Psalms 123:2 - Die Bybel 2020-vertaling

² Kyk, soos die oë van slawe gerig is op die hand van hulle eienaar, soos die oë van 'n slavin gerig is op die hand van haar eienares, so is ons oë gerig op die Here ons God totdat Hy ons genadig is.

Bybel vir almal

² U moet weet, ons kyk na ons God die Here soos slawe kyk na hulle eienaars, soos 'n slavin kyk na die vrou aan wie sy behoort, en ons wag dat Hy genadig moet wees vir ons.

Afrikaans 1933-1953

² Kyk, soos die oë van die knegte is op die hand van hulle heer, soos die oë van die diensmaagd is op die hand van haar meesteres — so is ons oë op die Here onse God, totdat Hy ons genadig is.

Afrikaans 1983

² Soos die oë van 'n slaaf gerig is op die hand van sy eienaar, soos die oë van 'n slavin gerig is op die hand van haar eienares, so is ons oë gerig op die Here ons God, totdat Hy Hom oor ons ontferm.

Contemporary Afrikaans Bible 2023

² Kyk, soos die oë van diensknegte op die hand van hulle HERE kyk, en soos die oë van 'n meisie op die hand van haar meesteres; daarom wag ons oë op die HERE onse God, totdat Hy Hom oor ons ontferm.

Die Boodskap

² Ons kyk op na die Here, ons God, soos werkers na hulle baas.

Nuwe Lewende Vertaling

² Soos oë van slawe gerig is op die hand van hulle meester, soos die oë van ’n slawedogter gerig is op die hand van haar werkgeefster, so is ons oë gerig op die Here ons God totdat Hy genadig is oor ons.

Psalms 123:2 Kruisverwysings

Genesis 32:26

Hy het gesê: “Laat my gaan, want die dag breek.” Maar Jakob het gesê: “Ek sal u nie laat gaan nie, tensy u my seën.”

Genesis 49:18

“ Op u verlossing wag ek, Here.

1 Konings 1:20

En nou, my heer die koning: Die oë van die hele Israel is op u gerig om aan hulle bekend te maak wie op die troon van my heer die koning gaan sit ná hom.

2 Kronieke 20:12

Ons God, sal U hulle dan nie oordeel nie, want ons het nie die krag om hierdie groot menigte wat teen ons optrek, teen te staan nie. Ons self weet nie wat om te doen nie, maar op U is ons oë gerig. ”

Psalms 119:82

My oë smag na u belofte en vra: “Wanneer sal U my troos?”

Psalms 25:15

My oë bly altyd op die Here, want dit is Hy wat my voete uit die vangnet bevry.

Lukas 18:1

Hy het vir hulle 'n gelykenis vertel oor hoe nodig dit is om altyd te bid en nie moed te verloor nie.

Josua 10:6

Die manne van Gibeon het hierdie boodskap na Josua gestuur, na die kamp by Gilgal: “Moet u dienaars nie in die steek laat nie! Trek gou na ons op! Red ons en help ons! Want al die konings van die Amoriete wat in die bergland woon, het teen ons saamgetrek.”

Josua 9:23

Daarom, vervloek is julle! Julle sal julle knegskap nie kan afskud nie; houtkappers en waterdraers sal julle wees vir die huis van my God.”

Josua 9:27

Op daardie dag het Josua hulle houtkappers en waterdraers gemaak vir die volksvergadering en vir die altaar van die Here, op die plek wat Hy sou kies; dit is vandag nog so.