthiîrîra.
Ngai-Mûnene nîmbicî atî mûndû ndarî ûvoti îgûrû rîa mûtûûrîre wake, gûtirî mûndû ûngîvota gûtongoria mûtûûrîre wake.
Tûvoere nîguo Ngai-Mûnene Ngai wetû atwonie njîra îrîa arenda tûrûmîrîre na ûrîa arenda twîke.”
Namo mavinda mamwe îtu nîrîekaraga îgûrû rîa îgema rîa gûcemanîrua mîthenya mînini. Vîndî îrîa Ngai-Mûnene athana mathiî, nîmaathiîcaga na vîndî îrîa athana mekare magemarî nîmeekaraga.
Kwoguo ûndû wa wonthe mwîkaga ethîrwa nî kûrîa kana nî kûnyua, îkagani nîguo mûgoocithie Ngai.
Nîtûgûcokia ngatho kûrî Ngai ûrîa ûtûmîte Tito agîe na wendi wa kûmûtethia ta ûrîa tûrî naguo.
Mûtikamakue nî ûndû wana ûrîkû nwatî voyani na mwîtie Ngai kîrîa kîonthe mûrenda na mûcokagie ngatho vîndî cionthe.
Maûndû monthe marîa mûgekaga kana mûkaugaga, mekageni mûgîcokagîria Ngai Îthe wetû ngatho rîîtwa rîa Mwathani Jesû.
Ûndû wa wonthe ûrîa mûgekaga, wîkageni na wendi takwa mûrarutîra Mwathani wîra nwatî tî andû.
Nwatî ethîrwa nîkûrî na mûndû wana ûmwe wa cienyu ûtarî na ûûgî, nîwagîrîrwe nîgwîtia Ngai ûrîa ûvecaga andû onthe arî na ûtaana na ûtugi.
Nake Daudi nîwaûririe Ngai-Mûnene atîrî, “Nthiî nûmîrîre gîkundi gîkî? Nîngûgîkinyîra?” Nake Ngai-Mûnene nîwacokirie atîrî, “Îî kîrûmîrîre nîûgûgîkinyîrîra na ûvonokie andû arîa atave.”