Psalms 123 - Die Bybel 2020-vertaling

¹ 'n •Pelgrimslied. Na U kyk ek op, U wat in die hemel woon.

² Kyk, soos die oë van slawe gerig is op die hand van hulle eienaar, soos die oë van 'n slavin gerig is op die hand van haar eienares, so is ons oë gerig op die Here ons God totdat Hy ons genadig is.

³ Wees ons genadig, Here, wees ons genadig; want ons het meer as genoeg gehad van minagting;

⁴ tot in ons diepste wese het ons meer as genoeg gehad van die spotlag van selfvoldane mense, van die minagting deur hooghartiges.