Psalms 86 - Die Bybel 2020-vertaling

¹ 'n Gebed. Van Dawid. Here, draai u oor, antwoord my, want ek is magteloos en behoeftig.

² Beskerm my lewe, want ek is 'n getroue volgeling. Verlos u dienskneg wat op U vertrou; U is my God.

³ Wees my genadig, my Heer, want na U roep ek die hele dag lank.

⁴ Maak die hart van u dienskneg bly, want na U, my Heer, hunker ek.

⁵ U, my Heer, is immers goed en vergewensgesind, en oorvloedig in troue liefde teenoor almal wat na U roep.

⁶ Here, hoor tog my gebed en gee tog aandag aan my smeekgebede.

⁷ In die tyd van my nood roep ek na U, want U antwoord my.

⁸ Daar is niemand soos U onder die gode nie, my Heer, en niks soos u werke nie.

⁹ Al die nasies wat U gemaak het, sal kom en voor U, my Heer, in aanbidding buig; hulle sal u Naam eer.

¹⁰ Want groot is U en U doen wonders; U alleen is God.

¹¹ Leer my u pad, Here; ek wil in u waarheid leef. Gee dat ek heelhartig vir u Naam ontsag sal hê.

¹² My Heer, my God, ek wil U prys met my hele hart; ek wil u Naam vir altyd eer,

¹³ want u troue liefde teenoor my is groot: U het my lewe weggeruk uit die •doderyk daar onder.

¹⁴ O God, vermeteles het teen my opgestaan; 'n klomp geweldenaars soek my lewe en hou U nie voor oë nie.

¹⁵ Maar U, my Heer, U is 'n barmhartige en genadige God, geduldig, oorvloedig in troue liefde en waarheid.

¹⁶ Draai na my en wees my genadig; gee u krag aan u dienskneg, en verlos die seun van u diensmeisie.

¹⁷ Gee my 'n teken van goedheid sodat hulle wat my haat, dit kan sien en beskaamd staan. U, Here, het my immers gehelp en getroos.