Psalms 54 - Die Bybel 2020-vertaling Die Bybel 2020-vertaling
Psalms 54

¹ Vir die •musiekleier. Met snarespel. 'n Maskiel. Van Dawid.

² Toe die Sifiete gegaan en vir Saul gesê het: “Het Dawid dan nie by ons kom wegkruip nie?”

³ O God, verlos my deur u Naam en verdedig my saak deur u groot krag.

⁴ O God, hoor my gebed; luister na die woorde van my mond,

⁵ want vreemdes het teen my opgestaan en gewelddadige mense soek my lewe. Hulle hou God nie voor oë nie. •Sela

⁶ Kyk, God is vir my 'n helper, my Heer is die Een wat my lewe ondersteun.

⁷ Hy sal my teenstanders vir hulle kwaad vergeld. Omdat U getrou is, vernietig hulle!

⁸ Vrywillig wil ek offers aan U bring. Ek wil u Naam prys, Here, want dit is goed;

⁹ ja, u Naam het my uit alle nood gered en ek kon op my vyande neerkyk.